თამაში “წარსულში”, რომელიც ქართველი ქალების უცნობ ისტორიებს გვაცნობს
“წარსულში” ასე ქვია ორი მეგობრის მიერ შექმნილ ახალ საგანმანათლებლო თამაშს, რომელიც XIX-XX საუკუნეების საქართველოში გვამოგზაურებს და ქალთა უცნობ ისტორიებს გვაცნობს.
ციფრული Escape Room-ის ტიპის თამაში “წარსულში”, რომელიც მურთაზ ბოლქვაძემ და სალომე კვირიკაშვილმა სულ ცოტა ხნის წინ შექმნეს, გვაცნობს გასული საუკუნეების საქართველოს და ამ პერიოდში მოღვაწე ქართველი ქალების ისტორიებსა და პარალელურად მიმდინარე მნიშვნელოვან მოვლენებს აღმოგვაჩენინებს.
“წარსულში” ქალების, ფემინიზმისა და ისტორიულ-კულტურული მახსოვრობის თემატიკაზეა შექმნილი და მოთამაშეებს ოთხ ენაზე შეუძლიათ მისი თამაში (ქართული, ინგლისური, სომხური, აზერბაიჯანული).
თამაშის შემქმნელებმა გადაწყვიტეს უცნობი და დავიწყებული ისტორიები გაეცოცხლებინათ და რაც შეიძლება მეტი ადამიანისთვის, სახალისო და საინტერესო მეთოდით მიეწოდებინათ მე-19 საუკუნეში მცხოვრები ორი ქალის, კატო მიქელაძისა და ბარბარე ჯორჯაძის უცნობი ისტორიები.
“ჩვენ გადავწყვიტეთ, რაც შეიძლება მეტ ადამიანს გავაცნოთ ქართველი ქალები, რომლებიც საუკუნეების წინ პროგრესული იდეებით გამოირჩეოდნენ და აქტიურად იბრძოდნენ თავისუფლებისთვის, თანასწორობისა და დასავლური ღირებულებებისთვის. “წარსულში”-ს მოთამაშეებს შეუძლიათ აღმოაჩინონ საოცარი ქალების ისტორიები, გაიგონ მეტი მათი ცხოვრების, ეპოქის პარალელებისა და გამოწვევების შესახებ, რომლებიც უნდა გადალახონ თავსატეხების ამოხსნისა და საინტერესო მისიების შესრულებით და გადავიდნენ თამაშის მომდევნო ეტაპებზე.
იმედი გვაქვს, რომ თამაშს აქტიურად გამოიყენებენ ადამიანის უფლებათა ტრენერები და მასწავლებლები როგორც ფორმალურ, ისე არაფორმალურ საგანმანათლებლო სივრცეში”, – ამბობენ თამაშის შემქმნელები.
სალომე და მურთაზი გვიზიარებენ, რომ მათთვის, როგორც ქალთა უფლებებით დაინტერესებული ადამიანებისთვის, თამაშზე მუშაობის პროცესი თავგადასავლებითა და ისტორიებით იყო სავსე. ძველი დოკუმენტები და ჟურნალ-გაზეთები უამრავ საინტერესო ამბავს ინახავს ქალთა აქტივიზმის, ბრძოლისა და გამოწვევების შესახებ, რომელთანაც გამკლავება მუდმივად უწევდათ.
მათივე თქმით, ამ ეტაპზე მხოლოდ ორი ქალის შესახებ იყო შესაძლებელი თამაშის შექმნა, თუმცა მომავალში იმედოვნებენ, რომ სხვა უამრავი ქართველი ქალის უცნობი ისტორიის გაზიარებას შეძლებენ მოთამაშეებისთვის.
თამაში “წარსულში” EVZ Foundation-ის მიკრო გრანტის ფარგლებში შეიქმნა.
“წარსულში” სამოგზაუროდ გადადით ლინკზე: https://bit.ly/3UhgjHN
