„თუ კორუფციის წინააღმდეგი ვარ, ანტირუსული ელემენტი ვარ? - აფხაზეთში ხელისუფლების ბრალდებებს უპირისპირდებიან
ანტირუსული განწყობები აფხაზეთში
„აფხაზურ საზოგადოებაში არის მცდელობა გაღვივდეს ანტირუსული განწყობები და ამას მხარს უჭერენ გარედან. ასეთი პირების მიმართ მკაცრი ზომები იქნება მიღებული“, – განაცხადა აფხაზეთის საგარეო საქმეთა მინისტრმა ინალ არძინბამ და სახელმწიფო უსაფრთხოების სამსახურის ხელმძღვანელმა. თუმცა მათ მოსახლეობაში ანტირუსული განწყობების რაიმე მტკიცებულება არ წარმოუდგენიათ.
ხელისუფლების განზრახვებმა და თავად განცხადებამ საზოგადოებაში უკმაყოფილება გამოიწვია.
- “მოსკოვისთვის?” აფხაზეთმა ჟენევის დისკუსიების თანათავმჯდომარეებთან დისკუსიებზე უარი თქვა
- აფხაზეთის ოპოზიცია მთავრობის ვადამდე ადრე გადადგომას მოითხოვს
- მოსაზრება: ასლან ბჟანიას სურს გახდეს “აფხაზი პუტინი”
საზოგადოებრივი ორგანიზაცია “აჰიაცას” ხელმძღვანელი ახრა ბჟანია:
„სხვა ქვეყნის წინააღმდეგ სენტიმენტებთან ბრძოლის გამოცხადება სისულელეა. თუ მოგბეზრდათ, რომ აფხაზეთ-რუსეთის საზღვარზე, მდინარე ფსოუდან აფხაზეთში ვინმე შედის, უბრალოდ თქვით, რომ დაგღალათ დამოუკიდებლობამ, კონსტიტუციამ და თქვენივე მოქალაქეების უპირობო დაცვამ.“
საზოგადოებრივი ორგანიზაციების ერთობლივი განცხადება:
„მიგვაჩნია, რომ ასეთი განცხადებები, კონკრეტული სახელებისა და ფაქტების გარეშე, მიუღებელია. პრესაში ასეთი ინფორმაციის ხელმისაწვდომობა უფრო ჰგავს პროპაგანდას, საზოგადოებრივი აზრით მანიპულირებას და მოქალაქეების დაშინებას. ასევე, სპეკულაციას რუსეთის ფედერაციასთან ჩვენს ურთიერთობებში.
შეგახსენებთ, რომ ეტიკეტების მინიშნებით მცდელობები მათ მიმართ, ვინც ღიად გამოხატავს კრიტიკულ აზრს ბიჭვინთაში სახელმწიფო აგარაკის რუსეთისთვის გადაცემის შესახებ შეთანხმებისა და ენერგეტიკული სისტემის პრივატიზების მცდელობის შესახებ – მიუღებელია.“
ოპოზიციის ლიდერი ადგურ არძინბა:
„თუ თქვენ ეძებთ ადამიანებს, რომლებიც ავითარებენ ანტირუსულ განწყობებს, მაშინ ამისთვის შორს წასვლა არ გჭირდებათ – ეს არის აფხაზეთის პრეზიდენტი ასლან ბჟანია.
აფხაზეთში ანტირუსული განწყობის მთავარი კატალიზატორი სწორედ ეს ადამიანია, რომელიც მოგზაურობს რეგიონებში და პარალელებს ავლებს ბიჭვინთის სახელმწიფო აგარაკის რუსეთისთვის გადაცემასა და მათ სამხედრო დახმარებას შორის.
მეტიც, მან საერთაშორისო ასპარეზზე პირადად რუსეთის პრეზიდენტი ვლადიმირ პუტინიც კი განსაჯა და რუსეთი გამოძალვაში და შანტაჟში დაადანაშაულა. ამით მყისვე ისარგებლეს ქართულმა და უკრაინულმა მედიებმა.
გასული 30 წლის განმავლობაში არავის მიუყენებია ისეთი ზიანი აფხაზეთ-რუსეთის ურთიერთობებისთვის, როგორიც მოქმედმა პრეზიდენტმა სამ წელზე ნაკლებ დროში მოახერხა“.
- სოხუმი: ოპოზიცია ითხოვს ჩინოვნიკების დამნაშავეებად გამოცხადებას რუსეთთან დადებული ხელშეკრულების გამო
- „აფხაზეთს თუ უნდა რომ ანგარიშს უწევდნენ, კი არ უნდა განდევნოს, არამედ მოიზიდოს დასავლეთი“ – ვიდეო დისკუსია
JAMnews-ის რედაქტორი აფხაზეთში / ჩეგემსკაია პრავდას რედაქტორი ინალ ხაშიგი:
„ანტირუსულ ელემენტებთან ბრძოლის პროცესში მთავარია ჩვენ თვითონ არ დავზარალდეთ. ყოველივე ამის შემდეგ, თუ გულდასმით მიუდგებით მავნებლების ამ ძიებას, მოგიწევთ არა მხოლოდ პირობითი ტაქსის მძღოლი ჟორა ან მწვანილის გამყიდველი ანტა დაადანაშაულოთ – რომლებიც აღშფოთებულნი არიან იმ ქმედებებით, რომლებსაც რუსეთი აფხაზეთის მიმართ სჩადის ხოლმე – არამედ მათაც მოუწევთ პასუხისმგებლობლობის აღება, ვინც თავის ქმედებებით გააღვივა ეს ნეგატიური განწყობები.
თუმცა, ეს არ არის მთავარი. რუსეთი როგორღაც და ჩვენ გარეშე, აფხაზების გარეშე, თავის მტრებს გაუმკლავდება. მთავარია ჩვენ არ დავკარგოთ ქვეყანა ხელისუფლების მხრიდან ასეთი განწყობების გაღვივებით“.
ბლოგერი და პოლიტიკოსი თენგიზ ჯოპუა:
„კორუფცია და ხელისუფლებაში დარჩენის სურვილი ნებისმიერ ფასად არის დანაშაული. ხელისუფლებამ გულმოდგინედ ამოჭრა ეტიკეტი ნახევრად დამპალი მუყაოსგან – „ანტირუსული ელემენტი“.
ვფიქრობ, ხელისუფლების ეს მორიგი „პიროვნების ნევროზული კრიზისი“ ნაკარნახევია მათი ლეგიტიმაციის ამაზრზენი დაცემის შიშით. ხვალ უკვე ყველა, ვისაც შეუძლია თქვას სიმართლე, შეიძლება ამ იარლიყებით საზოგადოებისგან გაირიყოს.
მარტივად რომ ვთქვათ: ყველა, ვინც ჩვენს წინააღმდეგაა გადაუჭრელი პრობლემებისგან უიმედობაში ჩაძირულ რესპუბლიკაში, მტერია და არა მარტო ჩვენი, არამედ რუსეთსაც.
თუმცა, სად არის რუსეთი, ეს ბოლომდე არ არის ნათელი. მაგალითად, თუ მე მაწუხებს ენერგეტიკული კრიზისი და მაწუხებს ჩვენი დამოკიდებულება რუსეთზე, ვარ თუ არა ანტირუსული ელემენტი?
თუ არ მომწონს, რომ ჩემი პრეზიდენტი რუსული დახმარებით რამდენიმე ათეული მილიონი რუბლის ღირებულების ჯიპებს ყიდულობს, ანტირუსული ელემენტი ვარ?
თუ მე ვარ კორუფციის, უკანონობის, თანხების გაფლანგვის, რესურსების გაყიდვის წინააღმდეგი, ანტირუსული ელემენტი ვარ?
იქნებ საგარეო საქმეთა სამინისტრომ ან სახელმწიფო უსაფრთხოების სამსახურმა აგვიხსნას, ზოგადად როგორ გამოიყურება ასეთი ელემენტი? ჩემი აზრით, ეს არის ნახევრად წერა-კითხვის უცოდინარი დეპუტატი, რომელიც ხმას აძლევს ისე, როგორც ეუბნებიან ან უხდიან.“
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
