საქართველო: ტესტირების სამიზნე ჯგუფს სატვირთო მანქანების მძღოლებიც დაემატებიან

ახალი კორონავირუსის გავრცელების პრევენციის მიზნით, ტესტირების სამიზნე ჯგუფს სატვირთო მანქანების მძღოლებიც დაემატებიან. 

21 მაისის მონაცემებით, საქართველოში კორონავირუსით ინფიცირების 721 შემთხვევაა დადასტურებული. კარანტინის რეჟიმშია 3519 ადამიანი, ხოლო სტაციონარში მეთვალყურეობის ქვეშ – 351 პირი. კორონავირუსით ინფიცირებულთაგან 485 გამოჯანმრთელდა და 12 გარდაიცვალა.

აუცილებელ ტესტირებას გაივლიან მხოლოდ ის მძღოლები, რომლებიც საქართველოში რჩებიან. მძღოლებს, რომლებიც საქართველოს გავლით რომელიმე სხვა ქვეყანაში მიდიან, კორონავირუსზე ტესტს არ გაუკეთებენ. 

საქართველოში გამოვლენილი covid-19-ის ბოლო 2 ახალი შემთხვევა სწორედ სატვირთო მანქანების მძღოლებს უკავშირდება. ზუგდიდში დაინფიცირებული 42 წლის მამაკაცი ტრაილერის მძღოლია. სატვირთო მანქანის მძღოლია 29 წლის ზესტაფონელი მამაკაციც, რომელიც საქართველოში სომხეთიდან დაბრუნდა. 

• მთავრობის ანტიკრიზისული გეგმა – ვინ რა დახმარებას მიიღებს
• როგორ აპირებს საქართველოს ხელისუფლება სოფლის მეურნეობის გადარჩენას
• 1 ივლისს საქართველოში ტურიზმი თავიდან იწყება? საუბარი მაია სიდამონიძესთან
• “კამერა გამოვრთე, ვითომ ინტერნეტმა გაჭედა” – ბავშვები ჰყვებიან, როგორ სწავლობენ და ცელქობენ ონლაინ-გაკვეთილებზე

დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, დღეში დაახლოებით 300-მდე მძღოლს გაუკეთდება ტესტი. 

“ეს საჭიროა, რათა თავიდან ავიცილოთ რისკი, რადგან ჩვენს ირგვლივ ქვეყნებში, რომლებთანაც ჩვენ სახმელეთო საზღვარი გვაქვს, რუსეთი, სომხეთი, აზერბაიჯანი და თურქეთი, სიტუაცია არასახარბიელოა“, – განაცხადა გამყრელიძემ.

ერთი კვირის შემდეგ ტესტირების სამიზნე ჯგუფს ფარმაცევტები და სტომატოლოგები დაემატებიან. 

პარასკევიდან კი ბოლნისისა და თელავის მუნიციპალიტეტებში კორონავირუსზე მოსახლეობის კვლევა დაიწყება.

კვლევა, რომლის მთავარი მიზანიც მოსახლეობაში კორონავირუსის გავრცელების დონის შესწავლაა, შემთხვევითი შერჩევის პრინციპით, 22-27 მაისის პერიოდში ჩატარდება. 

ბოლნისი ამ დროისთვის კორონავირუსის პანდემიის გავრცელების თვალსაზრისით ერთ-ერთი ყველაზე დაზიანებული რაიონია საქართველოში – ამ მუნიციპალიტეტში covid-19-ის 156 შემთხვევაა გამოვლენილი. თელავი კი მწვანე ზონაა – იქ ამ დრომდე კორონავირუსით ინფიცირების არცერთი შემთხვევა არ გამოვლენილა. 

“ამ კვლევებზე იქნება დამოკიდებული, რა დამატებითი ღონისძიებები შეიძლება დაიგეგმოს ბოლნისში“, – ამბობს გამყრელიძე.

ტესტირება სწრაფი, ანტიგენზე და ანტისხეულზე დამყარებული ტესტებით ჩატარდება. 

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.