"ტროტუარზეც უნდა დაგვარბიოთ?"- ვიდეო ბლოგი "პროტესტები საქართველოში"
პროტესტი საქართველოში. ვიდეო
უწყვეტი პროტესტის 381-ე დღეს საპროტესტო მსვლელობის მონაწილეები პარლამენტთან იკრიბებიან. მსვლელობა ტრადიციულად ფილარმონიასთან დაიწყო, აქციის მონაწილეებმა სიმრავლის გამო გზა გადაკეტეს.
დღეს პირველი შეკრებაა მას შემდეგ, რაც “ქართულმა ოცნებამ” ტროტუარზე შეკრება აკრძალა. საკანონმდებლო ცვლილებებით, ტროტუარზე შეკრების ან მანიფესტაციის გამართვამდე 5 დღით ადრე სავალდებულო ხდება შსს-ს გაფრთხილება. თუ შსს გადაწყვეტს, უფლებამოსილება ექნება, რომ აქციის მონაწილეებს ალტერნატიული დრო და ადგილი შესთავაზოს.
პროტესტის მონაწილეთა მოთხოვნებს კიდევ ერთი მოთხოვნა დაემატა. ისინი ითხოვენ პასუხს თუ რა ქიმიური ნივთიერებები იყო გამოყენებული აქციების ჩასახშობად. პროტესტის მონაწილეების თქმით, ისინი არ ენდობიან ადგილობრივ გამოძიებას და სიმართლის გასარკვევად, საერთაშორისო გამოძიებას ითხოვენ.
მანამდე BBC-მ გამოაქვეყნა ვრცელი სტატია, სადაც აღნიშნულია, რომ მათ მიერ შეგროვებული მტკიცებულებების თანახმად, გასულ წელს საქართველოს ხელისუფლებამ ანტისამთავრობო მომიტინგეების ჩასახშობად პირველი მსოფლიო ომის დროინდელი ქიმიური ნივთიერება გამოიყენა.
ერთ წელზე მეტია საქართველოში უწყვეტი საპროტესტო აქციები მიმდინარეობს. აქციის მონაწილეები ყოველ საღამოს იკრიბებიან ქვეყნის დედაქალაქში, თბილისსა და საქართველოს რამდენიმე პატარა ქალაქში.
აქციების მიმდინარეობისას ათობით ადამიანი დააკავეს. ბევრ მათგანს სისხლის სამართლის ბრალდება წაუყენეს და პატიმრობა მიუსაჯეს. პირველად, დამოუკიდებელი საქართველოს ისტორიაში, გვყავს 150-მდე სინდისის პატიმარი, მათ შორის ქალები. დაპატიმრებულია გამოცემების “ბათუმელებისა” და “ნეტგაზეთის” დამფუძნებელი, მზია ამაღლობელი. მას ორწლიანი პატიმრობა აქვს მისჯილი პოლიციელისთვის სილის გაწვნის ფაქტზე.
აქციის მონაწილეები ითხოვენ გათავისუფლდეს ყველა პოლიტიკური პატიმარი, დაინიშნოს ახალი საპარლამენტო არჩევნები, რადგან, 2024 წლის შემოდგომის არჩევნებს ამ დრომდე არ აქვს აღიარება და გაუქმდეს ყველა ის ანტიდემოკრატიული კანონი, რაც ბოლო ორ წელიწადში მიიღო “ქართულმა ოცნებამ”.
პროტესტის ჩასახშობად, “ქართული ოცნება” სულ უფრო ამკაცრებს რეპრესიებს სამოქალაქო საზოგადოებისა და მედიის წინააღმდეგ. თუმცა, უწყვეტი პროტესტი, სხვადასხვა ფორმით, დღემდე გრძელდება.
