სომხეთში კორონავირუსით ერთ დღეში ორი ადამიანი გარდაიცვალა

სომხეთში კორონავირუსით ერთ დღეში ერთდროულად ორი პაციენტი გარდაიცვალა. 2 პრილს, დილით გაჩნდა ინფორმაცია 68 წლის მამაკაცის გარდაცვალების შესახებ, რომელსაც კორონავირუსთან ერთად თანმხლები გულის იშემიური და ფილტვების ქრონიკული დაავადება ჰქონდა.

საღამოს ცნობილი გახდა 78 წლის ქალბატონის გარდაცვალების შესახებ, რომელსაც ასევე კორონავირუსთან ერთად შაქრიანი დიაბეტი, ჰიპერტონია და ფილტვების ორმხრივი ანთება ჰქონდა. გარდაცვლილი პაციენტი ქალბატონი სომხეთის მოქალაქე არ იყო.

უკანასკნელი მონაცემებით, სომხეთში კორონავირუსით დაინფიცირების 663 შემთხვევაა. გამოჯანმრთელებულების საერთო რაოდენობა – 33-ს შეადგენს, ექვსი – გარდაიცვალა.

სომხეთში 16 მარტიდან 14 აპრილამდე საგანგებო მდგომარეობა მოქმედებს. 12 აპრილამდე შემოღებულია გადაადგილების შეზღუდვის მკაცრი წესები.

საზოგადოებრივი ტრანსპორტი, მეტროს ჩათვლით, მთლიანად შეჩერებულია. გადაადგილება მხოლოდ ტაქსით და პირადი ავტომობილით არის შესაძლებელი.

მუშაობს მხოლოდ პროდუქტების მაღაზიები და აფთიაქები.