საქართველოს მოქალაქეებისთვის ჩინეთში უვიზო მიმოსვლა 28 მაისიდან ამოქმედდება
უვიზო მიმოსვლა ჩინეთთან
საქართველოს საგარეო საქმეთა სამინისტროს ცნობით, 28 მაისიდან საქართველოს მოქალაქეები ჩინეთში უვიზოდ მოგზაურობას შეძლებენ და შესაძლებლობა ექნებათ ჩინეთში ზედიზედ 30 დღე დაყონ.
საგარეო უწყების ცნობით, მინისტრის მოადგილე საქართველოში ჩინეთის რესპუბლიკის ელჩს შეხვდა, რომელმაც ქართულ მხარეს ოფიციალურად გადასცა ნოტა, რომლის თანახმადაც, ჩინეთის მხრიდან დასრულებულია 2024 წლის 10 აპრილს გაფორმებული “საქართველოს მთავრობასა და ჩინეთის სახალხო რესპუბლიკის მთავრობას შორის ორდინალური პასპორტების მფლობელთა სავიზო მოთხოვნებისგან ორმხრივად გათავისუფლების შესახებ შეთანხმების” ძალაში შესვლის პროცედურები.
“აღნიშნულის შედეგად, საქართველოს მოქალაქეებს უკვე 2024 წლის 28 მაისიდან საშუალება ეძლევათ უვიზოდ იმოგზაურონ ჩინეთის სახალხო რესპუბლიკაში და დაჰყონ ქვეყანაში ზედიზედ 30 დღე.” – აცხადებენ საგარეო საქმეთა სამინისტროში.
საქართველოს მაშინდელმა პრემიერმინისტრმა ირაკლი ღარიბაშვილმა 2023 წლის 11 სექტემბერს განაცხადა, რომ საქართველოში ჩინეთის მოქალაქეებისთვის უვიზო რეჟიმი ამოქმედდება.
მისივე თქმით, ტურიზმი არის ძალიან მნიშვნელოვანი და შარშან საქართველომ 3 მილიარდ 500 მილიონი დოლარის რაოდენობით პირდაპირი შემოსავალი მიიღო ტურიზმიდან. პრემიერის განმარტებით, მთავრობა ელოდება, რომ შემოსავალი კიდევ უფრო მეტი იქნება – 4 და 4.5 მილიარდი. პრემიერმა ასევე აღნიშნა, რომ ჩინეთის ეკონომიკის მინისტრის დელეგაცია ჩამოვიდა კონკრეტულად პირდაპირი ფრენების საკითხზე.
ეკონომიკის მინისტრის, ლევან დავითაშვილის შეფასებით, პრემიერმინისტრის ჩინეთში ვიზიტი ისტორიული იყო და ტურისტული სექტორი ერთ-ერთი მიმართულებაა, სადაც საქართველოს მთავრობა თანამშრომლობის გაღრმავების პოტენციალს ხედავს.
