შეწყდეს დემონსტრანტების წინააღმდეგ ქიმიური ნივთიერებების გამოყენება - ექიმების პეტიცია
ექიმების პეტიცია
ექიმები რუსთაველის გამზირზე, დემონსტრანტების დასაშლელად ქიმიური ნივთიერებების გამოყენების შესახებ პეტიციას ავრცელებენ.
ექიმები მოითხოვენ:
- დაუყოვნებლივ შეწყდეს დემონსტრანტების წინააღმდეგ ქიმიური ნივთიერებების გამოყენება.
- სასწრაფოდ შეასრულოს სახელმწიფომ თავისი ვალდებულება და გაასაჯაროოს რა ქიმიური ნივთიერებები იყო გამოყენებული აღნიშნულ პერიოდში.
პეტიციას ხელს ამ დროისთვის 892 სამედიცინო მუშაკი აწერს.
- ხელოვანები მსოფლიოდან ქართველი ხალხისა და ხელოვანების მხარდასაჭერ განცხადებას ავრცელებენ
- “ვფიქრობ, იხილავთ აშშ-ს ზომებს მათ წინააღმდეგ, ვინც საქართველოში ძალადობს” – ჰელსინკის კომისია
- “გაგრძელდეს მუშაობა აქტივების გაყინვისა და კონფისკაციის მიმართულებით” – გამოქვეყნდა “ვიზის მექანიზმის შეჩერების” ანგარიში
ექიმების განცხადებაში აღნიშნულია, რომ საპროტესტო აქციების პერიოდში, მშვიდობიანი მომიტინგეების წინააღმდეგ ძალოვანი სტრუქტურების მიერ მომწამლავი ნივთიერებების გამოყენების შემდეგ, კლინიკებს ყოველდღიურად სულ უფრო ბევრი ადამიანი აკითხავს. მწვავედ მიმდინარე სიმპტომების გარდა, შეუძლებელია ამ ტოქსიკური ნივთიერებების შემდგომი შედეგების პროგნოზირება.
მათი თქმით, ჯანდაცვის სამინისტრო მუდმივად, ღიად უნდა აფრთხილებდეს ძალოვან სტრუქტურებს არ გამოიყენონ ეს პრაქტიკა დემონსტრანტების დასაშლელად:
„CDC-ის ინსტრუქციებში ხაზგასმით წერია, რომ მსგავსი ქიმიური აგენტების მიერ ადამიანისთვის მიყენებული ზიანის სიმძიმე დამოკიდებულია სხვადასხვა ენდო და ეგზოგენურ ფაქტორებზე. ქვეყანაში უამრავი ქრონიკული დაავადების მატარებელი პირია, მკვეთრადაა გაზრდილი ონკოლოგიურ დაავადებათა რიცხვი, მათ შორის ახალგაზრდა პოპულაციაში.
ჩვენი, ექიმების საფუძვლიანი შეშფოთების მიზეზია აღნიშნული ქიმიური ნივთიერებების ხანგრძლივი და მასიური გამოყენება, რაც კიდევ უფრო დაამძიმებს აღნიშნულ ფონს ჩვენს ქვეყანაში. ამიტომ, აუცილებლად მიგვაჩნია, ჯანდაცვის სამინისტრომ მოახსენოს საზოგადოებას და, პირველ რიგში, მედიცინის მუშაკებს, რა ქიმიური აგენტები იქნა გამოყენებული ძალოვანი სტრუქტურების მიერ.
ეს საშუალებას მოგვცემს, სპეციფიკური მკურნალობის გზით (ასეთის არსებობის შემთხვევაში), განვახორციელოთ აღნიშნული ნივთიერებებით დაზიანებული ადამიანების დახმარება“, – წერია ექიმების პეტიციაში.
