„სოციალური სამართლიანობა – აფხაზეთის გადარჩენის გასაღებია“. მოსაზრება
სოციალური სამართლიანობა აფხაზეთში
ეკონომისტი ახრა არისტავა მიიჩნევს, რომ სოციალური სამართლიანობა აფხაზეთის გადარჩენის გასაღებია.
ამ დასკვნამდე იგი მიდის თავის ბლოგში აფხაზეთის ქრონიკული შიდა პოლიტიკური კრიზისის განხილვისას.
ახრა არისტავა:
„ვის აწყობს ჩვენი ხალხისთვის იმის თქმა, რომ აფხაზეთში, სავარაუდოდ, ფულის დეფიციტია? ვინ ცდილობს რეალური სოციალური სამართლიანობის უზრუნველყოფის საკითხი არა მეორე, არამედ მეათე-მეთხუტმეტე საკითხად გადაიტანოს? ვინ აყენებს მეორეხარისხოვან საკითხებს და ცდილობს ხელოვნურად გაამწვავოს პოლიტიკური სიტუაცია? ნუთუ უკეთესი არ იქნებოდა პოლიტიკური ორგანიზაციებისთვის დასხდომა და ქვეყანაში არსებული რეალური ვითარების ანალიზი?
აფხაზურ საზოგადოებაში სამართლიანობის საკითხი მორალური კოდექსიდან მომდინარეობს და ცენტრალური და გადამწყვეტი მნიშვნელობისაა. მაშ, ნუთუ უკეთესი არ იქნებოდა დასხდომა და მისი განხილვა?
მაგალითად, სულ ახლახანს, საგადასახადო საქმეთა მინისტრმა ედგარ ბენიამ 2025 წლის შედეგები გამოაცხადა. თვალშისაცემია მოგების გადასახადიდან მიღებული შემოსავლები – 1 მილიარდ 552 მილიონი რუბლი(20 მილიონი აშშ დოლარი). მაგრამ, 2019 წელს მოგების გადასახადი უკვე იყო 1,5 მილიარდი. გამოდის, რომ მოგების გადასახადი არ იზრდება? როგორ არის ეს შესაძლებელი?
მთავრობის ოფიციალური მონაცემებით, 2025 წელს მხოლოდ ერთ სავაჭრო სექტორს ჰქონდა 60 მილიარდ რუბლზე მეტი ბრუნვა (დაახლოებით 798 მილიონი აშშ დოლარი). ხოლო იმპორტმა 52 მილიარდ რუბლზე მეტი შეადგინა (დაახლოებით 692 მილიონი აშშ დოლარი). სხვა სიტყვებით რომ ვთქვათ, ეს ერთი სექტორი მოცულობით უფრო დიდია, ვიდრე მთელი აფხაზეთის ეკონომიკა 2019 წელს.
კიდევ ერთი კითხვა: ვინ უშლის ხელს მინისტრთა კაბინეტს მიიღოს მთავრობის დადგენილება, რომელიც გადასახადების სამინისტროს აძლევს პირდაპირ წვდომას ყველა საბანკო ტრანზაქციაზე, ვალუტის კონტროლის შესახებ ცოტა ხნის წინ მიღებული კანონის შესაბამისად?
მთელ მსოფლიოში საგადასახადო ორგანოებს აქვთ პირდაპირი წვდომა საბანკო ანგარიშებსა და საბანკო საიდუმლოებაზე. რატომ არ ხდება ეს ჩვენთან? იქნებ უკეთესი იქნება, რომ პოლიტიკურმა ორგანიზაციებმა ერთმანეთთან დაპირისპირების ნაცვლად, სოციალურ სამართლიანობაზე დიალოგი აწარმოონ?
მით უმეტეს, რომ სულ რამდენიმე დღის წინ ოპოზიციურმა ორგანიზაციებმა კიდევ ერთხელ დაადასტურეს დიალოგის მნიშვნელობა. აღმასრულებელი ხელისუფლების მხარდამჭერმა პოლიტიკურმა ორგანიზაციებმაც საჯაროდ დაუჭირეს მხარი დიალოგს. პრეზიდენტმა კი პარლამენტისადმი მიმართვაში ხაზი გაუსვა ფართო დიალოგის აუცილებლობას. აღმოჩნდა, რომ ყველა მხარს უჭერს. მაშ, რა ხდება?
აფხაზები ყოველთვის გამოირჩეოდნენ განსაკუთრებული თავშეკავებითა და ცივი გონებით, როდესაც საერთო საფრთხე არსებობდა.
დღეს კი ჩნდება კითხვა: შეგვიძლია თუ არა სამართლიანი სახელმწიფოს აშენება? იმიტომ, რომ უსამართლო აფხაზურ სახელმწიფოს მომავალი არ აქვს. ამიტომ, უაღრესად მნიშვნელოვანია გვერდზე გადავდოთ ყველაფერი პირადი, გვერდზე გადავდოთ ემოციები და განვიხილოთ ეროვნული პრობლემები და საკითხები, აფხაზური სახელმწიფოს ბედი ისე, როგორც ამას ჩვენი წინაპრები ახერხებდნენ“.
