სომხეთის ხელისუფლება კორონავირუსის გავრცელების მკვეთრ ზრდას პროგნოზირებს

სომხეთში, კორონავირუსის ინფექციის გავრცელებასთან დაკავშირებული სიტუაცია ისევ შეშფოთებას იწვევს. ქვეყნის ხელისუფლება უახლოეს ორ კვირაში, კვლავ ინფიცირებულთა რიცხვის მატებას პროგნოზირებს.

კორონავირუსის გავრცელების ერთ-ერთი ყველაზე მნიშვნელოვანი მაჩვენებელი მისი რეპროდუქტიულობის კოეფიციენტია – ის ახლა გაიზარდა და 1.02-ს შეადგენს. ეს ნიშნავს, რომ ყოველი ინფიცირებული ადამიანი ერთ კაცზე მეტს აინფიცირებს.

•  ნიღბებით, შესვენებებისა და ბუფეტის გარეშე: სომხეთი ახალი სასწავლო წლისთვის ემზადება

რას ამბობენ ჯანდაცვის სამინისტროში 

ინფიცირებულთა რაოდენობის ზრდის ერთ-ერთი მიზეზი ის არის, რომ ახლა უფრო მეტი ტესტი კეთდება, განმარტავს ჯანდაცვის მინისტრის მოადგილე, ანაიტ ავანესიანი:

„თუმცა, ჩვენ ასევე აღვნიშნავთ ტესტების რაოდენობის პროცენტულ ზრდასაც – დღეს, დაახლოებით, შვიდი პროცენტი (შედარებისთვის – ადრე მხოლოდ ხუთი პროცენტი იყო – JAMnews), რაც შეშფოთებას იწვევს“.

ინფიცირებულთა რიცხვის მატების ტენდენცია, როგორც ავანესიანმა აღნიშნა, სასწავლო წლის დაწყებასთან არის დაკავშირებული.

„მართალია, სკოლები მხოლოდ 15 სექტემბერს გაიხსნა, მაგრამ უკვე მანამდე შეინიშნებოდა საკმაოდ მაღალი აქტივობა“, – განაცხადა ანაიტ ავანესიანმა.

ის საუბრობდა იმის შესახებ, რომ სასწავლო წლის დაწყების წინ, მშობლები და ბავშვები მზადებას შეუდგნენ – მაღაზიებში სიარულმა, შეხვედრებმა, გადაჭარბებულმა კომუნიკაციამ ვირუსის გავრცელება გამოიწვია.

მინისტრის მოადგილის თქმით, როგორ გავლენას მოახდენს თვითონ სკოლების გახსნა ინფიცირების მრუდის ცვლილებაზე, უახლოეს ორ კვირაში გამოჩნდება.

ვირუსის ზრდის რეპროდუქტიულობის მაჩვენებელი (Rt COVID-19) ახლა 1.02-ს შეადგენს, ამის შესახებ Facebook-ის საკუთარ გვერდზე ჯანდაცვის მინისტრის მოადგილემ, ლევან ნანუშიანმა დაწერა:

„იმ შემთხვევაში, თუკი აღნიშნული მაჩვენებელი ერთზე მეტია, მოსალოდნელია ვირუსის სწრაფი გავრცელება: თითოეული ინფიცირებული ერთ კაცზე მეტს დააინფიცირებს. სულ რამდენიმე დღის წინ, ეს მაჩვენებელი ერთზე ნაკლები იყო, რაც ინფიცირების შემთხვევების შემცირებაზე მეტყველებდა“.

მინისტრის მოადგილემ გაიხსენა, რომ რეპროდუქტიულობის მაჩვენებელი გაიზარდა მაისის ბოლოს – ივნისის დასაწყისში, რის შემდეგაც, უკვე ივლისში, სომხეთში ინფიცირებულთა რიცხვის მკვეთრი ზრდა დაფიქსირდა. 

ლენა ნანუშიანმა მოსახლეობას ყველა ანტიეპიდემიოლოგიური წესის დაცვისკენ მოუწოდა: ნიღბის ტარება, ხელების ხშირი დაბანა და დეზინფიცირება, სოციალური დისტანციის დაცვა:

„წინააღმდეგ შემთხვევაში, ჩვენთან ინფიცირების შემთხვევათა მკვეთრი მატება იქნება“.

ქვეყანაში კორონავირუსთან დაკავშირებით არსებული ვითარება 

2020 წლის მარტში, სომხეთში, საგანგებო მდგომარეობის რეჟიმი გამოცხადდა.

ივლისის დასაწყისამდე, ქვეყანაში, ინფიცირებულთა რიცხვი ყოველდღიურად იზრდებოდა, 6 ივლისი კორონავირუსის გავრცელების პიკად მიიჩნევა. ამ თარიღის შემდეგ, დღიურად გამოვლენილი ახალი შემთხვევების რაოდენობის კლება დაიწყო.

აქედან გამომდინარე, 12 აგვისტოდან კომენდატურამ ქვეყანაში ჩამოსვლის უფლება მისცა უცხოელებს, ასევე დაუშვა ქუჩის შეკრებები და მიტინგები – ეპიდემიოლოგიური ზომების დაცვის გათვალისწინებით.

საგანგებო მდგომარეობის რეჟიმი 11 სექტემბერს ამოიწურა, რის შემდეგაც სომხეთში, ოთხი თვით, კარანტინი დაწესდა.

ქვეყანაში, 18 სექტემბერს, ინფიცირების 239 ახალი შემთხვევა გამოვლინდა. სულ, პანდემიის დაწყებიდან 46 910 ადამიანი დაინფიცირდა. გამოჯანმრთელდა 42 369 პაციენტი, გარდაიცვალა 926 ადამიანი.