შეტაკებები ერევნის ცენტრში, რა მოხდა და რატომ. ფოტორეპორტაჟი
30 მაისს პოლიციასთან ძალადობრივი შეტაკებები მოჰყვა ერევანში, საფრანგეთის მოედანზე, თითქმის ერთი თვიან ქუჩის საპროტესტო აქციებს ორი ძირითადი მოთხოვნით:
- გადადგეს პრემიერ-მინისტრი ნიკოლ ფაშინიანი
- არაღიარებული მთიანი ყარაბაღის რესპუბლიკა არ გახდეს აზერბაიჯანის ნაწილი.
ოპოზიციის ბრძოლის აქტიური ფაზა 1-ელ მაისს დაიწყო. მას შემდეგ, რაც პრემიერ-მინისტრმა ნიკოლ ფაშინიანმა განაცხადა, რომ „საერთაშორისო თანამეგობრობა სომხური მხარისგან მთიანი ყარაბაღის სტატუსზე მოლოდინის ზღვარის დაწევას ელის“. ეს განცხადება შეაფასეს, როგორც სომხეთის ხელისუფლების თანხმობა აზერბაიჯანის შემადგენლობაში მთიანი ყარაბაღის სტატუსზე.
მას შემდეგ ოპოზიციამ საფრანგეთის მოედანზე კარვები გაშალა და პერმანენტულ საპროტესტო აქციებს მართავს.
საპროტესტო აქციის ლიდერები არიან ოპოზიციური საპარლამენტო ფრაქციები “სომხეთი” და “მაქვს პატივი”. ორივე ფრაქცია სომხეთის ექსპრეზიდენტებთან რობერტ ქოჩარიანთან და სერჟ სარგსიანთან არის დაკავშირებული. ბევრი ექსპერტი თვლის, რომ ეს პოლიტიკოსები მოსკოვთან ასოცირდებიან და პრორუსული ორიენტაცია აქვთ.
სერჟ სარგსიანმა ძალაუფლება 2018 წელს, ხავერდოვანი რევოლუციის შედეგად დაკარგა. მაშინ რევოლუციას ამჟამინდელი პრემიერ მინისტრი ნიკოლ ფაშინიანი ხელმძღვანელობდა.
ოპოზიცია 3 ივნისს ეროვნული კრების რიგგარეშე სხდომის მოწვევას და შემდეგი გადაწყვეტილებების მიღებას ითხოვს:
- აზერბაიჯანთან საზღვრის დემარკაციის აუცილებელი წინასწარი პირობა უნდა იყოს სამხედრო ტყვეების დაბრუნება და აზერბაიჯანის ჯარების გაყვანა სომხეთის ტერიტორიიდან.
- დემარკაციის პროცესში უნდა გამოირიცხოს სომხეთის ტერიტორიული მთლიანობის დარღვევა.
- სომხურ-თურქული შერიგების გააქტიურებულ პროცესში უნდა გამოირიცხოს ნებისმიერი შეთანხმება, რომელიც ეჭვქვეშ დააყენებს სომხების გენოციდს 1915 წელს, ოსმალურ თურქეთში, რომელიც უკვე აღიარებულია არა მხოლოდ სომხეთში, არამედ მსოფლიოს მრავალ ქვეყანაში.
თუმცა, მმართველმა ფრაქცია „სამოქალაქო შეთანხმებამ“ განაცხადა, რომ ამ შეხვედრაში მონაწილეობას არ მიიღებს.
„ცხადია, რომ ოპოზიცია კვლავ ცდილობს ყარაბაღის საკითხი ექსკლუზიურად შიდა პოლიტიკური მიზნებისთვის გამოიყენოს“, – განაცხადა ფრაქციის მდივანმა არტურ ოჰანისიანმა.
30 მაისის მოვლენების შესახებ
30 მაისს ოპოზიცია მთავრობის მესამე შენობისკენ გაემართა, რათა მინისტრებისგან პირდაპირი პასუხი მიეღო კითხვაზე: მხარს უჭერენ თუ არა იმ აზრს, რომ მთიანი ყარაბაღი აზერბაიჯანის შემადგენლობაში დარჩეს?
პოლიციამ აქციის მონაწილეებს მთავრობის შენობებში შესვლის უფლება არ მისცა, რასაც აქტიური შეტაკებები მოჰყვა. დაკავებულია ასზე მეტი ადამიანი. ოთხი ადამიანი საავადმყოფოში გადაიყვანეს, მათგან ორი პოლიციის თანამშრომელი. გავრცელებული ინფორმაციით, მათ სიცოცხლეს საფრთხე არ ემუქრება.
“წინააღმდეგობის მოძრაობის” ერთ-ერთმა ლიდერმა იშხან საღათელიანმა განაცხადა, რომ ოპოზიცია გააგრძელებს პასუხის მოთხოვნას ყველა ოფიციალური პირისგან ამ „ძალიან მკაფიო, პირდაპირ კითხვაზე“. მოძრაობის მხარდამჭერები უახლოეს დღეებში სხვადასხვა სამთავრობო უწყებებში აპირებენ მისვლას.
„სომხეთი მხარს დაუჭერს მთიანი ყარაბაღის მოსახლეობის თვითგამორკვევის უფლების სრულ რეალიზებას. მთიანი ყარაბაღი არასოდეს იქნება აზერბაიჯანის შემადგენლობაში. სომხეთსა და მთიან ყარაბაღს შორის უნდა არსებობდეს საიმედო სახმელეთო კავშირი. მთიანი ყარაბაღი არ იქნება ანკლავი“, – განაცხადა საღათელიანმა.
მისი თქმით, „ეს არის წითელი ხაზები, რომლებსაც სომხები არ გადაკვეთენ“.
