სუს-ში ამბობენ, რომ სოცქსელებში რევოლუციის მოწოდებები შესაძლოა ციხით დაისაჯოს

სახელმწიფო უსაფრთხოების სამსახურში აცხადებენ, რომ სოციალურ ქსელებსა და მედიაში სხვადასხვა პირების მხრიდან ვრცელდება დანაშაულის ნიშნების შემცველი საჯარო განცხადებები, სადაც მოქალაქეები პირდაპირ მოუწოდებენ თანამოაზრეებს რევოლუციისა და ხელისუფლების დამხობისკენ, მათ შორის ძალადობრივი გზებით.

მათივე თქმით, მოწოდება საქართველოს კონსტიტუციური წყობილების ძალადობით შეცვლისკენ ან სახელმწიფო ხელისუფლების დამხობისკენ, ან/და ასეთი მოწოდების შემცველი მასალის გავრცელება, წარმოადგენს დანაშაულებრივ ქმედებას, “რომელიც გათვალისწინებულია საქართველოს სსკ-ის 317-ე მუხლით და ისჯება 3 წლამდე თავისუფლების აღკვეთით”. 

უსაფრთხოების სამსახური აცხადებს იმასაც, რომ უწყება თავისი კომპეტენციის ფარგლებში, განახორციელებს კანონით გათვალისწინებულ ყველა სამართლებრივ ღონისძიებას, საქართველოს კონსტიტუციური წყობილების დასაცავად.

უწყებამ ხელისუფლების დასამხობად შეთქმულების საქმეზე გამოძიება საქართველოს სისხლის სამართლის კოდექსის 315-ე მუხლის პირველი ნაწილით 29 ოქტომბერს დაიწყო. 

სუს-ში ხაზს უსვამენ იმ ფაქტს, რომ საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობის დამძიმების შემთხვევაში, მისი გლდანის მე-18 დაწესებულებაში გადაყვანისას, მის მომხრეებს დაგეგმილი ჰქონდათ ხელის შეშლის მიზნით, გზების ბლოკირება და დესტრუქციული ქმედებებით, ქაოსისა და უკონტროლო სიტუაციის შექმნა.

“განზრახული აქვთ, აღნიშნული დესტრუქციული ხასიათის მოქმედებების განხორციელებით, გამოიწვიონ უკონტროლო სიტუაცია, ქაოსი და შექმნილი ვითარებით ხელი შეუშალონ მსჯავრდებულ მიხეილ სააკაშვილის ეტაპირების პროცესს. მსგავს ქმედებებს ადგილი შესაძლოა ჰქონდეთ მსჯავრდებულ მიხეილ სააკაშვილის სხვა დაწესებულებებში ეტაპირების დროსაც”, – ვკითხულობთ განცხადებაში.

მათივე განმარტებით, სუს-ს აქვს 2-საათიანი აუდიო ჩანაწერი, რომელიც მიხეილ სააკაშვილის საპრეზიდენტო ბიბლიოთეკაშია გაკეთებული და ის დართული აქვს სისხლის სამართლის საქმეს. 

● ნიკა გვარამია: სუს-მა ჩემი ლიკვიდაციის მსურველებს მინიშნებები მისცა
● ევროკავშირი სუს-ის მიერ დიპლომატების მოსმენის გამო შესაბამის ნაბიჯებს გადადგამს
● სუს-ის ფაილები: რას ამბობენ სასულიერო პირები

30 ოქტომბერს საქართველოში არჩევნების მეორე ტური იყო. 5 თვითმმართველ ქალაქსა და 15 მუნიციპალიტეტში მერს ირჩევდნენ,  24 მუნიციპალიტეტის 42 ოლქში კი მაჟორიტარ დეპუტატს.

ცესკოს წინასწარი მონაცემებით, ყველგან, წალენჯიხის გარდა, მერის არჩევნებში მმართველი პარტიის კანდიდატმა გაიმარჯვა.

რაც შეეხებათ მაჟორიტარებს, 42 მაჟორიტარული ოლქიდან „ქართული ოცნების“ კანდიდატებმა გაიმარჯვეს  27 ოლქში, ოპოზიციამ კი 15 სამაჟორიტარო ოლქი მოიგო.

ოპოზიცია ადგილობრივი თვითმმართველობის არჩევნების ამ შედეგს არ აღიარებს და ამბობს, რომ „მმართველმა გუნდმა“ არჩევნები გააყალბა. სწორედ ამიტომ დაანონსდა აქციების სერია საქართველოს ქალაქებში.

აქციების პარალელურად, ოპოზიცია აპირებს ოლქებსა და შემდეგ სასამართლოებში გაასაჩივროს ყველა საარჩევნო დარღვევა.