სპეცრაზმი საავადმყოფოში - როგორ და რატომ დააპატიმრეს ექიმები აფხაზეთში

15 თებერვალს, სპეცდანიშნულების რაზმის ქვედანაყოფი აფხაზეთის რესპუბლიკური საავადმყოფოს ხელმძღვანელობის დასაკავებლად გაგზავნეს, თუმცა, ძალოვნებს ადგილზე არ დახვდათ მთავარი ექიმი აპოლონ გურგულია და მისი მოადგილე, გიორგი ვოუბა. 

რატომ დააპატიმრეს ექიმები აფხაზეთში? ხელისუფლება გურგულიასა და ვოუბას თანამდებობრივი უფლებამოსილების გადამეტებასა და 1.2 მილიონი რუბლის (დაახლოებით, 16 500$) მითვისებაში ადანაშაულებს. თუმცა, საზოგადოებამ და პარლამენტმა ექიმების მხარე დაიჭირა. 

მედიკოსებმა არაპროპორციული აგრესიის შესახებ განაცხადეს 

აფხაზეთის სამედიცინო საზოგადოება ერთობლივი განცხადებით გამოვიდა. მათ საავადმყოფოში სპეცრაზმის გამოჩენა „მთელი სამედიცინო საზოგადოების ღირსებისა და პატივის შელახვად და შეურაცხყოფად“ მიიჩნიეს. 

„თეთრხალათიანები – შარაგზის ყაჩაღები არ არიან. როდესაც რესპუბლიკურ საავადმყოფოში მივედი, იქ 20-ზე მეტი ნიღბიანი ადამიანი იყო ძაღლებთან ერთად. ნუთუ, აუცილებელი იყო ექიმების ასეთი მეთოდით დაკავება? ეს საერთოდ ექიმების პრესტიჟს შეურაცხყოფს“, – მიაჩნია ბავშვთა რესპუბლიკური საავადმყოფოს მთავარ ექიმს, იგორ ჯოპუას. 

დოკუმენტი, რომელსაც ხელი ყველა სამედიცინო დაწესებულების მედიკოსმა მოაწერა, განხილვის საგანი გახდა პარლამენტში. მოსმენაზე დეპუტატებმა გენერალური პროკურორი ადგურ აგრბა დაიბარეს და მკაცრად გააკრიტიკეს. 

ყველაზე მეტი კრიტიკა პროკურორს მოგვარისგან – პარლამენტის სამართლებრივი პოლიტიკის კომიტეტის თავმჯდომარისგან, ვალერი აგრბასგან ერგო. 

„არაპროპორციული აგრესია გამოიყენეს სპეცრაზმის, შსს-ს სისხლის სამართლის საგამოძიებო სამსახურის თანამშრომლების ჩართულობით, ამოუტრიალეს ხელები, ცდილობდნენ დაკავებას, რესპუბლიკური საავადმყოფოს საქმიანობის პარალიზება მოახდინეს. ზოგიერთს გულის შეტევა მოუვიდა“, – აღნიშნა მან. 

„სტალინური მეთოდები“ კორუფციასთან ბრძოლის იმიტაციისთვის

სოციალურ ქსელებში ხელისუფლებას „სტალინურ მეთოდებში“ ადანაშაულებენ. კერძოდ, იხსენებენ ისტორიაში შესულ „ექიმების საქმეს“ საბჭოთა კავშირის პერიოდიდან, 1950-იანი წლების დასაწყისიდან, როდესაც ათობით ექიმი დააკავეს ფალსიფიცირებული, „პარტიისა და მთავრობის წევრების განზრახ მკვლელობის“ ბრალდებით. 

დეპუტატ ვალერი აგრბას მიაჩნია, რომ პროკურატურა „ექიმების საქმის“ საშუალებით ცდილობს, რეალურ კორუფციასთან ბრძოლის იმიტაცია მოახდინოს. 

გურგულიასა და ვოუბასთან დაკავშირებით 10 თვის განმავლობაში მიმდინარეობდა შემოწმება და საბოლოოდ გადაწყდა, რომ უარი ეთქვათ სისხლის სამართლის საქმის აღძვრაზე. მაგრამ პირველ თებერვალს, პროკურატურამ ეს დადგენილება შეცვალა, 9 თებერვალს კი სისხლის სამართლის საქმე აღძრა. „ამასთან, არანაირი პროცედურული აქტი არ გადაუციათ არც გურგულიასთვის, არც ვოუბასთვის, არც ცკუასთვის, ანუ მათ წაართვეს შესაძლებლობა, დაეცვათ საკუთარი უფლებები, მათ ხომ ამის გასაჩივრება სასამართლოში შეეძლოთ“, – ამბობს დეპუტატი. 

მან პროკურატურისგან მოითხოვა პასუხი, რატომ მიმდინარეობს კორუფციასთან ბრძოლა მხოლოდ რესპუბლიკური საავადმყოფოს შემთხვევაში, სადაც სახელდება ზარალის მოცულობა 1 მილიონ 200 ათასი რუბლი – მაგრამ ამავდროულად, არ ვრცელდება ინფორმაცია სხვა მნიშვნელოვანი საქმეების მიმდინარეობის თაობაზე. 

დეპუტატმა ასეთებს შორის დაასახელა თითქმის 1 მილიარდი რუბლის (დაახლოებით, 14 მილიონი დოლარის) მოპარვა „სბერბანკიდან“ და 50 მილიონი რუბლის (დაახლოებით, 680 ათასი დოლარის) – ტყვარჩელის საავადმყოფოს რემონტიდან, „რის გამოც, ჩვენ ვერ ვახერხებთ ბავშვთა საავადმყოფოს მშენებლობის დაწყებას უკვე ორ წელზე მეტია“. 

გენერალური პროკურორის არაპროპორციული რეაქციის შესახებ განაცხადა სხვა დეპუტატმაც – ალმას ჯოპუამ. ამრიგად, მისი თქმით, პარლამენტში მუშაობის შვიდი წლის განმავლობაში, გენპროკურატურაში კონტროლის პალატიდან და თავად პარლამენტიდან არაერთი კორუფციული საქმის შესახებ გადაიგზავნა ინფორმაცია, რომელსაც არანაირი რეაგირება არ მოჰყოლია. 

ჯოპუას აზრით, გენერალური პროკურორის გადადგომის საკითხი უნდა დადგეს 

„დეპუტატი პირადად არის ჩართული სიტუაციაში და ამიტომ აკრიტიკებს პროკურატურას“

გენერალური პროკურორის მოადგილეს, რუსლან ტირკბას მიაჩნია, რომ დეპუტატ ვალერი აგრბას მხრიდან კრიტიკა მისი ანგაჟირებით შეიძლება აიხსნას. „მოდი, ბოლომდე სიმართლე ვილაპარაკოთ“, – განაცხადა ტირკბამ და ასეთ ისტორიას მოჰყვა:

„წინა დღეს, ვალერი აგრბა პირადად მოვიდა ჩემს კაბინეტში გიორგი ვოუბასთან ერთად. საქმე ჯერ კიდევ არ იყო აღძრული… თქვენ ამ საქმის ფაბულიდან გიორგი ვოუბას სახელის ამოღება შემომთავაზეთ. მე ამაზე საუბარი არ მსურდა, მაგრამ ამას ყურადღება უნდა მიექცეს. ჩემი აზრით, ნაწილობრივ ამ საქმის ინიციატორი და დეტონატორი სწორედ თქვენ ხართ“. 

დეპუტატმა აგრბამ ამ სიტყვებს ცილისწამება უწოდა, გარჩევა მოითხოვა და განაცხადა, რომ ამისათვის, მზად არის, უარი თქვას სადეპუტატო ხელშეუხებლობაზეც. 

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო