"უტოპია და დემაგოგია“: ცხინვალი კვლავ საუბრობს რუსეთისა და ბელარუსის საკავშირო სახელმწიფოში გაწევრიანებაზე

სამხრეთ ოსეთის შესვლა საკავშირო სახელმწიფოში

ე.წ. სამხრეთ ოსეთის პრეზიდენტმა ალან გაგლოევმა განაცხადა, რომ ხელისუფლება განიხილავს საკავშირო სახელმწიფოში გაწევრიანების ვარიანტს, როგორც ერთ-ერთ ყველაზე პერსპექტიულს.

საკავშირო სახელმწიფო არის რუსეთისა და ბელარუსის ზენაციონალური წარმონაქმნი, რომელიც შეიქმნა 1990-იანი წლების ბოლოს – ერთიანი პოლიტიკური, ეკონომიკური, სამხედრო და ა.შ. ორგანიზებული სივრცე.

“სამხრეთ ოსეთი აქტიურად მუშაობს ბელარუსთან თანამშრომლობის დასამყარებლად, რაც გააძლიერებს კავშირებს საკავშირო სახელმწიფოსთან. ჯერჯერობით საუბარია კონტაქტებზე ჰუმანიტარულ სფეროში, სპორტში და ა.შ. სამომავლოდ ჩვენ ველით უფრო მჭიდრო თანამშრომლობას ბელარუსის რესპუბლიკასთან“, – განაცხადა ალან გაგლოევმა აგვისტოს დასაწყისში.

თუმცა ცხინვალის პოლიტიკური წრეები ამას ნაკლებად სავარაუდო თვლიან. საკავშირო სახელმწიფოში გაწევრიანების შესახებ განცხადება ადრეც იყო გაჟღერებული, მაგრამ ბელარუსის მიერ სამხრეთ ოსეთის დამოუკიდებლობის აღიარების გარეშე ეს შეუძლებელია.

• აფხაზეთის შესვლა საკავშირო სახელმწიფოში: „ცრუ ფანდი” თუ უალტერნატივო არჩევანი?
• სამხრეთ ოსეთს სურს შეუერთდეს რუსეთს, ამბობენ ადგილობრივი პოლიტიკოსები

ამ “არათანმიმდევრულობაზე“ მიანიშნებს, მაგალითად, მაჟორიტარი დეპუტატი აზამატ ჯანაევი:

“საკავშირო სახელმწიფოში შესვლისთვის, პირველ რიგში, ბელარუსმა უნდა აღიაროს ჩვენი დამოუკიდებლობა, მაგრამ რადგან ეს არ მომხდარა, მაშინ საკავშირო სახელმწიფო ჩვენთვის არ არსებობს. ეს არის ძირითადი, რაც ყველა პოლიტიკოსმა უნდა იცოდეს“.

ჯანაევი დარწმუნებულია, რომ რუსეთთან შეერთება სამხრეთ ოსეთს ბევრად მეტ სარგებელს მოუტანს.

“ჩვენ უნდა ვიმუშაოთ არა საკავშირო სახელმწიფოში შესვლისთვის, არამედ ჩვენი მამებისა და ბაბუების ოცნების ასასრულებლად – გავხდეთ რუსეთის ნაწილი და შემდეგ ავტომატურად გავხდებით როგორც საკავშირო სახელმწიფოს, ასევე ბირთვული ძალის ნაწილი.” – განაცხადა დეპუტატმა.

ცხინვალის ერთ-ერთმა ოფიციალურმა პირმა, ანონიმურობის პირობით, JAMnews-ს გაუზიარა თავისი მოსაზრება, რომ „ამ ეტაპზე სამხრეთ ოსეთის საკავშირო სახელმწიფოში გაწევრიანებაზე საუბარი უტოპიაა“.

„გაგლოევის რიტორიკა არის დემაგოგია, რომელიც შექმნილია იმისათვის, რომ საზოგადოების ყურადღება გადაიტანოს შიდა პოლიტიკური პრობლემებიდან და რაღაცნაირად მაინც დამალოს საკუთარი უძლურება“, – თვლის ის.

ოფიციალური პირი დასძენს, რომ “საგარეო პოლიტიკის მუშაობა სხვა ქვეყნების მიერ სამხრეთ ოსეთის აღიარებაზე ალან გაგლოევის ხელისუფლებაში ყოფნის პერიოდში ჩამოიშალა“.

ოპოზიციური პარტია “ერთიანი ოსეთი“ მიიჩნევს, რომ ასეთი განცხადებებით პრეზიდენტი და მისი გარემოცვა ცდილობენ ყურადღების გადატანას.

პარტიის პრესსამსახურმა გაიხსენა, რომ 2022 წელს ხელისუფლებაში მოსვლისთანავე გაგლოევმა “შეაჩერა“ მისი წინამორბედის, ანატოლი ბიბილოვის განკარგულება სამხრეთ ოსეთის რუსეთში შესვლის შესახებ რეფერენდუმის ჩატარების შესახებ.

დმიტრი მედვედევი საქართველოს ოკუპირებული ტერიტორიების რუსეთთან შეერთებას არ გამორიცხავს

“აფხაზეთსა და სამხრეთ ოსეთში რუსეთთან შეერთების იდეა ძველებურად პოპულარულია”

ფაქტობრივად, მიუხედავად იმისა, რომ გაგლოევი და მისი ზოგიერთი თანამოაზრე დროდადრო საუბრობენ საკავშირო სახელმწიფოში გაწევრიანებაზე, ამ მიმართულებით კონკრეტული ნაბიჯები ჯერ არ გადადგმულა.

ასე, მაგალითად, ზუსტად ერთი წლის წინ, 2023 წლის აგვისტოში გაგლოევის სახელმწიფო მრჩეველმა, პრო-სამთავრობო პარტია “სამშობლოს“ თავმჯდომარე ვიაჩესლავ გობოზოვმა განაცხადა, რომ სამხრეთ ოსეთს სურს გაწევრიანდეს საკავშირო სახელმწიფოში და ამიტომ მინსკის აღიარება მისთვის მნიშვნელოვანია.

გობოზოვის თქმით, ბელარუსის პრეზიდენტი ალექსანდრ ლუკაშენკო ადრე თუ გვიან მიხვდება, რა სარგებელს მოუტანს მინსკს სამხრეთ ოსეთის სუვერენიტეტის აღიარება.

თავად ლუკაშენკომ ჯერ კიდევ 2023 წლის ივლისში განაცხადა, რომ არ გამორიცხავდა აღიარების შესაძლებლობას, თუ სამხრეთ ოსეთის პარლამენტი მას მსგავსი თხოვნით მიმართავდა – მაგრამ სამხრეთ ოსეთის პარლამენტს ეს ჯერ არ გაუკეთებია და, როგორც ჩანს, არც აპირებს.

სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო