"ევროკავშირი, როგორც მსოფლიო გეოპოლიტიკური მოთამაშე აღარ არსებობს" - შალვა პაპუაშვილი
შალვა პაპუაშვილის განცხადება
“ქართული ოცნების” პარლამენტის თავმჯდომარემ, შალვა პაპუაშვილმა, ვენესუელაში განვითარებულ მოვლენებზე კომენტარისას განაცხადა, რომ ევროკავშირი “აღარ არსებობს როგორც საერთაშორისო წესრიგის გარანტი და გლობალური გეოპოლიტიკური მოთამაშე“. ამასთან, მისი შეფასებით, ევროკავშირი ვეღარც მომავალში შეასრულებს ამ როლს.
3 იანვარს აშშ-ის პრეზიდენტმა, დონალდ ტრამპმა განაცხადა, რომ კარაკასზე მიტანილი საჰაერო იერიშის შემდეგ, აშშ-ის სამხედრო-სამართალდამცავმა ძალებმა ვენესუელის პრეზიდენტი, ნიკოლას მადურო მის მეუღლესთან ერთად დააკავეს.
პაპუაშვილის თქმით, ვენესუელაში ჩატარებულმა “რამდენიმეწუთიანმა ოპერაციამ“ მხოლოდ დაადასტურა ის, რასაც საქართველოს ხელისუფლება დიდი ხანია ამტკიცებს – მეორე მსოფლიო ომის შემდეგ ჩამოყალიბებული საერთაშორისო წესრიგი დასრულებულია.
სოციალურ ქსელში გამოქვეყნებულ ვრცელ განცხადებაში პარლამენტის თავმჯდომარე ამტკიცებს, რომ მცირე სახელმწიფოებისთვის, მათ შორის საქართველოსთვის, საერთაშორისო სამართალი ისტორიულად იყო მთავარი დამცავი მექანიზმი, თუმცა მისი გავლენა “შეუქცევადად მცირდება“. ამ კონტექსტში პაპუაშვილი ხაზს უსვამს, რომ საქართველოს ხელისუფლების ორი ძირითადი ამოცანა უცვლელია – ტერიტორიული მთლიანობის აღდგენა და მოსახლეობის კეთილდღეობის უზრუნველყოფა – და აცხადებს, რომ ამ მიზნების მიღწევის გზაზე “პოლიტიკური ილუზიებისა და სენტიმენტების ადგილი არ არის“.
პაპუაშვილი ასევე აკრიტიკებს შიდა პოლიტიკურ ოპონენტებს, რომლებიც, მისი თქმით, სხვადასხვა დროს მაიდანის, ნეპალისა და ახლა უკვე ვენესუელის სცენარის გამეორებაზე “ოცნებობენ“. მისი შეფასებით, ეს არის პოლიტიკური ჯგუფი, რომელმაც შიდა მხარდაჭერა დაკარგა და ძალაუფლების დაბრუნებას გარე ჩარევის გზით ცდილობს. ამ პროცესს ის გლობალური მოვლენების ერთგვარ “ლუსტრაციად“ აფასებს, რომელიც საზოგადოებაში არსებულ რეალურ განწყობებს აჩენს.
ვენესუელასთან დაკავშირებული მოვლენების ფონზე, პარლამენტის თავმჯდომარე ბრიუსელზეც აკეთებს მკაცრ აქცენტებს და ამტკიცებს, რომ ევროკავშირი, საჭიროების შემთხვევაში, თავადაც არ ერიდება საერთაშორისო წესრიგის რღვევას საკუთარი ინტერესებისთვის. მისი თქმით, საქართველოს მიმართ ევროკავშირის პოლიტიკაშიც არსებობს საერთაშორისო სამართლის დარღვევის მაგალითები.
განცხადების ბოლოს პაპუაშვილი აღნიშნავს, რომ იანვრის დასაწყისში დაწყებულმა “საერთაშორისო ქარიშხალმა“ კიდევ უფრო გაამყარა ხელისუფლების გადაწყვეტილება, 2026 წლამდე არ გადაუხვიოს მშვიდობის პოლიტიკას და არ ჩაერთოს “სხვების სცენარებში“. მისი თქმით, ხელისუფლების უკან დგას მოსახლეობა, რომელსაც სურს მშვიდობა, კეთილდღეობა და დამოუკიდებელი, გამთლიანებული საქართველო.
