რას ამბობს ტრამპი ალიასკაზე ისტორიულ შეხვედრამდე სამი დღით ადრე. აშშ-ის პრეზიდენტის პრესკონფერენციის დეტალები

ტრამპი პუტინთან შეხვედრაზე

აშშ-ის პრეზიდენტმა დონალდ ტრამპმა გამართა პრესკონფერენცია, სადაც, სხვა საკითხებთან ერთად, შეაფასა ვლადიმირ პუტინთან დაგეგმილი შეხვედრა, რომელიც 15 აგვისტოს ალასკაზე გაიმართება.

ტრამპმა მოახლოებული მოლაპარაკებები „წინასწარ“ შეხვედრად მოიხსენია. მისი თქმით, შეხვედრაზე პუტინს ეტყვის, რომ დაასრულოს ომი უკრაინაში. ალასკაზე შეხვედრის შემდეგ ამერიკის პრეზიდენტი გეგმავს სატელეფონო საუბარს უკრაინის პრეზიდენტ ვოლოდიმირ ზელენსკისთან და ევროპელ ლიდერებთან.
ტრამპის თქმით, ზელენსკის მონაწილეობა ალასკაზე შეხვედრაში არ იგეგმება.

აშშ-ის პრეზიდენტმა აღნიშნა, რომ ალასკაზე შეხვედრის შემდეგ შესაძლოა გაიმართოს მოლაპარაკებები პუტინსა და ზელენსკის შორის. ასევე, მისი თქმით, არსებობს ალბათობა, რომ ამ მოლაპარაკებებში თავადაც მიიღოს მონაწილეობა.

ტრამპმა განაცხადა, რომ რუსეთსა და უკრაინას შორის გარიგებას დამოუკიდებლად არ დადებს, თუმცა დაჰპირდა, რომ შეეცდება კიევს ოკუპირებული ტერიტორიების ნაწილი დაუბრუნოს.
„რუსეთმა დაიკავა უკრაინის დიდი ნაწილი. ჩვენ ვეცდებით, ამ ტერიტორიებიდან ზოგიერთი დავაბრუნოთ. რუსეთმა დაიკავა ძალიან კარგი ტერიტორიები — ზღვისპირა ზოლი, სადაც უძვირესი უძრავი ქონებაა,“ — თქვა მან.

განსაკუთრებით აღნიშნა, რომ უკმაყოფილოა იმით, რომ ზელენსკი ასე უბრალოდ ვერ თანხმდება ტერიტორიის გაცვლაზე:

„ზელენსკიმ მიიღო ნებართვა, რომ წასულიყო ომში და ყველას მოეკლა, ახლა კი ნებართვა სჭირდება ტერიტორიის გასაცვლელად,“ — განაცხადა ტრამპმა.

ტრამპის შეფასებით, რუსეთის არმიას კიევზე თავდასხმიდან ოთხ საათში შეეძლო ქალაქის აღება, რომ პირდაპირ ავტობანით წასულიყო:

„ტანკები ტალახში გაიჭედა. სარდალმა უკეთესი გადაწყვეტილება მიიღო. იცით, რუსები კიევში ოთხ საათში იქნებოდნენ, რომ ავტობანით წასულიყვნენ. მაგრამ რუსმა გენერალმა გადაწყვიტა, რომ სასოფლო-სამეურნეო სავარგულებით გაევლო. არ ვიცი, ვინ იყო ეს გენერალი, მაგრამ ვლადიმირის [პუტინის] ცოდნით, სავარაუდოდ, ის უკვე აღარ არის ცოცხალი,“ — თქვა ტრამპმა.

პრესკონფერენციის დროს ტრამპმა მექანიკური შეცდომა დაუშვა და განაცხადა, რომ 15 აგვისტოს რუსეთში ჩავა.