სპეციალური საგამოძიებო სამსახური უქმდება და საქართველოს პროკურატურას შეუერთდება. იურისტის კომენტარი
სპეციალური საგამოძიებო სამსახური უქმდება
საქართველოს სპეციალური საგამოძიებო სამსახური უქმდება და გენერალურ პროკურატურას შეუერთდება. უწყების ცნობით, დამატებითი დეტალები საზოგადოებისთვის ცნობილი მას შემდეგ გახდება, რაც ინიციატივა ბიუროზე წარდგება.
“სპეციალური საგამოძიებო სამსახური შეუერთდება პროკურატურას. საზოგადოებისთვის დამატებით დეტალები გახდება ცნობილი მას შემდეგ, რაც საქართველოს პარლამენტში ბიუროს წარედგინება საკანონმდებლო ინიციატივა და დეტალურად იქნება განმარტებული ცვლილებების საჭიროება და ფორმები”, – აღნიშნეს სპეციალურ საგამოძიებო სამსახურში.
სპეციალური საგამოძიებო სამსახური 2022 წლის პირველ მარტს ამოქმედდა, რასაც საფუძვლად ედო „საქართველოსა და ევროკავშირს შორის ასოცირების 2017-2020 წლების დღის წესრიგის” ფარგლებში აღებული ვალდებულება, რომ ქვეყანას საერთაშორისო ვალდებულებების სათანადოდ შესრულების გზით, არასათანადო მოპყრობასთან ბრძოლის მიზნით ეფექტიანი რეფორმები განეხორციელებინა.
10 აპრილს დიდმა ბრიტანეთმა სპეციალურ საგამოძიებო სამსახურის უფროსს, კოკა კაციტაძეს ფინანსური სანქციები დაუწესა – განცხადების თანახმად, ის პასუხისმგებელი იყო გამოეძიებინა ისეთი შემთხვევები, რაც უტოლდება ადამიანების სასტიკ, არაადამიანურ ან დამამცირებელ მოპყრობას, თუმცა მან განზრახ ან გაუფრთხილებლობით ვერ შეასრულა თავისი პასუხისმგებლობა.
კომენტარი
გურამ იმნაძე, იურისტი: “სპეციალური საგამოძიებო სამსახური იმ ფორმით, როგორითაც დღეს საქმიანობს, ისედაც გაუქმებულია. სამწუხაროდ, ამ უწყებას არასდროს ჰქონია საკმარისი ფუნქციური დამოუკიდებლობა, რომ პოლიციის მიერ ჩადენილი დანაშაულები რეალურად და სრულყოფილად გამოეძიებინა, მითუმეტეს როცა სამართალდამცავი სისტემის მაღალჩინოსნების მიერ ჩადენილ დანაშაულზე ვსაუბრობთ. გარდა ფუნქციური შეზღუდვებისა, მისი მოქმედი ხელმძღვანელი პროკურატურის ყოფილი მაღალჩინოსანია, რომელსაც მინიმუმ ინტერესთა კონფლიქტი აქვს მისივე ყოფილი კოლეგების/მის მიერვე ვერგამოძიებული საქმეების ეფექტიანად გამოძიების თვალსაზრისით.
ამის მიუხედავად, ძალიან სამწუხაროა თუკი ეს სამსახური გაუქმდება, რადგან მოქმედი ხელმძღვანელობის პოლიტიკური თუ მიკერძოებების თუ სხვა პრობლემების მიუხედავად, ამ უწყებაში ბევრი კვალიფიციური და კეთილდინდისიერი გამომძიებელი მუშაობს, რომლების რეკრუტირებას, გადამზადებას და გაძლიერებას წლები დაჭირდა.
გარდა ამისა, სამსახურის გაუქმება ხომ ცალსახად პოლიტიკური განაცხადი იქნება: პოლიტიკური ძალა, რომელიც სამართლიანობის აღდგენის და საპოლიციო ძალადობის დასრულებაზე დაპირებას იძლეოდა, დღეს ხაზგასმით და პირდაპირ გვეუბნება, რომ პოლიციის ძალადობა არ იქნება გამოძიებული. სამსახურის გაუქმება ერთგვარი გაგრძელებაა იმ ცინიკური გადაწყვეტილებისა, რომლითაც მასობრივი ძალადობის და ხალხის წამების ორგანიზატორი პოლიციის მაღალჩინოსნები დააჯილდოებინეს პრეზიდენტის როლში მყოფ მიხეილ ყაველაშვილს.
პ.ს. რეალურად, სპეციალური საგამოძიებო სამსახური თუ გაუქმდება, არაიურისტი ადამიანებისთვის კიდევ უფრო მარტივი აღსაქმელი გახდება, რომ სინამდვილეში (ჩვენი ფოკუსის მიღმა დარჩენილი) პროკურატურაა ყველა გამოუძიებელ საქმეზე და დაუსჯელ მწამებელზე პასუხისმგებელი. დღესაც ამ უწყების ხელშია ყველა ბერკეტი, რომ არასათანადო მოპყრობის საქმეები გამოძიებული იყოს.”
