სომხეთში მალე სილამაზის სალონებს და ღია კაფეებს გახსნიან

კორონავირუსთან დაკავშირებით არსებული სიტუაცია სრულად ექვემდებარება კონტროლს, მაგრამ მოვლენების შესაძლო განვითარება კვლავ არაპროგნოზირებადია. ეს არის სომხეთის ვიცე-პრემიერის, საგანგებო მდგომარეობის რეჟიმის კომენდანტის, ტიგრან ავინიანის მოსაზრება.

ქვეყანაში, 16 მარტს გამოცხადებული საგანგებო მდგომარეობის რეჟიმი 14 მაისამდე იმოქმედებს. თუმცა, უკვე დაიწყო საკარანტინო ზომების შემსუბუქება და უახლოესი ათი დღის განმავლობაში, მოსალოდნელია, რომ გაიხსნება სილამაზის სალონები, ღია კაფეები და ამუშავდება კიდევ უფრო მეტი ბიზნესი.

კორონავირუსთან ბრძოლის პროცესის შეფასება – რა გამოვიდა და რა არა. ხელისუფლების არგუმენტები

• სომხეთი: რამდენად დაზარალდა ბიზნესი კორონავირუსისგან და რა ელის ეკონომიკას საგანგებო მდგომარეობის შემდეგ?
• საქართველო: რა ბედი ელის ტურიზმს?

რა ამუშავდება ისევ და რა იქნება ნებადართული

4 მაისიდან დაიწყება შეზღუდვების მოხსნა მომსახურების სფეროზე.

პირველი, უსაფრთხოების გარკვეული მოთხოვნების დაცვით, მუშაობას დაიწყებენ სილამაზის სალონები. შემდეგ, სავარაუდოდ, გაიხსნება ქუჩის კაფეები და მოგვიანებით ისინი, რომლებიც შენობებშია.

10 დღის განმავლობაში, სამუშაოს დაუბრუნდება საწარმოებისა და ორგანიზაციების უმეტესობა.

ტრანსპორტი გაჩერებული იქნება მაისის შუამდე, რადგან, ეპიდემიოლოგთა აზრით, სწორედ იქ არის ინფექციის გავრცელების ყველაზე მაღალი რისკი.

ამავდროულად, კომენდანტი საზოგადოებას აფრთხილებს:

“ჩვენ ვფრთხილობთ პროგნოზებში. თუკი ვირუსის ძლიერი აფეთქება მოხდება – შეიძლება, მკაცრ შეზღუდვებს დავუბრუნდეთ”.

თუკი ეს მოხდება – ტიგრან ავინიანი დარწმუნებულია, რომ სომხეთმა, საერთო ჯამში, მოახერხა ჯანდაცვის სისტემის იმ დონემდე მიყვანა, როდესაც ერთდროულად, რამდენიმე ათასი ინფიცირებულის მკურნალობაა შესაძლებელი.

სომხეთში, უკვე სამჯერ შეამსუბუქეს საგანგებო მდგომარეობის რეჟიმი.

• 14 აპრილიდან მოიხსნა შეზღუდვები სამშენებლო სამუშაოებსა და გადამამუშავებელ მრეწველობაზე.
• 23 აპრილიდან, მუშაობის უფლება მიიღეს პოლიგრაფიულმა, ქვების გადამამუშავებელმა და მეტალო-კონსტრუქციების საწარმოებმა, ასევე, ავტომობილების სარემონტო სახელოსნოებმა. ამას გარდა, გაიხსნა მობილური ოპერატორებისა და ინტერნეტ-პროვაიდერთა ოფისები.
• 28 აპრილიდან, ნაწილობრივ მოიხსნა შეზღუდვა მოქალაქეების გადაადგილებაზე.

თუკი ადრე, სახლიდან გამოსვლა მხოლოდ უკიდურესი აუცილებლობის შემთხვევაში შეიძლებოდა, ახლა დაშვებულია ფეხით და ველოსიპედით სეირნობა – თუმცა, არ შეიძლება სახლიდან ერთ კილომეტრზე უფრო შორს წასვლა.

ასევე, უკვე არა მხოლოდ უკიდურესი აუცილებლობის შემთხვევაში, ჩვეულებრივ დროსაც, შესაძლებელია, ერთი ოჯახიდან ორი კაცის სასეირნოდ გასვლა.

რა სახის დახმარებას იღებს მოსახლეობა სახელმწიფოს მხრიდან

კარანტინიდან გამოსვლის პროცესი, ყველაზე დიდ გავლენას ახდენს უსაფრთხოების ზომებსა და ეკონომიკურ პრობლემებზე.

პირველ ასპექტთან დაკავშირებით – კომენდანტი მოსახლეობას კვლავინდებურად მოუწოდებს, მომავალშიც დაიცვან სოციალური დისტანცია და ჰიგიენის ნორმები, გარკვეულ შემთხვევებში, ატარონ ნიღბები და ხელთათმანებიც:

 «საერთო ჯამში, ეს საზოგადოების ქცევით ცვლილებებამდე მიგვიყვანს. და ეს გახდება მძიმე პირობებში ცხოვრების ახალი წესები».

რაც შეეხება ეკონომიკას, როგორც კომენდანტი აცხადებს, ყველაზე დიდ ზარალს ტურიზმი განიცდის.

ყველაზე დიდი ცვლილებები მოხდა ონლაინ-სერვისების მიწოდების სისტემის სწრაფი რეფორმის შედეგად.

სომხეთში, ათზე მეტი ანტიკრიზისული პროგრამა შემუშავდა, რომლის ფარგლებშიც, მოქალაქეები სახელმწიფოსგან ფინანსური დახმარების მიღებას შეძლებენ.

მაგრამ ამ დახმარების მისაღებად, უკვე აღარ არის საჭირო ოფისებში წასვლა და რიგში დგომა. სახლიდან გაუსვლელად შეგიძლიათ გაიგოთ, თუ რა დახმარების მიღება შეგიძლიათ სახელმწიფოსგან. ამისათვის შეიქმნა სპეციალური ვებგვერდი ssa.am, სადაც ძალიან მარტივია საკუთარი მონაცემების შეყვანა.

ტიგრან ავინიანის ცნობით „ციფრული მომსახურების სამომავლო განვითარება ხელისუფლების პრიორიტეტების სიაში შედის“.

სომხეთის ფინანსთა მინისტრმა, ატომ ჯანჯუღაზიანმა განაცხადა, რომ „ყურადღების გარეშე არ დარჩება არც ერთი მოქალაქე, რომელიც კორონავირუსის პანდემიის შედეგად დაზარალდა“.

მათ შორის, გადაწყდება დაურეგისტრირებლად მომუშავე ადამიანების პრობლემა, რომლებიც ჯერჯერობით მთავრობის მიერ შემუშავებული დახმარების პროგრამების მიღმა დარჩნენ.

ტესტებისა და ხელოვნური სუნთქვის აპარატების წარმოების დაფინანსება

სომხეთის მოლეკულური ბიოლოგიის ინსტიტუტი დიაგნოსტიკური ტესტების წარმოებას იწყებს, რომლისთვისაც ნედლეულს სახელმწიფო ყიდულობს.

ასევე, უახლოეს მომავალში, მოსალოდნელია, სომხეთში ხელოვნური სუნთქვის აპარატების წარმოების დაწყება.

 «ჩვენ ველით, რომ ოთხი თვის თავზე, სომხეთში დამზადებული იქნება ხელოვნური სუნთქვის აპარატის ხუთი პროტოტიპი და შემდეგ დაიწყება მათი სერიული წარმოება – თვეში, 40-60 ეგზემპლარი», – განაცხადა ვიცე-პრემიერმა.