კორონავირუსი: ტრამპი ჯანდაცვის მსოფლიო ორგანიზაციის წინააღმდეგ

აშშ-ის პრეზიდენტმა ჯანდაცვის მსოფლიო ორგანიზაცია ჩინეთისადმი სიმპათიის გამო გააკრიტიკა და პასუხიც მიიღო: „პანდემიის პოლიტიზება არ მოახდინოთ, თუ არ გსურთ მსოფლიოში მსხვერპლის გაზრდა“. 

წყარო – CNN

რამ აღაშფოთა ტრამპი

2020 წლის 8 აპრილს, პრესკონფერენციაზე, აშშ-ის პრეზიდენტმა მკაცრად გააკრიტიკა ჯანდაცვის მსოფლიო ორგანიზაცია კორონავირუსის პანდემიაზე მისი რეაქციის გამო.

„ნაკლები გარდაცვლილი იქნებოდა, მათ რომ სწორად გაეანალიზებინათ სიტუაცია“, – განაცხადა დონალდ ტრამპმა.

ტრამპის აზრით, ამ ორგანიზაციამ თავიდანვე ვერ შეაფასა ვირუსის გავრცელების საფრთხე. მაგალითად მან მოიყვანა ჯანდაცვის მსოფლიო ორგანიზაციის უარი, მხარი დაეჭირა მისი მოწოდებისთვის, ჩინეთთან სატრანსპორტო კავშირის შეზღუდვის შესახებ.

ასევე, ტრამპი ამტკიცებდა, რომ ჯანდაცვის მსოფლიო ორგანიზაცია „საეჭვო სიმპათიას გრძნობს ჩინეთის მიმართ“.

სასჯელის სახით, აშშ-ის პრეზიდენტი ამ ორგანიზაციის დაფინანსების შეჩერებით იმუქრება.

„ჩვენ ჯანდაცვის მსოფლიო ორგანიზაციას წელიწადში 450 მილიონ დოლარს ვაძლევთ, – განაცხადა მან, – ჩინეთი კი 42-ს. თუმცა, ყველაფერი ჩინეთის ინტერესებისთვის კეთდება. ეს არასწორია ჩვენთან და დანარჩენ მსოფლიოსთან მიმართებით“.

მოგვიანებით მან განაცხადა, რომ არ აპირებს დაფინანსების დაუყოვნებლივ შეჩერებას და „მხოლოდ განიხილავს ასეთ შესაძლებლობას“.

აშშ უკვე თითქმის ერთი თვეა, დიდი სხვაობით ლიდერობს მსოფლიოში კორონავირუსით ინფიცირებულთა რაოდენობით. 9 აპრილის მონაცემებით, ქვეყანაში 435 167 ადამიანია ინფიცირებული. მათგან 14 797 გარდაიცვალა.  

• პროგნოზი აშშ-ში მსხვერპლის შესაძლო რაოდენობის შესახებ: 100-დან 240 ათასამდე ადამიანი
• „გადაწყვიტო, ვინ უნდა იცოცხლოს და ვინ უნდა მოკვდეს – ის არ არის, რასაც მე მასწავლიდნენ“ – ნიუიორკელი ექიმის ისტორია 
• „მაგრამ ბიზნესს მაინც არ დავხურავთ“ – თურქეთი მსოფლიოში პირველ ადგილზეა კორონავირუსის გავრცელების ტემპით

ჯანდაცვის მსოფლიო ორგანიზაციის ხელმძღვანელის პასუხი

ერთი დღის შემდეგ, ჯანდაცვის მსოფლიო ორგანიზაციის გენერალური დირექტორი თედროს ღებრეიესუსი ტრამპის კრიტიკას გამოეხმაურა.

„გთხოვთ, კორონავირუსის გარშემო სიტუაციის პოლიტიზირება არ მოახდინოთ. თქვენ, მის ხარჯზე, შიდაპოლიტიკური ამოცანების გადაწყვეტას ცდილობთ. თუ გსურთ მეტი გარდაცვლილი – თქვენ სწორ გზაზე დგახართ“, – განაცხადა ღებრეიესუსმა.

მან გაიხსენა ჯანდაცვის მსოფლიო ორგანიზაციის ქმედებები კორონავირუსის გავრცელების ვითარებაში:

● 2020 წლის 1 იანვარს, ჯანდაცვის მსოფლიო ორგანიზაციამ ახალი კორონავირუსის საფრთხეზე განაცხადა. 

● 5 იანვარს გამოაქვეყნა ეპიდემიის საწინააღმდეგო რეკომენდაციები ჯანდაცვის მსოფლიო ორგანიზაციის წევრი ქვეყნებისათვის. 

● იანვრის ბოლოს, მიმდინარე პროცესს „მოსახლეობის ჯანმრთელობისთვის გლობალური საფრთხე უწოდა“ – ეს ორგანიზაციის კლასიფიკაციაში, განგაშის უმაღლესი დონეა. 

ფაქტების გადამოწმება

CNN-მა პრეზიდენტ ტრამპის ბრალდებების სისწორე გადაამოწმა. 

ჯანდაცვის მსოფლიო ორგანიზაციამ მართლაც არ დაუჭირა მხარი მის მოწოდებას ჩინეთთან სატრანსპორტო მიმოსვლის შეზღუდვის შესახებ. მაგრამ ეს ორგანიზაციის სტანდარტული პრაქტიკაა – ის სატრანსპორტო ბლოკადას არაეფექტურ ზომად მიიჩნევს.

ჯანდაცვის მსოფლიო ორგანიზაციას აკრიტიკებენ მედია და სპეციალისტები იმის გამო, რომ საკუთარ ანალიზში ისინი დაეყრდნენ ჩინეთის ხელისუფლების ოფიციალურ სტატისტიკას, რომელიც ნდობას არ იწვევს.

თუმცა, სწორედ ასეთი პრეტენზია არ წაუყენებია პრეზიდენტ ტრამპს.

რატომ არ რეაგირებდა ტრამპი ორი თვის განმავლობაში, საკუთარი მრჩევლებისა და დაზვერვის გაფრთხილებაზე?

აშშ-ის დაზვერვის სამსახურის წარმომადგენლები ამტკიცებენ, რომ ჯერ კიდევ 2020 წლის იანვრის დასაწყისში, მედიცინის სფეროში სპეციალური სადაზვერვო სააგენტო აფრთხილებდა პრეზიდენტ ტრამპს ჩინეთის ქალაქ უჰანში გავრცელებული ვირუსის საფრთხის შესახებ.

15 იანვარს, აშშ-ის პრეზიდენტის სპეციალურმა წარმომადგენელმა ვაჭრობის საკითხებში, ნავარომაც იგივე ინფორმაცია მიაწოდა ტრამპს.

ორივე ეს გაფრთხილება უგულებელყოფილი იყო.

ამერიკულ მედიაში გამოთქვამენ ვარაუდს, რომ აშშ-ის პრეზიდენტის პოზიციაზე გავლენა მოახდინა მისი მთავარი ბიზნესის – სასტუმროებისა და გოლფ-კლუბების ინტერესებმა, რომლებიც კარანტინის პირობებში დიდ ზარალს ნახულობს.