პარლამენტის თავმჯდომარე: ზურაბიშვილს გული არ შესტკივა კონსტიტუციისთვის, თავს ქვეყნის შვილად არ მიიჩნევს

შალვა პაპუაშვილი სალომე ზურაბიშვილზე

საქართველოს პარლამენტის თავმჯდომარე შალვა პაპუაშვილი პრეზიდენტ სალომე ზურაბიშვილის მიუნხენის კონფერენციაზე ვიზიტთან დაკავშირებით ამბობს, რომ ზურაბიშვილს გული არ შესტკივა კონსტიტუციისთვის და თავს “ქვეყნის შვილად” არ მიიჩნევს.

“სალომე ზურაბიშვილი თავს ამ ქვეყნის შვილად არ მიიჩნევს, მას ეს კონსტიტუცია არ მიუღია. მას გული არ შესტკივა თითოეული სიტყვისთვის, რაც ამ კონსტიტუციაში წერია.

იმიტომ, რომ ეს სიტყვები კონსტიტუციაში ჩვენი სისხლით ჩაიწერა, 9 აპრილის გმირების სისხლით ჩაიწერა ყველა სიტყვა ამ კონსტიტუციაში. ამიტომ მისთვის ეს ღირებულება არ არის, მისთვის ეს არის ჩვეულებრივი ფურცლები, რომლებიც თაროზე წიგნების სახით დევს. ამიტომაც არის, რომ ის აცხადებს, რომ მისთვის კონსტიტუცია არაფერი არ არის, ის იქცევა ისე, როგორც მას სურს. 

მას, კიდევ ერთხელ, საქართველო ჰგონია საკუთარი რეზიდენციის უკანა ეზო. ის არ წარმოადგენს საქართველოს და კარგია, რომ თავის დროზე გაირკვა, მათ შორის, საკონსტიტუციო სასამართლოს გადაწყვეტილებით და ის ისაუბრებს, როგორც კერძო პირი და ვერანაირ ზიანს საქართველოს ამით ვერ მიაყენებს.” – განაცხადა პაპუაშვილმა.

● “კითხვების მთავარი ადრესატი ივანიშვილია, ვინც რეალურად მართავს ქვეყანას” – პრეზიდენტის ბოლო ანგარიში პარლამენტს
● რა იყო ეს? – ექსპერტები საქართველოს პრეზიდენტის არშემდგარ იმპიჩმენტს აფასებენ
● მოსაზრება: ზურაბიშვილი საბოლოოდ გათავისუფლდა ბიძინა ივანიშვილის კომპლექსისგან და ყველაფერს დაარქვა თავისი სახელი

საქართველოს პრეზიდენტი მიუნხენის უსაფრთხოების კონფერენციაზე

პრეზიდენტის ადმინისტრაციის ცნობით, ზურაბიშვილი მიუნხენში გუშინ, 15 თებერვალს გაემგზავრა. 

“16-18 თებერვალს საქართველოს პრეზიდენტი მიუნხენის კონფერენციაზე მსოფლიო ლიდერებთან, სახელმწიფოს მეთაურებთან და საერთაშორისო ორგანიზაციების წამყვან წარმომადგენლებთან ერთად, მონაწილეობას მიიღებს საერთაშორისო უსაფრთხოების საკითხებზე დისკუსიებში.

მიუნხენის უსაფრთხოების კონფერენციაზე, რომელიც მსოფლიოში წამყვანი ფორუმია საერთაშორისო უსაფრთხოების თემებზე სასაუბროდ, საქართველოს პრეზიდენტი სიტყვით გამოვა პანელზე „უფრო ღრმა, ფართო და უნარიანი ევროკავშირი“ და მონაწილეობას მიიღებს დისკუსიაში: ნატოს აღმოსავლეთ ფლანგის მზადყოფნის უზრუნველყოფა (Better Safe Than Sorry: Securing NATO’S Easters Flank Readiness).” – აცხადებს ადმინისტრაცია.

პრეზიდენტს ერთხელ უკვე ადანაშაულებდნენ კონსტიტუციის დარღვევაში

ზურაბიშვილის იმპიჩმენტის ინიციატივით გასული წლის პირველ სექტემბერს მმართველი პარტია, „ქართული ოცნება“ გამოვიდა და შესაბამისი პროცედურებიც დაიწყო. იმპიჩმენტის მიზეზად გამოცხადდა ის, რომ პრეზიდენტმა უხეშად დაარღვია კონსტიტუცია, როდესაც მთავრობის თანხმობის გარეშე ევროპის ქვეყნებში რამდენიმე ვიზიტი განახორციელა.

პრეზიდენტის ვიზიტები მთავრობის მიერ მართლაც არ ყოფილა ვიზირებული. ამ ბრალდებას ზურაბიშვილმა უპასუხა იმით, რომ უცხოურ ვიზიტებში ის საკუთარი სახსრებით ჩავიდა და საზღვარგარეთ საქართველოსთვის ევროკავშირის კანდიდატის სტატუსის მინიჭებას ლობირებდა.

ვიდრე იმპიჩმენტის საკითხი პარლამენტში კენჭისყრაზე გავიდოდა, საკონსტიტუციო სასამართლოს უნდა დაედგინა, დაარღვია თუ არა პრეზიდენტმა კონსტიტუცია. სასამართლომ კონსტიტუციის დარღვევა დაადგინა.

როგორც მოსალოდნელი იყო, ოპოზიციამ არ დაუჭირა მხარი პრეზიდენტის იმპიჩმენტს. 86 მომხრე, 1 წინააღმდეგი – ასეთი იყო კენჭისყრის შედეგები.

გუშინ ცნობილი გახდა, რომ სალომე ზურაბიშვილის 2024 წლის დეკლარაციის მიხედვით, პრეზიდენტმა ევროპის ქვეყნებში ვიზიტების განსახორციელებლად პირადი სახსრებიდან 48 217 ლარი დახარჯა. 

პრეზიდენტის ბოლო დეკლარაციაში მითითებულია მის მიერ ქველმოქმედებაში დახარჯული თანხაც, რაც 55 275 ლარს შეადგენს. 

გუშინვე “ქართული ოცნების” ახალმა თავმჯდომარემ, ირაკლი ღარიბაშვილმა სალომე ზურაბიშვილს მოღალატე უწოდა.