"ველური ველური ცხინვალი“: გაგლოევის ძმამ ოპონენტებზე თავდასხმა მოაწყო
ალიკ გაგლოევი
ცხინვალში ამჟამინდელი ე.წ. პრეზიდენტის ძმის, ალან გაგლოევის მეგობრებმა ცეცხლი გაუხსნეს ექსპრეზიდენტ ანატოლი ბიბილოვის მხარდამჭერებს. თავდასხმა დღისით, ცხინვალის ხალხით სავსე ქუჩაზე მოხდა. მრავალი თვითმხილველის თქმით, თავად პრეზიდენტის ძმას არ უსვრია, თუმცა ხელმძღვანელობდა “ოპერაციას” და შემდეგ შეაგროვა მტკიცებულებები – ტყვიის მასრები.
ეს არ არის პირველი შემთხვევა, როდესაც პრეზიდენტის ძმა ამგვარ “შარში“ ეხვევა – ადგილობრივი მოსახლეობა და ექსპერტები ჩივიან, რომ ალან გაგლოევის პრეზიდენტობის ორი წლის განმავლობაში ცხინვალი ველურ დასავლეთად გადაიქცა.
- “სრული მარცხი” თუ “ყველაფერი გამოგვივა”? ალან გაგლოევის პირველი ორი წლის შეჯამება
- ცხინვალში გახმაურებული მკვლელობის გამოძიება დასრულდა
- ცხინვალის რეგიონში გახმაურებული მკვლელობისთვის, ყოფილი “ვაგნერელი” დააკავეს
პერსონაჟები
იმისათვის, რომ ოჯახურ კავშირებსა და პოლიტიკურ ბანაკებში არ ჩავიკარგოთ, ჩამოვთვლით ამ დრამის მთავარი (პირდაპირი და ირიბი) მონაწილეები:
ალან გაგლოევი – სამხრეთ ოსეთის ამჟამინდელი პრეზიდენტი;
ალექსანდრე (ალიკ) გაგლოევი – მისი ძმა მდიდარი კრიმინალური წარსულით (და ალბათ აწმყოთიც);
ანატოლი ბიბილოვი – ყოფილი პრეზიდენტი, ახლანდელი ოპოზიციური პარტია „ერთიანი ოსეთის“ დამფუძნებელი;
ბიბილოვის მხარდამჭერები – ძმები სერგეი და ლევ კაბისოვები, რომლებიც მისი პრეზიდნეტობის დროს იკავებდნენ მაღალ თანამდებობებს და ხელისუფლების შეცვლის შემდეგ უმუშევრად დარჩნენ.
ქორწილში დამგეგმავი
როგორც JAMnews-ს წყაროებმა განუცხადეს, ყველაფერი 13 ივლისს ქორწილში დაიწყო, სადაც სტუმრად ორივე პრეზიდენტის მხარდამჭერები იმყოფებოდნენ.
რაღაც მომენტში, ალან გაგლოევის ერთ-ერთმა მხარდამჭერმა, კრივის მწვრთნელმა ვადიმ კოჩიევმა “ერთიანი ოსეთის“ და ანატოლი ბიბილოვის გინება დაიწყო. სერგეი კაბისოვს ეს არ მოეწონა და მათ ერთმანეთს ხელი გაარტყეს.
“კოჩიევი კაბისოვს იარაღით დაემუქრა და სცემა. სერგეი სახლში დაბრუნდა, ტანსაცმელი გამოიცვალა და დაბრუნდა კოჩიევის მოსაძებნად, რომელიც უკვე სხვა ქორწილში იმყოფებოდა. იქ ისევ ატყდა ჩხუბი – ბოლოს ორივე პოლიციაში გადაიყვანეს და შერიგებისკენ მოუწოდეს.
მეორე დღეს სერგეიმ ძმა ლევი და კიდევ ერთი მეგობარი წაიყვანა და კონფლიქტის მოსაგვარებლად გაგლოევის მხარდამჭერებთან წინასწარ შეთანხმებულ შეხვედრაზე მივიდა“, – ამბობს ჩვენი წყარო.
თუმცა, თვითმხილველების თქმით, 20-მდე შეიარაღებული მამაკაცი ალექსანდრ გაგლოევის გარემოცვიდან უიარაღო კაბისოვებს შეხვედრის ადგილზე ელოდებოდა. ისინი აშკარად არ იყვნენ შერიგების ხასიათზე, შესაბამისად, მათ დაიწყეს კაბისოვის შეურაცხყოფა და მუქარა.
შემდეგ გოგლოევის მომხრეების სიტყვიდან საქმეზე გადავიდნენ და დაიწყეს ავტომატებიდან სროლა:
“ისროდნენ ჰაერში და ფეხებში – ორივე ძმა კაბისოვი ფეხებში დაიჭრა. პოლიცია შემთხვევის ადგილზე არ მისულა და კონფლიქტში არ ჩარეულა. ხალხი ამბობს, რომ ალიკ გაგლოევმა მიწაზე დაყრილი მასრები შეაგროვა და მეგობრებთან ერთად მშვიდად დატოვა დანაშაულის ადგილი“.
დაჭრილი ძმები კაბისოვები ადგილობრივ საავადმყოფოში გადაიყვანეს, სადაც სთხოვდნენ რომ დროზე დაეტოვებინათ ცხინვალი, რადგან საფრთხე ექიმებსაც შეექმნებოდათ.
არანაირი განცხადება – არანაირი მოქმედება
ინციდენტის საპასუხოდ, პარტია “ერთიანი ოსეთის” ცენტრალურმა კომიტეტმა განაცხადა, რომ ბოლო ორი წლის განმავლობაში სამხრეთ ოსეთი სროლების, მკვლელობებისა და განგსტერული შეტაკებების ადგილად იქცა.
“დანაშაულის დონე წარმოუდგენელი ტემპით იზრდება. მოქმედმა პრეზიდენტმა ალან გაგლოევმა წინასაარჩევნო დებატების დროს განაცხადა, რომ აპირებს კრიმინალთან ბრძოლას, მიუხედავად იმისა, მისი ძმა იქნება ის თუ ვინმე სხვა. მაგრამ რას ვხედავთ სინამდვილეში? რესპუბლიკა ჩაძირულია ქაოსში, ბანდიტიზმში, დამღუპველ 90-იანებში“, – ნათქვამია პარტიის განცხადებაში.
ოფიციალურმა მედიამ გაავრცელა ინფორმაცია, რომ პრეზიდენტმა სამართალდამცავ უწყებებს “ინციდენტის გამოძიება“ დაავალა. თუმცა, შინაგან საქმეთა სამინისტრომ ეს არ გააკეთა და თავდასხმის ფაქტზე სისხლის სამართლის საქმე არ აღძრა. ფორმალური მიზეზი ის იყო, რომ ძმებმა კაბისოვებმა პოლიციაში განცხადება არ შეიტანეს.
თავად კაბისოვები ჟურნალისტებთან არანაირ კომენტარს არ აკეთებენ, თუმცა ახლობლების თქმით, მათ უბრალოდ არ სჯერათ სამართლიანობის და უაზროდ მიაჩნიათ პოლიციასთან თანამშრომლობა.
კრიმინალური წრე
ალიკ გაგლოევს აქვს კრიმინალური ელემენტის რეპუტაცია სამხრეთ ოსეთში. 2020 წელს ის სამმაგ მკვლელობაშიც კი იყო ეჭვმიტანილი.
ალიკის წრე ასევე შედგება ძირითადად იმ ადამიანებისგან, რომელთა სახელებიც დროდადრო ჩნდება კრიმინალურ ქრონიკებში. მაგალითად, მის ერთ-ერთ ახლო მეგობარს ხოხ გაბარაევს 2021 წელს ბრალი დასდეს სასტიკ დანაშაულში – კაცის გატაცებაში, რომელიც მან და მისმა თანამზრახველებმა აწამეს.
მაგრამ მას შემდეგ, რაც ალან გაგლოევი მოვიდა ხელისუფლებაში, ალიკის მეგობრები წარმატებით გაურბიან პასუხისმგებლობას.
„პრეზიდენტის ძმის და მისი ჯგუფის მიმართ მიმტევებლობამ გამოიწვია დანაშაულის მკვეთრი ზრდა“, – ამბობს ცხინვალის მოსახლეობა.
სხვათა შორის, თვითმხილველების თქმით, ხოხ გაბარაევი ერთ-ერთი იყო, ვინც ძმებ კაბისოვებს ესროდა.
ამ შემთხვევაში დაზარალებულ სერგეი კაბისოვსაც არ შეიძლება ეწოდოს კანონმორჩილი მოქალაქე. რამდენიმე წლის წინ, როდესაც ჯერ კიდევ სამხრეთ ოსეთის თავდაცვის მინისტრის მოადგილე იყო, ის თავს დაესხა ვლადიკავკაზელ ჟურნალისტ რუსლან ტოტროვს. ამ შემთხვევამ ფართო რეზონანსი გამოიწვია საზოგადოებაში და სერიოზულად იმოქმედა მაშინდელი პრეზიდენტის, ანატოლი ბიბილოვის რეიტინგზე.
რუსლან ტოტროვმა ამის შემდეგ ქვეყანა დატოვა.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
