თენგიზ ცერცვაძე: როგორც ჩანს, კოვიდი კიდევ დიდხანს დარჩება ჩვენთან
ინფექციური საავადმყოფოს კლინიკური დირექტორის, თენგიზ ცერცვაძის თქმით, მოსახლეობაში აცრების რაოდენობამ საგრძნობლად იკლო და აქედან გამომდინარე, სავარაუდოა, რომ კოვიდი კიდევ დიდხანს დარჩება ჩვენთან. ცერცვაძე ამბობს იმასაც, რომ შემთხვევების რაოდენობამ ბოლო დღეებში იმატა, რაც შეიძლება მივიჩნიოთ მეხუთე ტალღის დასაწყისად.
მისივე განმარტებით, სახელმწიფომ ყველაფერი გააკეთა, რომ დღეში 30-40 ათასი ვაქცინა გაკეთდეს, თუმცა საქართველოს მოსახლეობა არაფერს აკეთებს იმისთვის, რომ გარდაცვალების შემთხვევები შემცირდეს ხუთჯერ მაინც.
“მთელ მსოფლიოში გულის ტკივილით და შურით ვუყურებ იმათ, ვინც მოახერხა 2/3-ზე მეტის ორჯერადად აცრა. ეს ისე ძალიან არ მოქმედებს შემთხვევების შემცირებაზე, როგორც სიკვდილობის შემცირებაზე. ზოგიერთ ქვეყანამ სამჯერადადაც კი აცრა. საქართველოში სიკვიდილობა შევამცირეთ 30-მდე, რაც ჩვენთვის მაინც ბევრია. ჩვენ, რომ გვქონდეს ვაქცინაციის ის დონე, რაც აქვს ევროპის ყველა ქვეყანას, ამერიკას, აზიის განვითარებულ ქვეყნებს, ჩვენთან სიკვდილობა დღეში 5-6-ზე მეტი არ იქნებოდა”, – ამბობს ცერცვაძე.
ცერცვაძემ ხაზი გაუსვა იმასაც, რომ რომ იმ პირობებში, როდესაც ქვეყანას აქვს ორი მილიონი ვაქცინა და როდესაც არსებობს ვაქცინაციის მაქსიმალური ხელმისაწვდომობა – ცენტრები, ავტობუსები, ბინაზე ვაქცინის შეთავაზება და ამ პირობებში მხოლოდ 7-8 ათასი აცრა კეთდება დღეში, ეს იქნება ქვეყნისთვის კატასტროფული შედეგის მომტანი:
“ვერანაირი შეზღუდვა ვერ აგვაცილებს თავიდან შემდგომ მძიმე ტალღებს, საუბარი არ არის მხოლოდ მეხუთე ტალღაზე.”
ინფექციური საავადმყოფოს დირექტორის თქმით, მისთვის გაუგებარია, თუ რატომ არ იცრებიან პედაგოგები.
“ორი აზრიც არ არსებობს, რომ გადამწყვეტია მშობლების, სკოლებისა და ინსტიტუტების პერსონალის აცრა. ბევრმა ქვეყანამ შემოიღო პედაგოგების სავალდებულო აცრა. ჩვენთან იყო ამის მცდელობა, მოისინჯა აზრი, თუმცა პედაგოგების დიდმა ნაწილმა მკვეთრი პროტესტი განაცხადა – ეს დაუშვებელია, არაჯანსაღი მიდგომაა. არ შეიძლება არ გვინდოდეს კოვიდის გავრცელება, არ გვინდოდეს გარდაცვალების მაღალი რიცხვი და მეორე მხრივ, კატეგორიულად არაფერს ვაკეთებდეთ. არ მესმის იმ პედაგოგების, რომლებიც უარს ამბობენ ვაქცინაციაზე და ამით საფრთხის ქვეშ აყენებენ თავიანთ აღსაზრდელებს. აგრეთვე იმ მშობლების, რომლებსაც სახლში ჰყავთ ბავშვები ან ასაკოვნები და არ ზრუნავენ ვაქცინაციაზე”, – აცხადებს თენგიზ ცერცვაძე.
● საქართველოში 50 წლის ზემოთ მოქალაქეებს მესამე დოზით აცრიან. ვის ეკუთვნის “ბუსტერი”
● საქართველოს კლინიკების ასოციაცია: ლეტალობის ასეთი მაჩვენებელი კატასტროფულია
● ამირან გამყრელიძე: საბჭოზე ექიმები უმცირესობაში ვართ, პოლიტიკა უფრო მაღლა დადგა
საქართველოში კორონავირუსის საწინააღმდეგო ვაქცინაცია დაიწყო 15 მარტს. ბოლო დროს, ვაქცინაციის ტემპი საგრძნობლად დაეცა. თუ აგვისტოს ბოლოს დღეში 20 ათასზე მეტი ადამიანი იცრებოდა, ბოლო პერიოდში დღეში საშუალოდ 8 ათასი დოზა ვაქცინა კეთდება.
რამდენიმე დღის წინ, დაავადებათა კონტროლის ცენტრმა 50 წლის ზემოთ მოქალაქეებისთვის მესამე დოზით, ე.წ. ბუსტერით აცრა დაუშვა.
როგორც ჯანდაცვის მინისტრის მოადგილე თამარ გაბუნიამ განმარტავს, ბუსტერ დოზის გაკეთება შეუძლიათ შემდეგ ჯგუფებს, რომელთა მეორე დოზის აცრიდან გასულია მინიმუმ 6 თვე;
● 50 წელს გადაცილებული მოქალაქეებს;
● ქრონიკული დაავადებების მქონე ნებისმიერი ასაკის პირებს;
● სამედიცინო პერსონალს
● სხვა მაღალი რისკის პროფესიების ადამიანებს;
● დახურული დაწესებულებების თანამშრომლებს და იქ მცხოვრებ ადამიანებს;
ბუსტერს გაუკეთებენ ასევე უკვე აცრილ მოქალაქეებსაც, რომლებიც სამოგზაუროდ მიდიან.
12 ოქტომბრის მონაცემებით, საქართველოში 1 874 845 დოზა ვაქცინა გაკეთდა. სულ მცირე 1 დოზით ვაქცინირებულია 1 000 785 ადამიანი – მოზრდილი მოსახლეობის 35.2 %; სრულად ვაქცინირებულია 874 060 ადამიანი – მოზრდილი მოსახლეობის 30.6 %.
