თბილისში ოპოზიციის ხალხმრავალი აქცია მიმდინარეობს. მთავარი მოთხოვნები უცვლელია
საქართველოს დედაქალაქში, თბილისში, რუსთაველის გამზირზე ოპოზიციის მასშტაბური აქცია მიმდინარეობს.
აქციის მონაწილეები იქამდე არ აპირებენ დაშლას, ვიდრე მიხეილ სააკაშვილს გორის სამხედრო ჰოსპიტალში არ გადაიყვანენ.
მიხეილ სააკაშვილის გორის ჰოსპიტალში გადაყვანის შესახებ აქციის დაწყების პარალელურად გახდა ცნობილი.
სპეციალურ ბრიფინგზე, რომელიც იუსტიციის სამინისტროში ზუსტად აქციის დაწყების დროს, 15:00 საათზე დანიშნეს, იუსტიციის მინისტრმა განაცხადა, რომ მიხეილ სააკაშვილს გორში, გიორგი აბრამიშვილის სახელობის, თავდაცვის სამინისტროს სამხედრო ჰოსპიტალში სთავაზობენ გადაყვანას.
“ეს არის ადგილი, სადაც მისი ჯანმრმთელობა და უსაფრთხოება სახელმწიფოს მხრიდან მაქსიმალურად იქნება დაცული“, – განაცხადა მინისტრმა და იქვე დაამატა, რომ ეს მოხდება იმ პირობით, თუ ოპოზიცია გორის ჰოსპიტალთან აქციებს არ გამართავს.
მინისტრის შეთავაზებიდან ორი საათი გავიდა. სააკაშვილი ჯერ ისევ გლდანის ციხის სამკურნალო დაწესებულებაში იმყოფება.
“ერთიანი ნაციონალური მოძრაობის” ერთ-ერთმა წევრმა ეკა ხერხეულიძემ თქვა, რომ წინა გამოცდილებიდან გამომდინარე (რუსთავის ციხიდან მოტყუებით გადმოყვანა), მიხეილ სააკაშვილი გადაყვანას თანმხლები პირების, მისი ადვოკატების გარეშე, არ დასთანხმდება.
ფოტო: ბაშირ კიტაჩაევი/JAMnews
“ერთიანი ნაციონალური მოძრაობის” ლიდერმა ნიკა მელიამ აქციაზე თქვა, რომ ისინი დაელოდებიან ვიდრე ხელისუფლება პირობას არ შეასრულებს.
„მე აქ დღეს კონკრეტული გეგმით ვარ წარმოდგენილი, რომელიც უნდა გამეცნო თქვენთვის. გეგმა, რომელიც იქნებოდა სისრულეში მოყვანილი უმწვავესი, მაგრამ არაძალადობრივი ფორმით. გზაში დაგვაწიეს ცნობა, რომ მიხეილ სააკაშვილს გადაიყვანენ გორის ჰოსპიტალში. რა თქმა უნდა, გორის ჰოსპიტალში გადაყვანა რომ სდომოდათ, გლდანში კი არ გადაიყვანდნენ, სადაც არანაირი სამკურნალო შესაძლებლობა არ არსებობს, რაც სამმა სხვადასხვა კონსილიუმმა დაამტკიცა, მაგრამ თქვენმა არაძალადობრივმა ბრძოლამ გამოიწვია ის, რომ საერთაშორისო საზოგადოება საათობრივად აკეთებს მხარდასაჭერს განაცხადებს. რომ არა ეს ბრძოლა, არცერთი განცხადება დღეს არ გაკეთდებოდა“, – განაცხადა ნიკა მელიამ.
ფოტო: ბაშირ კიტაჩაევი/JAMnews
მელიას კონკრეტულ გეგმებზე, რას გეგმავდნენ ამ გადაწყვეტილებამდე, ან რა იქნება ახლა, არ უსაუბრია. თუმცა, თქვა, რომ ის რასაც დღეს გააკეთებდნენ, მთელი მსოფლიოს ყურადღებას მიიპყრობდა.
“სანამ ფიზიკურად არ იქნება გადაყვანილი საავადმყოფოში, ჩვენ არ უნდა დავიშალოთ. დავრწმუნდეთ რომ მიხეილ სააკაშვილის სიცოცხლეს საფრთხე აღარ ემუქრება და ამის შემდეგ სხვა გეგმებზე ვისაუბრებთ“ , – განაცხადა მელიამ.
ფოტო: ბაშირ კიტაჩაევი/JAMnews
ოპოზიცია ბრძოლას, რომელსაც პერმანენტული აქციების სახე აქვს, არ წყვეტს.
“ერთიანი ნაციონალური მოძრაობის” ერთ-ერთმა წევრმა, გიგი უგულავამ, აქციაზე სიტყვით გამოსვლისას განაცხადა, რომ საბოლოო მიზანი რიგგარეშე არჩევნები და პატიმარი სააკაშვილის გათავისუფლებაა.
მიხეილ სააკაშვილი უკვე 50 დღეა შიმშილობს. გუშინ, 18 ნოემმბერს, პატიმარმა პრეზიდენტმა, რომელიც გლდანის მე-18 სამკურნალო დაწესებულებაში იმყოფება, გონება დაკარგა.
გუშინვე მიხეილ სააკაშვილი მოინახულეს წამების მსხვერპლთა რეაბილიტაციის ცენტრ ემპათიას პრეზიდენტმა მარიამ ჯიშკარიანმა და სახალხო დამცველის მიერ შექმნილმა ექსპერტთა ჯგუფმა.
მათ ხელისუფლებას კიდევ ერთხელ მოუწოდეს მიხეილ სააკაშვილის მრავალპროფილურ კლინიკაში გადაყვანის შესახებ, იმ არგუმენტით, რომ ყოფილი პრეზიდენტის მდგომარეობა იყო “კრიტიკულად მწვავე”.
სააკაშვილის მდგომარეობის დამძიმებას არაერთი განცხადება მოჰყვა. მათ შორის, აშშ-ს სახელმწიფო დეპარტამენტიდან.
ამერიკის სახელმწიფო დეპარტამენტის პრესსპიკერმა ნედ პრაისმა მოუწოდა საქართველოს მთავრობას, გაითვალისწინოს ომბუდსმენის რეკომენდაციები და მოეპყრას სააკაშვილს სამართლიანად და ღირსეულად.
დღეს, 19 ნოემბერს, მიხეილ სააკაშვილის მრავალპროფილურ კლინიკაში გადაყვანის მოთხოვნით ხელისუფლებას წერილი გაუგზავნა სახელმწიფო ინსპექტორის აპარატმა.
“დროას” ლიდერმა ელენე ხოშტარიამ კი, რომლის ჯანმრთელობის მდგომარეობა ასევე არის დამძიმებული, განაცხადა, რომ უარს ამბობს მედიკამენტების მიღებაზე იქამდე, ვიდრე სააკაშვილს არ გადაიყვანენ მრავალპრფილურ კლინიკაში.
