პასუხი ბრიტანეთის საელჩოს: ოცნება თვითმმართველობის არჩევნებზე ეუთო/ოდირის მოწვევას არ აპირებს
თვითმმართველობის არჩევნები
“ქართული ოცნების” პრემიერმინისტრი ირაკლი კობახიძე დიდი ბრიტანეთის საელჩოს მიერ გავრცელებულ განცხადებას ეხმაურება და ამბობს, რომ ოცნება არ აპირებს, თვითმმართველობის არჩევნებისთვის ეუთო/ოდირის მოწვევას.
დიდი ბრიტანეთის საელჩო ხელისუფლებას მოუწოდებს, წლევანდელ თვითმმართველობის არჩევნებზე დასაკვირვებლად ეუთო/ოდირის მისია მოიწვიოს. საელჩო ივანიშვილის მთავრობას ასევე მოუწოდებს, 2024 წლის საპარლამენტო არჩევნებთან დაკავშირებით მხედველობაში მიიღოს ოდირის საბოლოო ანგარიშში გაცემული ყველა რეკომენდაცია.
განცხადებაში ხაზგასმითაა აღნიშნული, რომ ბრიტანეთის საელჩო კატეგორიულად არ ეთანხმება მათ მიერ ამომრჩეველთა საგანმანათლებლო აქტივობების ჩატარების, ადგილობრივ საარჩევნო სადამკვირვებლო ჯგუფებს დაფინანსებისა და ეუთო/ოდირის მისიებში მონაწილეობის შეფასებას მთავრობის მხრიდან, როგორც “პროპაგანდისა და ექსტრემიზმის დაფინანსება.”
კობახიძე ამტკიცებს, რომ ადგილობრივი არჩევნების დასაკვირვებლად ეუთო/ოდირის მოწვევის პრაქტიკა ზოგადად არ არსებობს და ეს მხოლოდ საპარლამენტო არჩევნებს ეხება. იგი ასევე ირწმუნება, რომ “ქართული ოცნება” თვითმმართველობის არჩევნებს ჯანსაღ გარემოში ჩაატარებს.
“რაც შეეხება ეუთო/ოდირს. ზოგადად, არ არსებობს პრაქტიკა, რომ თვითმმართველობის არჩევნებზე ეუთო/ოდირს იწვევენ. გადახვევები გვხდება, მათ შორის, ჩვენც გვქონდა 2021 წელს, გამომდინარე იქიდან, რომ რაღაცნაირად ეს არჩევნები დაკავშირებული იყო საპარლამენტო არჩევნების თემაზე.
რამდენიმე ქვეყანაში არის გამონაკლისი შემთხვევები, როცა თვითმმართველობის არჩევნებზეც იწვევენ ეუთო/ოდრის. სტანდარტული პრაქტიკის მიხედვით, საპარლამენტო არჩევნებზე ხდება ხოლმე მათი მისიას მოწვევა. ასე რომ, ვფიქრობთ, ზედმეტი იქნება ეუთო/ოდირის დატვირთვა ჩვენი თვითმმართველობის არჩევნებისთვის და ადგილობრივი არჩევნები ჩატარდება აბსოლუტურად ჯანსაღი ფორმით.
თქვენ იცით, რომ ეუთო/ოდირი აკვირდებოდა საპარლამენტო არგვევინებს და დადო სათანადო დასკვნა, თუმცა ამ დასკვნით არავინ დაინტერესდა. დღეს იგივე ადამიანები, რომლებმაც სრული იგნორირება გაუწიეს ამ დასკვნას, გვთხოვენ ჩვენ მათ მოწვევას”, – თქვა მან.
ირაკლი კობახიძე ასევე ამბობს, რომ ხელისუფლება მზადაა, გააუმჯობესოს დიდ ბრიტანეთთან ურთიერთობები, თუმცა მისი თქმით, ამ შესაძლებლობას ლონდონის მხრიდან “ექსტრემიზმის დაფინანსების მანკიერი პრაქტიკა” აფერხებს.
“რაც შეეხება თანამშრომლობას საქართველოსა და დიდ ბრიტანეთს შორის. ჩვენ აბსოლუტურად ღია ვართ ამისთვის, თუმცა აუცილებელია, რომ ეს თანამშრომლობა გარკვეულ პრინციპებს ეფუძნებოდეს. ამ კუთხით, უნდა გავიხსენოთ, რომ იყო გარკვეულწილად მანკიერი პრაქტიკა, მაგალითად, ექსტრემიზმის დაფინანსების, ჩვენს ქვეყანაში. რა თქმა უნდა, ასეთი ფაქტები ხელს უშლის, ჯანსაღი პარტნიორული ურთიერთობების განვითარებას.
როგორც თქვენ იცით, ბოლო პერიოდში იყო რამდენიმე მცდელობა, რამდენიმე ორგანიზაცია დაფინანსებულიყო. ესენი რადიკალურ ოპოზიციასთან პირდაპირ დაკავშირებული ორგანიზაციები არიან – “ტაბულა”, “მომავლის აკადემია” – ისინი არიან “ფრანკლინის კლუბის” გაგრძელებები”, – განაცხადა კობახიძემ.
