სტიქია გურიაში: ნაპოვნია სამი ცხედარი, დატბორილია სახლები, ჩამოშლილია მიწის მასები
სტიქია გურიაში
სტიქია გურიაში – საგანგებო სიტუაციების მართვის სამსახურის ცნობით, მაშველებმა სოფელ ჯუმათში ერთი არასრულწლოვანის ცხედარი იპოვეს, შინაგან საქმეთა სამინისტროს ინფორმაციით მაშველებმა კიდევ ერთი, 80 წლის ქალი ცხედარი სოფელ სილაურში აღმოაჩინეს, ხოლო კიდევ ერთი მოზარდი მოგვიანებით იპოვეს.
უხვი ნალექის შედეგად ოზურგეთის მუნიციპალიტეტში დატბორილია საცხოვრებელი სახლები, მოგლეჯილია ხეები და ჩამოშლილია მიწის მასები.
საგანგებო სიტუაციების მართვის სამსახურის განცხადებით, სტიქიის ზონაში მეხანძრე-მაშველები მუშაობას განაგრძობენ. ამ დროისთვის, მაშველების მიერ გადარჩენილია და უსაფრთხო ადგილზეა გადაყვანილი 11 ადამიანი, მათ შორის, მცირეწლოვნები და არასრულწლოვანები. ასევე, უცხო ქვეყნის მოქალაქე.
“ამ ეტაპზე, მაშველების მიერ გადარჩენილი და უსაფრთხო ადგილზე გადაყვანილია 11 მოქალაქე, მათ შორის არიან მცირეწლოვნები და არასრულწლოვანები. ნაპოვნია ორი გარდაცვლილის ცხედარი და ერთი მოზარდის მიმართ გრძელდება სამძებრო სამუშაოები.
სტიქიის ადგილებზე იმყოფებიან შინაგან საქმეთა სამინისტროს სხვადასხვა დანაყოფის წარმომადგენლები, ასევე, მობილიზებულია შესაბამისი ტექნიკა და აქტიურ რეჟიმში მიმდინარეობს სამუშაოები”, – ნათქვამია შსს-ის განცხადებაში.
უწყება რეგიონში მყოფ მოსახლეობას მოუწოდებს, რომ თავი შეიკავონ გადაადგილებისგან და დაემორჩილონ ადგილზე მყოფ შინაგან საქმეთა სამინისტროს წარმომადგენლების მითითებებს.
● თუ არაფერი აქვთ დასამალი, ასეთი აგრესიულები რატომ არიან? – საზოგადოების პასუხი ხელისუფლებას შოვის ტრაგედიაზე
● შს მინისტრი შოვის ტრაგედიაზე: თუ სიცოცხლეს არ ემუქრება საფრთხე, ღამით ფრენის გარისკვა არაა მიზანშეწონილი
● სტიქიის პროგნოზი შეუძლებელი იყო – გარემოს დაცვის სამინისტრო
სტიქია მოხდა 3 აგვისტოს, კურორტ შოვშიც, სადაც სასტუმრო სანსეტ შოვთან მეწყერი ჩამოწვა. ადიდებულმა მდინარემ წაიღო სამანქანო ხიდი. მოსახლეობის დასახმარებლად ადგილზე ჩაფრინდა სასაზღვრო პოლიციის 2 სამაშველო ვერტმფრენი. სამაშველო ღონისძიებები ამ დრომდე გრძელდება. ოფიციალური ინფორმაციით, სტიქიას 31 ადამიანის სიცოცხლე ემსხვერპლა.
გარემოს ეროვნული სააგენტოს დასკვნის მიხედვით, ტრაგედიის მიზეზი გახდა რამდენიმე სტიქიური გეოლოგიური და ჰიდრომეტეოროლოგიური მოვლენების თანხვედრა, რამაც მდინარე ბუბუსწყლის ხეობაში ექსტრემალური ხასიათის ღვარცოფული ნაკადის ფორმირება გამოიწვია.
როგორც დასკვნაში წერია, მართალია, მეწყრული პროცესების ფორმირება მრავალი ფაქტორის თანხვედრამ გამოიწვია, თუმცა უშუალოდ ტრაგედიის დღეს მომხდარი სტიქია მყისიერად განვითარდა. დასკვნის თანახმად, არ დასტურდება გავრცელებული მოსაზრება, თითქოს სტიქიის განვითარებამდე ცოტა ხნით ადრე მდინარე ბუბას ხეობაში წყალი დაგუბდა.
