უკრაინამ საქართველოდან ელჩი გაიწვია

უკრაინამ საქართველოდან ელჩი გაიწვია

უკრაინის პრეზიდენტმა ვოლოდიმირ ზელენსკიმ საქართველოდან და მაროკოდან ელჩები გაიწვია. ზელენსკიმ ვიდეომიმართვისას უკრაინის დიპლომატიური მისიების წარმომადგენლების მუშაობაზე ისაუბრა და აღნიშნა, რომ მათ სხვა სამსახური უნდა მოძებნონ.

„არსებობენ ისეთები, რომლებიც ყველასთან ერთად მუშაობენ ქვეყნის დასაცავად, რათა უკრაინამ დაიბრუნოს თავისი მომავალი. ჩვენ ვაფასებთ თითოეული ასეთი ადამიანის შრომას. და არიან ისეთებიც, რომლებიც კარგავენ დროს და მუშაობენ მხოლოდ იმისთვის, რომ დარჩნენ თანამდებობაზე – გთხოვთ, მოძებნოთ სხვა სამსახური”– განაცხადა უკრაინის პრეზიდენტმა.

პარლამენტის თავმჯდომარე, შალვა პაპუაშვილი ამბობს, რომ ხელისუფლება ზედმეტ კომენტარს არ გააკეთებს ამ საკითხზე:

“თავის დროზე კონსულტაციებზე გაწვევა, ახლა ელჩის მოხსნა. თავის დროზეც ვთქვით, რომ ეს არ მიგვაჩნია სამართლიან გადაწყვეტილებად, თუმცა მეორე მხრივ, ვამბობთ, რომ ეს არ არის ის პერიოდი, როდესაც უნდა ვისაუბროთ შეფასებებზე. დღეს ჩვენ სრულად სოლიდარულები ვართ უკრაინელი ხალხის მიმართ და მთავარია ვკონცენტრირდეთ იმაზე, რომ დასრულდეს ომი უკრაინაში. ეს საკითხები იმდენად უმნიშვნელოა იმ საერთო მიზანთან შეფარდებით, რასაც ადამიანური ტრაგედიების დასრულება ჰქვია”

ოპოზიციური პარტიის, “სტრატეგია აღმაშენებლის” თავმჯდომარე, გიორგი ვაშაძე ამბობს, რომ უკრაინის პრეზიდენტის გადაწყვეტილება, საქართველოდან ელჩის გაწვევის თაობაზე – დემარშია. ვაშაძის თქმით, იმის ნაცვლად, რომ საქართველოს მთავრობას დაშვებული შეცდომები გამოესწორებინა, ეს ყველაფერი კიდევ უფრო გააღრმავა.

“ქართული ოცნება” იმ პოლიტიკურ ძალად იქცა, რომელიც აფასებს სიმხდალეს, ხოლო გაბედულ, პრინციპულ ნაბიჯებზე ამბობს, რომ ეს სახელმწიფო ინტერესების საწინააღმდეგოა. ეს არის რეალობა, რომელიც შემჩნეულია არა მხოლოდ პრეზიდენტ ზელენსკის მხრიდან, ასევე ჩვენი დასავლელი პარტნიორების მხრიდან.

როცა უკრაინელი დევნილებისთვის უფასო საცხოვრებელიც კი არ გამოუყვიათ, სხვაზე რაზე ვლაპარაკობთ?! ჰუმანიტარულ საკითხებშიც კი მყარი მხარდაჭერა არ გამოუხატავს. მესმის, რომ ჩვენ ჩვენი დევნილები გვყავს და ბევრი სხვა სოციალური პრობლემა გვაქვს, მაგრამ ახლა უზარმაზარი დარტყმის ქვეშ არის უკრაინა და უკრაინაში მიმდინარე ბრძოლა არის ჩვენი ბრძოლა”, – განაცხადა ვაშაძემ.

“ევროპული საქართველოს” ლიდერი გიგა ბოკერია კი ამბობს, რომ “ჩვენმა ხელისუფლებამ, რომელიც არალეგიტიმურია, მოახერხა, რომ ასეთ დროს დაპირისპირებაშია უკრაინის ხელისუფლებასთან”. როგორც ბოკერია აღნიშნავს, საქართველოს ჰყავს ხელისუფლება, რომელიც ქვეყნის ეროვნულ ინტერესებს პირდაპირ არ ემსახურება.

“ჩემი და ჩვენი საქმე არ არის იმის გარჩევა, ჩვენი მეგობარი ქვეყნის პრეზიდენტი, მითუმეტეს ისეთი ქვეყნის, რომელიც ახლა გმირულად იბრძვის და პუტინის იმპერიის მხრიდან დაბომბვის ქვეშ არის, რით არის უკმაყოფილო თუ კმაყოფილი ელჩით”, – განაცხადა ბოკერიამ.

მისივე თქმით, საქართველოს ხელისუფლებამ ღირსების შელახვით, სამარცხვინოდ, ასევე, პრაგმატულად და ჩვენი ეროვნული ინტერესების საზიანოდ უკრაინის ხელისუფლებასთან კონფლიქტში შესვლა მოახერხა.

“როდესაც ერთდროულად ამბობ, რომ ნაწილობრივ უკრაინის ხელისუფლების პასუხისმგებლობაა ომი რომ თავიდან ვერ აიცილა, თან ამბობ, რომ უკრაინისთვის სამხედრო დახმარებას აზრი არ აქვს, რაც ირაკლი ღარიბაშვილმა თქვა, თან ამბობ, რომ არც სანქციებს ეშველება და თან კამპანიას აწარმოებ, რომ თურმე ეს ვითარება შენი ბიზნესისთვის შესაძლებლობაა იმისა, რომ ბოროტების იმპერიის ბაზარზე შეხვიდე – სისულელეა, რაც ითქვა და თან ხელს უშლი მოხალისეებს და ყველანაირ დემონსტრირებას ახდენ იმისა, რომ ისტორიის სწორ მხარეს არ ხარ, მაშინ ამას ეს რეაქცია მოჰყვება და ჩვენი ქვეყნისთვის ეს არის მორალური და პოლიტიკური კატასტროფაა”, – განაცხადა ბოკერიამ.

● აბა ომი გინდათ?! – ვინ და რატომ აძლიერებს საქართველოში ომის ბუნებრივ შიშს? ექსპერტების შეფასებები
● რატომ შეიჭრა რუსეთი უკრაინაში, რა სურს პუტინს და როგორ შეიძლება დასრულდეს ომი?
● ბაიდენის ხუთი გამოწვევა ევროპაში

ვოლოდიმირ ზელენსკიმ საქართველოდან ელჩი დროებით პირველ მარტს გაიწვია. მიზეზად კი დაასახელა საქართველოს ხელისუფლების “ამორალური პოზიცია” რუსეთის მიმართ სანქციების დაწესებაზე უარის თქმასთან დაკავშირებით. 

უკრაინის პრეზიდენტისთვის მიუღებელი აღმოჩნდა ისიც, რომ საქართველომ უკრაინაში საბრძოლველად წამსვლელი მოხალისეებისთვის გაფრენის ნებართვა არ გასცა. 

“ქართული ოცნების” თავმჯდომარემ, ირაკლი კობახიძემ მაშინ თქვა, რომ ვოლოდიმირ ზელენსკის განცხადება საქართველოდან უკრაინის ელჩის გაწვევაზე უკავშირდება “კოორდინირებულ მცდელობას, საქართველო ჩართული იყოს სამხედრო კონფლიქტში.”