ევროკავშირის სპეციალური წარმომადგენელი სამხრეთ კავკასიაში: საით მიდიხარ, საქართველო?
ტოივო კლაარი რუსულ კანონზე
ევროკავშირის სპეციალური წარმომადგენელი სამხრეთ კავკასიასა და საქართველოში კრიზისის საკითხებში, ტოივო კლაარი სოციალურ ქსელში წერს, რომ “ჩვენი ურთიერთობა” საერთო ღირებულებებსა და ძლიერი სამოქალაქო საზოგადოების მხარდაჭერაზე დაფუძნებული უნდა იყოს, სადაც “ხალხის მტრების“ სიების და ანონიმური სატელეფონო ზარების ადგილი არ არის.
მისიve თქმით, დღევანდელი დღე, ევროპის დღე, ზეიმის მიზეზი უნდა იყოს, თუმცა საქართველოში განვითარებული მოვლენების გამო, მას გული სტკივა.
“საით მიდიხარ, საქართველო?” – წერს კლაარი.
Today should be cause for celebration. Yet my heart aches. Our relationship is supposed to be based on shared values and on support for a strong civil society where lists of “enemies of the people” and anonymous phone calls have no place. Quo vadis, Georgia? pic.twitter.com/rGYsmWKaEj
— Toivo Klaar (@ToivoKlaar) May 9, 2024
ძალადობების სერია რუსული კანონის მოწინააღმდეგე აქტივისტებზე
8 მაისის ღამეს თბილისში „აგენტების კანონის“ სულ მცირე სამ მოწინააღმდეგეს თავს დაესხნენ დაუდგენელი ჯგუფები და სცემეს.
ერთ-ერთია დიმიტრი ჩიქოვანი, ყველაზე რეიტინგული ოპოზიციური პარტიის, “ნაციონალური მოძრაობის”სამდივნოს წევრი. ჩიქოვანს თავს დაესხნენ თბილისის ცენტრალურ უბანში, სოლოლაკში, საკუთარი საცხოვრებელი კორპუსის სადარბაზოსთან.
8 მაისს თავს დაესხნენ ასევე საერთაშორისო ურთიერთობების ექსპერტს, “აგენტების კანონის” აქტიურ მოწინააღმდეგეს, გია ჯაფარიძე. ჯაფარიძე ოპოზიციური პარტიის, „გირჩი – მეტი თავისუფლების“ ლიდერის, ზურა ჯაფარიძის ძმაა.
იმავე ღამეს, 8 მაისის ღამეს ქუჩაში სცემეს „აგენტების კანონის“ კიდევ ერთი მოწინააღმდეგე აქტივისტს, ლაშა ღვინიანიძეს. ის ამ დროს მეგობართან ერთად იყო, რომელმაც ძალადობის ფაქტის მხოლოდ ფრაგმენტის გადაღება შეძლო.
ბოლო დღეებში პოლიტიკოსებსა და კრიტიკულად განწყობილ მოქალაქეებზე თავდასხმის ეს პირველი შემთხვევები არ არის.
7 მაისს უცნობი პირი ფიზიკურად დაესხა თავს ინფორმაციის თავისუფლების განვითარების ინსტიტუტის (IDFI) აღმასრულებელ დირექტორს, გიორგი კლდიაშვილსა და ტელეკომპანია ფორმულას გადამღებ ჯგუფს. თავდასხმა მოხდა დღისით, თბილისის ცენტრში – შვედეთის საელჩოს წინ.
5 მაისს, ლანჩხუთში, საკუთარი სახლის სადარბაზოსთან თავს დაესხნენ პედაგოგს, მასწავლებელთა ეროვნული ჯილდოს მფლობელს, ლადო აფხაზავას.
გარდა ფიზიკური ძალადობისა, ბოლო ორი დღეა “აგენტების კანონის” მოწინააღმდგეების მიმართ ხორციელდება ფსიქოლოგიური ძალადობა და მუქარა. “აგენტების კანონის” მოწინააღმდეგეებს ტელეფონზე ურეკავენ, აგინებენ და ემუქრებიან. ზარების სამიზნე ის ადამიანები არიან, რომლებიც ღიად და საჯაროდ გამოხატავენ პროტესტს ხელისუფლების მიერ ინიციირებული “აგენტების კანონის” წინააღმდეგ. უცნობი პირები მათ ურეკავენ, აგინებენ, ემუქრებიან, ეუბნებიან, რომ იციან მათი სახლის მისამართი.
