შარლ მიშელი: ჩატარდა არჩევნები და არსებობს გაყალბების სერიოზული ეჭვები - საჭიროა გამოძიება
შარლ მიშელი არჩევნებზე
ევროპული საბჭოს პრეზიდენტი შარლ მიშელი საქართველოში ჩატარებული საპარლამენტო არჩევნებთან დაკავშირებით ამბობს, რომ ამ საკითხთან დაკავშირებით მთელ მსოფლიოში გაყალბების სერიოზული ეჭვები არსებობს.
მიშელმა ჟურნალისტებთან საუბარში ხაზი გაუსვა, რომ ევროპელი ლიდერები უნდა დარწმუნდნენ იმაში, რომ ყველაფერი სამართლიანად და გამჭვირვალედ ჩატარდა. მისივე თქმით, საჭიროა გამოძიება.
“პირველ რიგში, მე ვიცი ქართველი ხალხის გულწრფელი მისწრაფება, რომ გახდნენ ევროკავშირის წევრები. ჩვენ მივიღეთ ძალიან მნიშვნელოვანი გადაწყვეტილება, როცა საქართველოს კანდიდატის სტატუსი მივანიჭეთ.
მეორეს მხრივ, საქართველოში ჩატარდა არჩევნები და არსებობს გაყალბების სერიოზული ეჭვები და ეს საჭიროებს სერიოზულ გამოძიებას. ამ საკითხთან მიმართებით ჩვენ გვჭირდება დარწმუნება, რომ ყველაფერი ჩატარდა სამართლიანად და გამჭვირვალედ, რაზეც ახლა ეჭვები არსებობს არა მხოლოდ ევროპაში, არამედ მთელ მსოფლიოში.
მქონდა შესაძლებლობა ამ საკითხთან დაკავშირებით პრემიერმინისტრთან მოსაზრებები გამეცვალა”, – თქვა მან.
კითხვაზე, მოსალოდნელია თუ არა სანქციები და უვიზო რეჟიმის გადახედვა დადგეს დღის წესრიგში, შარლ მიშელი პასუხობს: “ჩვენ ევროპულ საბჭოში შევაფასებთ სიტუაციას და დარწმუნებული ვარ, რომ ევროპელი ლიდერები მკაფიო სიგნალს გააგზავნიან”.
7 ნოემბერს საფრანგეთის პრეზიდენტმა, ემანუელ მაკრონმა, ბუდაპეშტში მიმდინარე ევროპის პოლიტიკურ სამიტზე, მოლდოვის ახლადარჩეულ პრეზიდენტს, მაია სანდუს, არჩევნებში გამარჯვება მიულოცა, ამავე სამიტზე მყოფ საქართველოს პრემიერს, ირაკლი კობახიძეს კი არა.
სიტყვით გამოსვლისას მან საქართველოში შექმნილი პოლიტიკური ვითარება გააკრიტიკა და იმედი გამოთქვა, რომ “საქართველო გააძლიერებს თავის ევროპულ არჩევანს”
ასევე, საფრანგეთის პრეზიდენტი ემანუელ მაკრონი, გერმანიის კანცლერი ოლაფ შოლცი და პოლონეთის პრემიერმინისტრი დონალდ ტუსკი საქართველოში არსებულ პოლიტიკურ ვითარებასთან დაკავშირებით ერთობლივ განცხადებას ავრცელებენ და გამოხატავენ შეშფოთებას საქართველოში ჩატარებულ არჩევნებზე.
“ჩვენ მოვუწოდებთ არჩევნებთან დაკავშირებულ დარღვევებზე ყველა საჩივრისა და ცნობის სწრაფ და გამჭვირვალე გამოძიებას და სიფრთხილით გამოვიკვლევთ საერთაშორისო სადამკვირვებლო მისიის ბოლო ანგარიშს, რომელსაც მოგვიანებით ველოდებით.” – წერია განცხადებაში.
