ანტირუსული სანქციების გამო, სოხუმმა ნაწილობრივ გააუქმა ემბარგო საქართველოდან შესულ საქონელზე
სოხუმმა ნაწილობრივ გააუქმა ემბარგო საქართველოდან შესულ საქონელზე
აფხაზეთმა საქართველოდან საქონელზე ემბარგო გააუქმა. მართალია, ჯერჯერობით მხოლოდ ნაწილობრივ და მხოლოდ კერძო ინდივიდებისთვის.
აფხაზეთის ე.წ. პრეზიდენტმა ასლან ბჟანიამ საქართველოდან ლეგალურად შემოტანილი საქონლის სია დაამტკიცა. სია 14 ელემენტისგან შედგება. ამის შესახებ ოფიციალური განცხადება ჯერ არ გაკეთებულა, თუმცა ინტერნეტში პრეზიდენტის მიერ 31 მარტს ხელმოწერილი განკარგულების სკანირებული ვერსია უკვე გამოჩნდა.
საქართველოდან შემოსულ საქონელზე ემბარგო აფხაზეთში 2007 წელს დაწესდა.
- “ვიდრე მონაკოს შესთავაზებს, საქართველომ ჯობია გააუქმოს კანონი ოკუპაციის შესახებ” – კომენტარი აფხაზეთიდან
- “ჩვენ არავის ვალი არ გვაქვს” – მოსაზრება აფხაზეთიდან
- სკანდალი აფხაზეთში ქართულ “ხაშთან” დაკავშირებით
„ნებადართული საქონლის“ სიაში შედის: ნერგები; თესლი და სხვადასხვა სარგავი მასალა; შინაური ფრინველი; ცხოველების საკვები; სასოფლო-სამეურნეო ტექნიკა; ტექნიკა სოფლის მეურნეობის პროდუქციის წარმოებისთვის; მანქანები; სათადარიგო ნაწილები და ძრავის ზეთები.
აფხაზეთის სახელმწიფო საბაჟო კომიტეტის თავმჯდომარის პირველი მოადგილის, ალიას ლაბახუას განცხადებით, სიაში შეტანილი საქონლის ტრანსპორტირება მხოლოდ ფიზიკურ პირებს შეუძლიათ. ანუ, ეს არ ეხება კომპანიების თანმხლები დოკუმენტაციის მქონე საქონლის ნებისმიერ პარტიას.
„ეს ეხება მხოლოდ კერძო მოვაჭრეებს, რომლებსაც შეუძლიათ, მაქსიმუმ, საქონლის გადატანა მანქანის საბარგულით, მეტი არაფერი. ანუ გადაწყვეტილება არ ვრცელდება იურიდიულ პირებზე. საქართველოდან შემოტანილი საქონლის განბაჟებისთვის ჩვენ გვაქვს დაყენებული ტერმინალები, სადაც ისინი გადაიხდიან საბაჟო გადასახადს და გააგრძელებენ გზას დანიშნულების ადგილამდე“, – განაცხადა მან.
მიუხედავად იმისა, რომ აფხაზეთის ომი ოცდაათი წლის წინ დასრულდა, აფხაზეთის ნებისმიერი ხელისუფლება მაინც ძალიან ფრთხილად უდგება საქართველოსთან ვაჭრობის დაკანონების საკითხს. ამასთან, სასაზღვრო ვაჭრობა მთელი ამ პერიოდის განმავლობაში ერთი დღეც არ შეწყვეტილა და კონტრაბანდულმა საქონელმა დატბორა აფხაზური ბაზარი, რამაც კიდევ უფრო ჩრდილოვანი გახადა ადგილობრივი ეკონომიკა.
მიუხედავად ამისა, ამ სიტუაციაში რაიმეს შეცვლის ნებისმიერი მცდელობა საზოგადოების ნაწილის მხრიდან აქტიურ წინააღმდეგობას აწყდება: „რა, ვაჭრობას ვაპირებთ მტერთან?!“
არც პრეზიდენტ ალექსანდრ ანქვაბს და არც მის შემცვლელ რაულ ხაჯიმბას არ სურდათ დიდი გარიგება უკვე არსებული ვაჭრობის დაკანონებით.
შესაძლოა, ყველაფერი ასე დარჩენილიყო ამჟამინდელი პრეზიდენტის, ასლან ბჟანიას პირობებშიც, მაგრამ რუსეთსა და უკრაინას შორის ომმა ბევრი რამ შეცვალა, მათ შორის, წლების განმავლობაში დამყარებული სავაჭრო კავშირები.
ახლა, რუსეთზე დაწესებული სანქციების გამო, ბევრი საქონელი შემოდის აფხაზეთში საქართველოს გავლით. ამიტომ ბჟანიას მოუხდა კორექტივების შეტანა უკვე არსებულ წესრიგში. მაგრამ, კიდევ ერთხელ, ეს ეხება მხოლოდ პროდუქციის შეზღუდულ ჩამონათვალს, დანარჩენი ყველაფერი ისევ აკრძალულია.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
