"თითქმის ჩვენიანი." როგორ უყურებენ ოსები იმას, რომ მიხეილ ყაველაშვილი საქართველოს პრეზიდენტი გახდება?
მიხეილ ყაველაშვილი
სოციალური ქსელების ოსური სეგმენტის მომხმარებლები აქტიურად გამოეხმაურნენ ინფორმაციას იმის შესახებ, რომ საქართველოს ახალი პრეზიდენტი სპარტაკ-ალანიას ყოფილი თავდამსხმელი მიხეილ ყაველაშვილი გახდება.
“სპარტაკ-ალანია” ჩრდილოეთ ოსური (ვლადიკავკაზის) კლუბია, სადაც ყაველაშვილმა 1995 წელს (ანუ ქართულ-ოსური კონფლიქტის დაწყების შემდეგ) 24 მატჩი ჩაატარა თავდამსხმელის პოზიციაზე და 12 გოლი გაიტანა. 2004 წელს ყაველაშვილი ალანიაში ექვსი თვით დაბრუნდა. ამდენად ოსები მას გარკვეულწილად „თავისიანად“ მიიჩნევენ.
საქართველოს პრეზიდენტობის კანდიდატად მიხეილ ყაველაშვილის 27 ნოემბერს “ქართული ოცნების” დამფუძნებელმა და საპატიო თავმჯდომარემ, ბიძინა ივანიშვილმა განაცხადა.
საქართველოში მისი კანდიდატურით არავინ აღფრთოვანებულა. ოპოზიცია და სამოქალაქო საზოგადოება ამ ეტაპზე “ქართული ოცნების” მოიშორებისთვის იბრძვიან.
მიხეილ ყაველაშვილის კანდიდატად წარდგენის შესახებ ცნობა სწრაფად გავრცელდა ოსურ ტელეგრამის არხებზე და დაიწყო დისკუსია იმაზე, თუ როგორ შეიძლება ამან თეორიულად იმოქმედოს ქართულ-ოსური კონფლიქტის მოგვარებაზე.
ჩრდილოეთ ოსეთის ერთ-ერთმა ყველაზე პოპულარულმა ტელეგრამ-არხმა ყაველაშვილს ფოტო დაიჯესტი მიუძღვნა, სადაც დეტალურად აღწერდა მის კარიერას ალანიაში.
ამ პოსტის კომენტარებში მომხმარებლის მოსაზრებები გაიყო.
ზოგს ფიქრობდა, რომ ოსებმა ყაველაშვილს უნდა უგულშემატკივრონ:
“ოსეთი ხმას აძლევს ყაველაშვილს!”
“ის თამაშობდა ჩვენს ალანიაში”.
“თუ ალანიაში თამაშობდა, ალბათ ესმის და პატივს სცემს ოს ხალხს”.
სხვები, პირიქით, ვერ ხედავდნენ აღფრთოვანების საფუძველს:
„ტყუილად არ მოჰყავთ [საქართველოში] ასეთი ახალგაზრდები ხელისუფლებაში, მით უმეტეს, ფეხბურთელები. ისინი არცთუ ისე განათლებულები არიან, გამოცდილების გარეშე და მათი მართვა მარტივია”.
რეალურად, მიხეილ ყაველაშვილი არც ისე ახალგაზრდაა პრეზიდენტობისთვის – ის 53 წლისაა. თუმცა, ასაკის მიუხედავად, მას რეალურად უმაღლესი განათლება არ აქვს. ამაზე სარკასტული ხაზგასმით მიუთითებენ მისი კრიტიკოსები საქართველოში.
რაც შეეხება ოს პოლიტიკოსებს, მათი დამოკიდებულება ყაველაშვილის შესაძლო პრეზიდენტობის მიმართ გაცილებით რაციონალურია. ისინი ეთანხმებიან მოსაზრებას, რომ საქართველოს ხელისუფლება შეეცდება ყოფილი ფეხბურთელის „რბილ ძალად“ გამოიყენოს.
ერთ-ერთი დეპუტატი სამხრეთ ოსეთიდან, რომელმაც ანონიმურად დარჩენა ისურვა, მიიჩნევს, რომ „ქართული ოცნების“ მიერ ყაველაშვილის წარდგენა სულაც არ ნიშნავს მის „შუამავლობას“ ოსებთან მოლაპარაკებებში, მაგრამ ასევე ის ფაქტი, რომ ჩრდილოეთ ოსეთში მას იცნობენ და ახსოვთ, არ შეიძლება არ იყოს გასათვალისწინებელი:
„ვლადიკავკაზსა და ცხინვალში მას საკმაოდ ბევრი კავშირი აქვს „ალანიას“ ყოფილ ფეხბურთელებთან, რომლებიც ახლა საჯარო სივრცეში არიან. შესაძლოა, ქართველმა ფეხბურთელმა რაიმე სახის ჰუმანიტარული კონტაქტების დამყარება დაიწყოს“.
თუმცა, დეპუტატის თქმით, რაც არ უნდა კარგი ურთიერთობა ჰქონდეს ყაველაშვილს ყოფილ თანაგუნდელებთან, ეს მნიშვნელოვნად ვერ იმოქმედებს მთლიანად ქართულ-ოსურ ურთიერთობებზე.
„ეს უკვე სხვა თაობაა. დღევანდელმა ახალგაზრდობამ ისე კარგად არ იცის და არ ახსოვს მაშინდელი “ალანიას” შემადგენლობა. ზემოქმედება მინიმალური იქნება, მაგრამ ვფიქრობ, ისინი (ქართველები) გამოიყენებენ ამას“.
ამასობაში მიხეილ ყაველაშვილმა უკვე მოასწრო ეთქვა, რომ ქართული ოპოზიცია თითქოს “სერიოზულ პროვოკაციებს ამზადებს სამხრეთ ოსეთისა და აფხაზეთის მიმართულებით”.
საპრეზიდენტო არჩევნები საქართველოში 14 დეკემბერს გაიმართება. ეს იქნება პირველი არჩევნები ქვეყნის ისტორიაში, როდესაც პრეზიდენტს ხალხი კი არა, 300 წევრისგან შემდგარი სპეციალური საბჭო აირჩევს.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
