ენგურჰესი – უნიკალური ობიექტია. ჰესი პირდაპირ ქართულ-აფხაზური კონფლიქტის ზონაშია და ერთადერთი ქართულ-აფხაზური ერთობლივი პროექტია. სადგურის 270-მეტრიანი ბეტონის კაშხალი ოფიციალური თბილისის კონტროლირებად ტერიტორიაზეა, ხუთი გენერატორი კი – აფხაზების მიერ კონტროლირებადზე. მხარეები ერთობლივად მართავენ ჰესს და ინაწილებენ ელექტროენერგიას, რომელსაც ის აწარმოებს.
თბილისსა და სოხუმს შორის არსებული არაფორმალური შეთანხმებით, სადგურის მიერ გამომუშავებული ელექტროენერგიის 40 პროცენტს აფხაზეთი მოიხმარს, 60 პროცენტს კი – საქართველო. აფხაზეთი ფაქტობრივად მთლიანად ამ ელექტროენერგიაზეა დამოკიდებული.
