აგვისტოს ომი, ვარდების რევოლუცია, ჩორჩანა და კახა ბენდუქიძე - გამოქვეყნდა თეა წულუკიანის საპარლამენტო კომისიის დასკვნა
თეა წულუკიანის საპარლამენტო კომისია
საქართველოს პარლამენტში თეა წულუკიანმა მისი კომისიის ანგარიშის წარდგენის დროს 2008 წლის ომზე საუბრისას თქვა, რომ ქართული ჯარი სამხედრო საქმისგან შორს მყოფი პოლიტიკოსების ომში აღმოჩნდა, რომელმაც გარე ძალების დახმარების იმედით და ქართველი სამხედროების აზრის უგულებელყოფით ქალაქ ცხინვალზე შეტევა განახორციელეს.
მისივე თქმით, დასკვნაში ფაქტებით და ინფორმაციებით, შესწავლილი და ნათქვამია ის, რომ “ვარდების რევოლუცია” იყო სინამდვილეში სახელმწიფო გადატრიალება.
წულუკიანმა პლენარულ სხდომაზე გიორგი გახარიას შს მინისტრობის დროს, 2019 წელს საოკუპაციო ხაზთან, ჩორჩანაში აგებული საგუშაგოს შესახებაც ისაუბრა. წულუკიანის თქმით, კომისიის მუშაობის დროს დადგინდა, რომ გახარიას მიერ “ერთპიროვნულად მიღებული” გადაწყვეტილების შედეგად “საქართველოს ტერიტორიული მთლიანობა კვლავ დაირღვა”.
ამასთან, წულუკიანმა ისაუბრა კახა ბენდუქიძეზეც. მისი მტკიცებით, საქართველოს ეკონომიკის ყოფილმა მინისტრმა სასოფლო-სამეურნეო უნივერსიტეტის ქონება მიისაკუთრა.
დროებითი საგამოძიებო კომისია “ქართული ოცნების” პარლამენტში 2025 წლის 5 თებერვალს შეიქმნა. კომისიის მიზანი წინა ხელისუფლების, “ერთიანი ნაციონალური მოძრაობის” საქმიანობის შესწავლაა. კომისიას “ქართული ოცნების” დეპუტატი, თეა წულუკიანი ხელმძღვანელობდა.
კომისია სხდომაზე იბარებდა პოლიტიკოსებს და მათ დაკითხვას პირდაპირ ეთერში გადასცემდა. მის წინააღმდეგ, ვინც კომისიაზე არ მივიდა, დაიწყო გამოძიება სისხლის სამართლის კოდექსით (349-ე მუხლი).
“საქართველოს პარლამენტის დროებითი საგამოძიებო კომისიის მოთხოვნის შეუსრულებლობა” ისჯება ჯარიმით ან ერთ წლამდე ვადით თავისუფლების აღკვეთით. ამავე დროს, ასეთ პირებს ეკრძალებათ თანამდებობის დაკავება სამ წლამდე ვადით.
“ქართული ოცნების” ხელისუფლებამ ერთ თვეში ექვსი ოპოზიციონერი ლიდერი გაუშვა ციხეში. ყველა მათგანს პარლამენტში შექმნილ “ქართული ოცნების” საგამოძიებო კომისიაზე მიუსვლელობას ედავებიან. ამ კომისიას, ისევე როგორც პარლამენტს, ოპოზიცია არალეგიტიმურად მიიჩნევს და არ აღიარებს.
რა თქვა თეა წულუკიანმა
აგვისტოს ომზე
“ნაციონალურმა მოძრაობამ” და მიხეილ სააკაშვილმა რუსეთს შეუქმნეს ის სამართლებრივი საბაბი, რაც რუსეთმა სათავისოდ და საქართველოს საზიანოდ, საქართველოს ტერიტორიული მთლიანობის დარღვევისთვის 2008 წელს გამოიყენა. საგამოძიებო კომისიის წინაშე მოწვეულმა კოდორელებმა, რომლებიც სხვადასხვა პოზიციაზე მუშაობდნენ ან ხეობის მკვიდრნი იყვნენ და ხელში იარაღით იცავდნენ საქართველოს ტერიტორიულ მთლიანობას სახელმწიფოს მხრიდან ხეობაში ნაციონალური მოძრაობის მიერ ჯერ კიდევ 2006 წლიდან დაგეგმილი ღონისძიებები შეაფასეს როგორც განზრახი ქმედება, რომელიც ხეობის მოსახლეობისგან დაცლას და რუსეთისთვის გადაბარებას ისახავდა მიზნად.
საკუთრივ 2008 წლის აგვისტოს ომის დღეებთან დაკავშირებით გამოკითხულ პირთა მიერ მოწოდებული ინფორმაცია ცხადყოფს, რომ თავდაცვის მინისტრმა, დავით კეზერაშვილმა და შს მინისტრმა, ვანო მერაბიშვილმა, რომელთაც არანაირი სამხედრო განათლება და გამოცდილება არ გააჩნდათ 2008 წლის 6 აგვისტოს, მიხეილ სააკაშვილთან შეთანხმებით, უარყვეს სამხედრო პირებისგან შემუშვებული სამოქმედო გეგმა. სამხედრო პირთა მიერ დასამტკიცებლად წარდგენილ სამოქმედო გეგმაში პოლიტიკოსების მიერ შეტანილი ცვლილებების მიზანშეწონილება და ამ ცვლილებების შედეგად განხორციელებული ქმედებები მრავალ კითხვას აჩენს და საჭიროებს თავდაცვის სისტემის წარმომადგენელთა მიერ დამატებით ანალიზსს.
საგამოძიებო კომისიის მიერ გამოკითხულ პირთა მიერ მოწოდებული ცნობებიდან – გენერალი გოგავა, გენერალი ყურაშვილი, გენერალი ბალახაძე, შინაგან საქმეთა მინისტრ ვანო მერაბიშვილის მოადგილე შალვა ჯანაშვილი, სამხედრო ექიმი ლაშა ქოიავა და სხვები – ცალსახად იკვეთება, რომ 2008 წლის აგვისტოში ქართული ჯარი სამხედრო საქმისგან შორს მყოფი პოლიტიკოსების ომში აღმოჩნდა, რომელმაც გარე ძალების დახმარების იმედით და ქართველი სამხედროების აზრის უგულებელყოფით ქალაქ ცხინვალზე შეტევა განახორციელეს და საომარ მოქმედებათა ძირითად მიმართულებად სწორედ ეს მიმართულება განსაზღვრეს. ამასთან ერთად, საგამოძიებო კომისიის მიერ დადგენილ იქნა, რომ ზემოხსენებულ პოლიტიკოსების გადაწყვეტილებით, ძირითად მიმართულებაზე ანუ ცხინვალზე, როგორც ისინი უწოდებენ, სამხედრო ამოცანის შესრულება დაევალა არა თავდაცვის შეიარაღებულ ძალებს, არამედ შსს-ს, რამაც თავდაცვის ძალებში დეზორიენტაცია, ხოლო სამოქალაქო მოსახლეობაში გაურკვევლობა და დაუცველობა გამოიწვია”. – თქვა წულუკიანმა.
ვარდების რევოლუციაზე
“თქვენ წინაშე არის დასკვნა, რომელიც სანდო ფაქტებითა და ინფორმაციებით არის სავსე. ჩემი სურვილი იქნებოდა, განათლების სამინისტრომ ეს დასკვნა განიხილოს, თუმცა ეს არ არის ოფიციალური რეკომენდაცია, ჩემს აზრს ვამბობ ამ შემთხვევაში და საქართველოს ისტორიის სასწავლო წიგნებში ალბათ უნდა გადაისინჯოს 2004-2012 წლის პერიოდი, როგორ არის მიტანილი ახალგაზრდებამდე. იმიტომ რომ პრაქტიკულად დარწმუნებულიც ვარ, ის რაც ამ დასკვნაში წერია ახალგაზრდა თაობამ საერთოდაც არ იცის, რაც თავისებური ტრაგედიაა.
დასკვნაში ფაქტებით და ინფორმაციებით, შესწავლილი და ნათქვამია ის, რომ ვარდების რევოლუცია იყო სინამდვილეში სახელმწიფო გადატრიალება.”
ჩორჩანაზე
“როგორც საგამოძიებო კომისიის მუშაობის შედეგად გამოიკვეთა, 2008 წლის ომის შემდგომ პერიოდში საქართველოს ტერიტორიული მთლიანობა კვლავ დაირღვა, 2019 წელს, ჩორჩანაში გახარიას მიერ საგუშაგოს აღმართვასთან დაკავშირებით ერთპიროვნულად მიღებული გადაწყვეტილების შედეგად.
ჩორჩანას საგუშაგოს აღმართვის საკითხზე საგამოძიებო კომისიის დადგენილი ფაქტები ერთობლიობაში აჩენს არაერთ ლეგიტიმურ კითხვას იმასთან დაკავშირებით, ხომ არ ჰქონდა კვლავაც ადგილი საქართველოში ცეცხლის კერის ხელოვნურად გაჩენის მცდელობას, როგორც ეს მოხდა 2008 წელს და რა როლს ასრულებდა მოვლენების განვითარებაში თავად ყოფილი შინაგან საქმეთა მინისტრი, ასევე ეროვნული უსაფრთხოების საბჭოს აპარატის უფროსი კახაბერ ქემოკლიძე.” – თქვა წულუკიანმა.
კახა ბენდუქიძეზე
“შევისწავლეთ აგრარული უნივერსიტეტის საქმე, სადაც გამოიკვეთა, რომ “ნაციონალური მოძრაობის” ერთ-ერთი ლიდერი, კაცი, რომელიც ყველაფერს ყიდდა სინდისის გარდა, ბატონი ბენდუქიძე, აღმოჩნდა აურაცხელი, დიდი ქონების პატრონი, რომელიც თავის დროზე, სასოფლო-სამეურნეო უნივერსიტეტს ეკუთვნოდა” – განაცხადა თეა წულუკიანმა.
წულუკიანმა ასევე ისაუბრა, საქართველოს უნივერსიტეტზე, მისი თქმით, შეისწავლეს საქართველოს ტექნიკური უნივერსიტეტის ქონებრივი უფლებების დარღვევის საქმე:
“ეს ის სახელმწიფო ქონებაა, რომელიც სააკაშვილისა და მისი გარემოცვის წყალობით, ხელში ჩაიგდო მისმა დედამ, ქალბატონმა გიული ალასანიამ.”
2007 წლის ბოლოს კახა ბენდუქიძემ “ცოდნის ფონდი” შექმნა, დააფუძნა თავისუფალი უნივერსიტეტი, მოგვიანებით კი “ცოდნის ფონდის” მმართველობაში გადავიდა აგრარული უნივერსიტეტიც.
2007-2012 წლებში “ცოდნის ფონდმა” უმაღლესი განათლების სფეროში 50 მილიონ ამერიკულ დოლარზე მეტი საქველმოქმედო ინვესტიცია განახორციელა ფონდის დამფუძნებელი, რეფორმატორი კახა ბენდუქიძე 2014 წლის 13 ნოემბერს გარდაიცვალა.
