უკრაინა საქართველოში მათი მოქალაქეების ყოფნაში საფრთხეს ვერ ხედავს
25 იანვარს უკრაინის საგარეო საქმეთა სამინისტროში საქართველოს ელჩთან შეხვედრა გაიმართა. საქართველოს საგარეო საქმეთა სამინისტროს ინფორმაციით, უკრაინის საგარეო უწყებაში საქართველოს ელჩს დაუდასტურეს, რომ ვერ ხედავენ საფრთხეს საქართველოში უკრაინის მოქალაქეების ყოფნასთან დაკავშირებით.
მანამდე, უკრაინის საქმეთა დროებითი რწმუნებული ანდრეი კასიანოვი საქართველოს საგარეო საქმეთა სამინისტროში დაიბარეს. როგორც უწყებაში განმარტეს, ელჩი დაიბარეს მის მიერ გაკეთებულ განცხადებასთან დაკავშირებით ახსნა-განმარტებისთვის და ორმხრივი ურთიერთობის “სხვა საკითხები ამ შეხევდრაზე” მასთან განხილული არ ყოფილა.
24 იანვარს “ევროპეისკა პრავდასთან” ინტერვიუში საქართველოში უკრაინის ელჩის მოვალეობის დროებითმა შემსრულებელმა ანდრეი კასიანოვმა განაცხადა, რომ უკრაინის საელჩო არ გამორიცხავს საქართველოდან უკრაინის მოქალაქეების ევაკუაციას, თუ მათ საფრთხე დაემუქრებათ მოსკოვსა და თბილისს შორის პირდაპირი საჰაერო მიმოსვლის აღდგენის შემთხვევაში.
“პირდაპირი საჰაერო მიმოსვლის აღდგენის და უსაფრთხოების რეალური საფრთხეების ზრდის შემთხვევაში, დღეისათვის საელჩო არ გამორიცხავს, მიმართოს საერთაშორისო პარტნიორებსა და საერთაშორისო ორგანიზაციებს, რათა განიხილონ დახმარების შესაძლებლობა საქართველოდან უკრაინის მოქალაქეების მასობრივი ევაკუაციისთვის”, – განაცხადა კასიანოვმა.
მან ასევე ხაზგასმით აღნიშნა, რომ ეს იმ შემთხვევაში მოხდება, თუ უკრაინის მოქალაქეების სიცოცხლესა და უსაფრთხოებას რეალური საფრთხე დაემუქრება.
საქართველოში უკრაინის საქმეთა დროებითმა რწმუნებულმა ასევე განმარტა, რომ საქართველოში რუსების არანორმალური შემოდინებით გამოწვეული უსაფრთხოების მნიშვნელოვნად გაზრდილი რისკების ფონზე, საელჩო ყველაფერს აკეთებს, რომ ხელი შეუწყოს მოქალაქეების უკრაინაში დაბრუნებას.
რას ამბობს საქართველოს საგარეოს საქმეთა სამინისტრო
როგორც საქართველოს საგარეო საქმეთა სამინისტროში ამბობენ, ქართული მხარის მიერ კიდევ ერთხელ დაფიქსირდა საქართველოს მხარდაჭერა და სოლიდარობა უკრაინის მიმართ. მათივე განმარტებით, უკრაინულმა მხარემ მადლიერება გამოხატა საქართველოს მიმართ როგორც პოლიტიკური მხარდაჭერის, ასევე ომის პერიოდში გაწეული მნიშვნელოვანი ჰუმანიტარული დახმარებისთვის.
“მათ შორის, უკრაინის მხრიდან გამოითქვა მადლიერება უკრაინელი ლტოლვილების მიღებასთან დაკავშირებით და აღნიშნა, რომ უკრაინა და უკრაინის საგარეო საქმეთა სამინისტრო მადლობელია ქართული მხარის მიმართ, უკრაინის მოქალაქეების საქართველოში მიღებისა და მათი დახმარებისთვის და საქართველოში უკრაინის მოქალაქეების ყოფნასთან დაკავშირებით ვერანირ საფრთხეს ვერ ხედავს”.– წერია საქართველოს საგარეო უწყების მიერ გავრცელებულ განცხადებაში.
რას ამბობს უკრაინისსაგარეოს საქმეთა სამინისტრო
უკრაინის საგარეო საქმეთა სამინისტრო საქართველოს ელჩთან შეხვედრის შემდეგ წერს, რომ მინისტრის მოადგილემ იმედი გამოთქვა, რომ საქართველო გადახედავს თავის პოზიციას და შეუერთდება იმ პარტნიორების წრეს, რომლებიც უკრაინას იარაღსა და სამხედრო აღჭურვილობას აწვდიან, ასევე, თბილისი შეუერთდება ევროკავშირის მიერ აგრესორი სახელმწიფოს წინააღმდეგ დაწესებულ ყველა სანქციას.
“ამ კონტექსტში მან გამოთქვა შეშფოთება საქართველოსა და რუსეთს შორის პირდაპირი საჰაერო მიმოსვლის შესაძლო აღდგენის შესახებ ინფორმაციის გამო. თავის მხრივ, ქართველმა დიპლომატმა დაარწმუნა, რომ საქართველო არ აპირებს რუსეთის ფედერაციაში ფრენების განახლებას”, – აღნიშნულია განცხადებაში.
მათივე ცნობით, მინისტრის მოადგილემ, ევჰენ პერებიინისმა, ასევე, დააყენა საქართველოში პატიმრობაში მყოფი უკრაინის მოქალაქის, მიხეილ სააკაშვილის ჯანმრთელობის გაუარესების საკითხი და მოუწოდა, განიხილონ მისი სამკურნალოდ უკრაინაში ან მესამე ქვეყნებში გადაყვანის შესაძლებლობა.
უწყება აღნიშნავს იმასაც, რომ პერებიინისმა ქართულ მხარეს გენერატორების მიწოდებისთვის და საქართველოში უკრაინელი ბავშვების ჯანმრთელობის გაუმჯობესების პროგრამებისთვის მადლობა გადაუხადა.
სამინისტროს ცნობით, შეხვედრაზე მხარეებმა განიხილეს ორმხრივი თანამშრომლობის სხვა საკითხებიც, კერძოდ, უკრაინის პრეზიდენტის მიერ ინიციირებული მშვიდობის ფორმულის განხორციელებაში საქართველოს ჩართვის შესაძლებლობა და ასევე დადებითად შეაფასეს უკრაინულ-ქართული საპარლამენტთაშორისო დიალოგის გააქტიურება.
მორიგი დაძაბულობა საქართველოსა და უკრაინას შორის რუსეთის საგარეო საქმეთა მინისტრის, სერგეი ლავროვის განცხადებამ გამოიწვია, რომელმაც შეაქო საქართველოს მთავრობა და თქვა, რომ ქვეყანა “დასავლეთის ზეწოლას წინააღმდეგობას უწევს.”
ლავრომა საქართველოსთან პირდაპირი ავიამიმოსვლის მალე აღდგენის იმედიც გამოთქვა და აღნიშნა, რომ საქართველოს ეკონომიკის 10 პროცენტით ზრდა დიდწილად რუსეთთან კავშირის დამსახურებაა.
რუსეთის საგარეო უწყების ხელმძღვანელმა ისაუბრა იმაზეც, რომ საქართველოს, აფხაზეთსა და ცხინვალს შორის დიალოგისთვის საჭირო მექანიზმები არსებობს, რომელშიც “რუსეთიც მონაწილეობს”. მისივე განმარტებით, მოსკოვი საქართველოსა და ოკუპირებულ ტერიტორიებს შორის ურთიერთობების აშენების მომხრეა. ამის შესახებ ლავროვმა 2022 წლის შემაჯამებელ პრესკონფერენციაზე ისაუბრა.
ეს არ არის პირველი შემთხვევა, როცა რუსეთის ფედერაციის მაღალი რანგის ჩინოვნიკები საქართველოს ხელისუფლებას უკრაინასთან და დასავლეთთან მიმართებაში აქებენ.
გასული წლის 25 მარტს რუსეთის ფედერაციის საბჭოს საერთაშორისო საქმეთა კომიტეტის თავმჯდომარემ, გრიგორი კარასინმა ასევე შეაქო საქართველოს ხელისუფლება უკრაინის საკითხზე პოზიციის გამო. საქართველოს რეაქციას დასავლეთის ანტირუსულ სანქციებზე კარასინმა “გაწონასწორებული” უწოდა და ხაზგასმით აღნიშნა, რომ რუსეთში „ეს ფაქტი შეუმჩნეველი არ დარჩება“.
