სომხეთში COVID-ის გამო დაწესებული შეზღუდვები გაუქმდა
სომხეთში შეზღუდვები გაუქმდა
კორონავირუსის გამო სომხეთში შესვლაზე არსებული ყველა შეზღუდვა გაუქმებულია. ამას გარდა, იქ მომუშავე მოქალაქეებს, აღარც კვირაში ერთხელ PCR ტესტის ჩატარება და აღარც ვაქცინაციის მოწმობის წარდგენა აღარ დასჭირდებათ. ჯანდაცვის სამინისტრომ ეს გადაწყვეტილება ქვეყანაში არსებული ეპიდემიოლოგიური ვითარებისა და მსოფლიოში კორონავირუსის გავრცელების შენელების გათვალისწინებით მიიღო.
სამინისტროს მიერ წარდგენილი პროექტი არსებული შეზღუდვების მოხსნის შესახებ, სომხეთის მთავრობამ, 28 აპრილს დაამტკიცა.
ყველა დეტალი – რა გადაწყვეტილებები მიიღეს და რატომ, ასევე, რა მიმართულებით იმუშავებს ჯანდაცვის სამინისტრო ამის შემდეგ
რა შეზღუდვები მოიხსნა
1 მაისიდან, სომხეთში შესასვლელად, აღარც PCR ტესტის წარდგენა იქნება საჭირო და აღარც ვაქცინაციის მოწმობის.
ადგილობრივ მცხოვრებლებს აღარ დასჭირდებათ თავიანთი დამსაქმებლისთვის ყოველ 7 დღეში ერთხელ PCR ტესტის პასუხის, ან ვაქცინაციის მოწმობის წარდგენა.
ეს დოკუმენტები აღარ იქნება საჭირო არც სასჯელაღსრულების დაწესებულებებსა და სამხედრო ნაწილებში ვიზიტებისთვის.
სომხეთის შეიარაღებულ ძალებში მომსახურე სამხედროები შეძლებენ შესაბამისი შვებულებით კორონავირუსის გავრცელებასთან დაკავშირებით დაწესებული შეზღუდვების გარეშე ისარგებლონ.
ასევე, გაუქმებულია 1,5 მეტრიანი დისტანციის დაცვის მოთხოვნა ნებისმიერი ღონისძიების დროს, მათ შორის სკოლებსა და საბავშვო ბაღებში.
ჯანდაცვის სამინისტროს მიერ წარდგენილ პროექტში შეზღუდვების მოხსნა სომხეთში სტაბილური ეპიდემიური ვითარებითა და კორონავირუსის შემთხვევების შემცირებით არის დასაბუთებული.
ეპიდემიური მდგომარეობა სომხეთში
ბოლო 14 დღის განმავლობაში ქვეყანაში ინფიცირების მხოლოდ 144 შემთხვევა დაფიქსირდა. ეს წინა ორი კვირის მაჩვენებელზე 33 პროცენტით ნაკლებია.
„ბოლო ერთი თვის განმავლობაში, ასევე, მკვეთრად შემცირდა გარდაცვლილთა რიცხვი, 14 დღეში მხოლოდ ერთი გარდაცვალება დაფიქსირდა“, – განაცხადა ჯანდაცვის მინისტრმა ანაჰიტ ავანესიანმა მთავრობის სხდომაზე.
მისი თქმით, ვაქცინაციის პროცესმა მნიშვნელოვანი როლი შეასრულა ეპიდემიური მდგომარეობის დასტაბილურებაში.
ამ დროისთვის, სომხეთში სრულად აცრილია მოქალაქეთა 44.1 პროცენტი. დაახლოებით 50 ათასმა ადამიანმა კი დამატებითი, ბუსტერ დოზაც გაიკეთა.
ანაჰიტ ავანესიანი ირწმუნება, რომ ვაქცინაცია კვლავ აქტიურად გაგრძელდება პოლიკლინიკებსა და მობილურ პუნქტებში, აცრები ჩატარდება სახლში ვიზიტებითაც.
პრემიერ-მინისტრმა სომხეთის მოსახლეობას მიმართა, არ მოდუნდნენ და განაგრძონ ვაქცინაცია, რადგან: “ვერავინ იტყვის, რა იქნება შემდეგ”. ნიკოლ ფაშინიანის თქმით, ქვეყანას აქვს ვაქცინების ფართო არჩევანი საკმარისი რაოდენობით.
შეზღუდვების ეფექტურობა და დასკვნები
შეზღუდვების მოქმედების პერიოდში მათ შესრულებაზე კონტროლს სპეციალური საინსპექციო ორგანოები ახორციელებდნენ. ამ უწყებების კოორდინაციის დეპარტამენტის უფროსის თქმით, შემოწმების შედეგებმა აჩვენა, რომ „აცრების მაჩვენებელი, დასაქმებულ მოქალაქეებში მაინც, საკმაოდ მაღალია“.
1 იანვრიდან 26 აპრილამდე პერიოდში, ინსპექტირების ორგანოებმა 23,792 მოქალაქე შეამოწმეს – დასარწმუნებლად, რომ დასაქმებული მოსახლეობა ან ყოველ კვირაში ერთხელ PCR ტესტს იკეთებდა, ან აცრილი იყო.
„ამ შემოწმების დროს მხოლოდ 208 დარღვევა აღირიცხა, ანუ მხოლოდ 0,8 პროცენტი. ეს კარგი მაჩვენებელია იმისათვის, რომ ჩვენმა კოლეგებმა ჯანდაცვის სამინისტროში იცოდნენ რა მიმართულებით განაგრძონ მუშაობა. ალბათ, მეტი ყურადღება უნდა მივაქციოთ და უფრო აქტიურად ჩავრთოთ ვაქცინაციაში უმუშევრები და პენსიონერები”, – განაცხადა არტურ ასოიანმა.
სომხეთში შეზღუდვები გაუქმდა
