"პატივი უნდა ვცეთ კონსტიტუციას" - რა თქვა პარლამენტის თავმჯდომარემ პრეზიდენტის იმპიჩმენტზე და ევროკავშირზე

შალვა პაპუაშვილი პრეზიდენტის იმპიჩემნტზე და ევროკავშირზე

პარლამენტის თავმჯდომარემ შალვა პაპუაშვილმა ჟურნალისტებთან ევროკავშირის წევრობის სტატუსთან დაკავშირებით განაცხადა, რომ ევროკავშირის მხრიდან უსამართლო გადაწყვეტილებები ხშირად მიიღება ხოლმე. მისივე განმარტებით, იმაზე, თუ რა გადაწყვეტილებას მიიღებს ევროკავშირი, საქართველოს ხელისუფლებას გავლენა არ აქვს.

პაპუაშვილი “ქართული ოცნების” მხრიდან პრეზიდენტ სალომე ზურაბიშვილის იმპიჩმენტსაც გამოეხმაურა და აღნიშნა, რომ თუ საქართველოს პრეზიდენტი პატივს არ სცემს საქართველოს კონსტიტუციას და “ჩვენ თვითონ არ ვცემთ პატივს ჩვენს კონსტიტუციას, მაშინ არავინ სცემს პატივს არც ჩვენს კონსტიტუციას და არც ჩვენს სახელმწიფოს.”

მან ჟურნალისტებთან იმპიჩმენტის პროცედურა განმარტა და განაცხადა, რომ როდესაც პარლამენტს მოუწევს საკონსტიტუციო სასამართლოს გადაწყვეტილებისთვის კენჭისყრა, თითოეული დეპუტატის პოლიტიკური პასუხისმგებლობის საკითხი დადგება.

რა თქვა პარლამენტის თავმჯდომარემ:

ევროკავშირის შესახებ

„რაც შეეხება ევროკავშირის გაფართოებასა და გაწევრიანების პერსპექტივას, აქ არის ორი მხარე:

1. თავად ევროკავშირი, რომელმაც უნდა მიიღოს ეს გადაწყვეტილება და ვხედავთ, რომ ამ გადაწყვეტილებას აქვს როგორც ობიექტური, ასევე პოლიტიკური განზომილება. შარშან ეს განზომილება ქართულმა საზოგადოებამ მწარედ იწვნია, როდესაც ევროკავშირის აბსოლუტურად უსამართლო გადაწყვეტილება ვიხილეთ, რომ ლიდერ ქვეყანას არ მიენიჭა კანდიდატის სტატუსი და ლიდერის უკან მდგომ ქვეყნებს მიენიჭათ. ჩვენ ევროკავშირის გადაწყვეტილებების წინასწარ განჭვრეტა ამიტომ გვიჭირს. გარდა ობიექტური, განზომადი კრიტერიუმებისა, შემოდის ხოლმე სხვადასხვა პოლიტიკური თემები, სხვადასხვა ქვეყნიდან, ამის არც განჭვრეტა შეგვიძლია წინასწარ და სამწუხაროდ, ზოგიერთ საკითხზე არც რაიმე ზემოქმედება.

მეორე მხარეს დგას ჩვენი სახელმწიფო და ამ შემთხვევაში, ჩვენი პასუხისმგებლობა ჩვენი ხალხის წინაშე არის ის, რომ კეთილსინდისიერად მოვამზადოთ ჩვენი ქვეყანა ევროკავშირის წევრობისთვის. აქამდე ნებისმიერი შეფასება აჩვენებდა, რომ საქართველო იყო და რჩება ლიდერი ყველა იმ ქვეყანასთან შედარებით, რომელიც ევროკავშირის სავარაუდო წევრი, კანდიდატი ქვეყანაა.

ჩვენ ვართ ლიდერები ბევრი მიმართულებით: ეკონომიკური განვითარება თუ ინსტიტუციური მოწყობა. მთავარია, რომ ვიყოთ საზოგადოების წინაშე პირნათელი და რა გადაწყვეტილებას მიიღებს ევროკავშირი, სამწუხაროდ, ამაზე ვხედავთ, რომ გავლენა არ გვაქვს და ასევე, სამწუხაროდ, ვხედავთ, რომ უსამართლო გადაწყვეტილებები მიიღება ხოლმე ევროკავშირის მხრიდან.“

● “საქართველოს თანხვედრა ევროკავშირის პოლიტიკასთან 28 პროცენტამდე ჩამოვიდა” – დებატები ევროპარლამენტში
● შარლ მიშელი: ევროკავშირი და წევრობის მსურველები 2030 წლისთვის მზად უნდა იყვნენ გაფართოებისთვის

პრეზიდენტის ვიზიტების და იმპიჩმენტის შესახებ

„რაც შეეხება ამ ვიზიტებს, ვფიქრობ, რომ აქ სადავო არაფერი არ არის, არავინ არ უარყოფს, რომ ეს არის აშკარა დარღვევა კონსტიტუციის და კონსტიტუციის წინააღმდეგ წასვლა. არის მცდელობები, რომ სხვადასხვა მოტივაციით გაამართლონ, არანაირი მოტივაცია კონსტიტუციის დარღვევას არ ამართლებს, ეს არის ყველაზე ძირეული საკითხი.

კონსტიტუციას სხვა ქვეყნებში მოიხსენიებენ, როგორც ძირითად კანონს და როცა ვსაუბრობთ ჩვენ ძირითად კანონზე, მისი დარღვევა არის აბსოლუტურად მიუღებელი. შესაბამისად, ერთადერთი რეაქცია, რაც შეიძლება ამაზე ყოფილიყო და პასუხისმგებლობა, პარლამენტის შემთხვევაში მდგომარეობს იმაში, რომ ჩვენ მივმართოთ საკონსტიტუციო სასამართლოს, რათა საკონსტიტუციო სასამართლომ მისცეს სამართლებრივი შეფასება ამ ქმედებას და ვფიქრობ, ეს არის ჩვენი პასუხისმგებლობა ჩვენი კონსტიტუციის მიმართ.

რაც შეეხება პროცედურას, საჭიროა პარლამენტის 50 წევრის ხელმოწერა, უმრავლესობას, რა თქმა უნდა, დეპუტატების ეს რაოდენობა ჰყავს და ამიტომ ჩვენ ამ პროცედურისთვის მივმართავთ საკონსტიტუციო სასამართლოს.

შემდეგ საკონსტიტუციო სასამართლოს აქვს ერთი თვე იმისთვის, რომ საკუთარი დასკვნა დადოს ამ საკითხთან დაკავშირებით და მას შემდეგ, რაც საკონსტიტუციო სასამართლო მისცემს სამართლებრივ შეფასებას, უკვე 2 კვირის განმავლობაში პარლამენტი კენჭს უყრის იმპიჩმენტის საკითხს, რომლისთვისაც საჭიროა 100 ხმა, რომელიც საპარლამენტო უმრავლესობას არ აქვს.

რა თქმა უნდა, იმ მომენტში დადგება უკვე საკითხი ყველა პარლამენტის წევრისა და საკონსტიტუციო სასამართლოს დასკვნის შემდეგ ყველამ საკუთარი პოლიტიკური პასუხისმგებლობით უნდა მიიღოს ეს გადაწყვეტილება. რადიკალურ ოპოზიციას რაც შეეხება, მე მგონია, მათ წინასწარ უკვე გააჟღერეს საკუთარი დამოკიდებულება ამ საკითხის მიმართ, მაგრამ ვნახოთ ის მომენტი და ამ მომენტში ყველას ექნება მისაღები გადაწყვეტილება.

გამომდინარე საკითხის სიმარტივიდან, საკონსტიტუციო სასამართლოს დასკვნაც იქნება, რომ ეს არის კონსტიტუციის დარღვევა და ამის პირობაზე, თუკი ვინმე მიიღებს ამის საწინააღმდეგო გადაწყვეტილებას, ესეც, რა თქმა უნდა, მათთვის პოლიტიკურად მძიმე გადაწყვეტილება იქნება, რომ კონსტიტუციის დარღვევას დაარქვან არდარღვევა.

ბოლო პერიოდში შეეჩვია ჩვენი რადიკალური ოპოზიცია – ომს არქმევენ მშვიდობას, ტერმინებს ატრიალებენ, მწამებელს არქმევენ დაზარალებულს, ადამიანს, რომელმაც ჩაიდინა დანაშაული არქმევენ პოლიტპატიმარს, ასე რომ, აქაც გამორიცხული არ არის, რომ კონსტიტუციის დარღვევას დაარქვან არ დარღვევა.“

● ორი აზრი: უნდა მისცენ თუ არა საქართველოს ევროკავშირის წევრობის კანდიდატის სტატუსი “ქართული ოცნების” პირობებში?
● ევროკავშირში საქართველოს ყოფილი ელჩი: NATO-ს კონტექსტში უკრაინისგან დაშორება რთული სანახავია
● ზურაბ ბატიაშვილის მოსაზრება: საქართველო, რომელიც თავის დროზე რეფორმების მედროშე იყო, ახლა ყველაზე ჩამორჩენილ ჯგუფშია

“ქართული ოცნება” საქართველოს პრეზიდენტის წინააღმდეგ იმპიჩმენტის პროცედურას იწყებს. ამის შესახებ ბრიფინგზე მმართველი პარტიის თავმჯდომარემ, ირაკლი კობახიძემ განაცხადა. კობახიძის განმარტებით, იმპიჩმენტის პროცედურა დაიწყება მიუხედავად იმისა, რომ მის აღსრულებას პარლამენტში ოპოზიციის მხარდაჭერაც სჭირდება.

გარდა ამისა, კობახიძის თქმით, პრეზიდენტის მიერ კონსტიტუციის დარღვევის ფაქტზე „ქართული ოცნება“ მიმართავს საკონსტიტუციო სასამართლოსაც.

საქართველოს პრეზიდენტის ადმინისტრაციამ 30 აგვისტოს გამოაქვეყნა განცხადება, რომლის მიხედვით, საქართველოსთვის ევროკავშირის წევრობის კანდიდატი ქვეყნის სტატუსის მინიჭების მხარდასაჭერად პრეზიდენტი სალომე ზურაბიშვილი ევროპელ ლიდერებთან შეხვედრებს იწყებს.

მალევე საქართველოს მთავრობა სალომე ზურაბიშვილის გერმანიაში დაგეგმილ ვიზიტს გამოეხმაურა და განმარტა, რომ პრეზიდენტს უარი გერმანიის გარდა, უკრაინაში ვიზიტზეც უარი ეთქვა. ზურაბიშვილს ასევე უარი ეთქვა შვეიცარიაში, პოლონეთში, ბელგიაში, დანიაში, არაბთა გაერთიანებულ საამიროებში, ბულგარეთში, ჩეხეთსა და ისრაელში დაგეგმილ შეხვედრებზეც.