სენატორი ჯინ შაჰინი: საქართველოში უკუსვლაა - შესაძლოა გადავხედოთ სტრატეგიას დახმარებასთან დაკავშირებით

სენატორი ჯინ შაჰინი

სენატორი ჯინ შაჰინი ამბობს, რომ საქართველოში უდიდესი უკუსვლაა და შესაძლოა იფიქრონ, არის თუ არა დრო, რომ გადახედონ სტრატეგიას საქართველოს დახმარებასთან დაკავშირებით. ამის შესახებ მან შშ-ის სენატის საგარეო ურთიერთობათა კომიტეტის სხდომაზე განაცხადა.

როგორც შაჰინი ამბობს, საქართველოს მთავრობამ განაცხადა, რომ კანდიდატის სტატუსის მიღება იყო მთავარი ვალდებულება:

“ასე უთხრა {მთავრობამ} საზოგადოებას საქართველოში, შეერთებულ შტატებსა და ევროპულ გაერთიანებასაც, მაგრამ აშკარად გადაუხვიეს საკუთარ ვალდებულებას. მისი განმარტებით, სწორედ ამიტომ, ვფიქრობ, მნიშვნელოვანია ვიფიქროთ სხვა არჩევანზე და შევეცადოთ ისინი ანგარიშვალდებულები გავხადოთ, მათ უნდა იცოდნენ, რომ ამას შედეგი მოყვება და შესაძლოა, ზოგიერთი შედეგი დაკავშირებული იყოს დახმარებასთან, რომელიც გვინდა, რომ ქვეყანას მივცეთ.”

სენატორის განმარტებით, აშშ საქართველოს უწევს მნიშვნელოვან მხარდაჭერას რეფორმების დღის წესრიგისთვის და ეს დახმარება უნდა დაუკავშირდეს საქართველოს მხრიდან საპასუხო ქმედებებს, “მაგრამ დამარწმუნეს სახელმწიფო დეპარტამენტის ოფიციალურმა პირებმა და პალატის წევრებმა ბიუჯეტზე მოლაპარაკების ბოლო რაუნდისას, რომ შესაძლოა, არ იყოს ამის გაკეთება კარგი”, მაგრამ, როგორც შაჰინი ამბობს, “საჭიროა ვიფიქროთ, არის თუ არა დრო, რომ გადავხედოთ” ჩვენს სტრატეგიას საქართველოზე.

სენატორ შაჰინის განცხადებას გამოეხმაურა მმართველი პარტია “ქართული ოცნების” თავმჯდომარე ირაკლი კობახიძე. მისი თქმით, “ნამდვილად არ არის საინტერესო” აშშ-ის სენატის მიერ საქართველოს დახმარების სისტემაზე შესაძლო ცვლილებები, რადგან მისი თქმით, ამ დაფინანსების უდიდესი ნაწილი მიდის არასამთავრობოებზე.

კობახიძე სენატში გამართულ დებატებზე, სადაც საქართველოში დემოკრატიის უკუსვლაზე ისაუბრეს ამბობს, რომ მათ მიერ საქართველოს “უსამართლო კრიტიკას არ აქვს ფასი”.

“ჩვენთვის უსამართლო კრიტიკას არ აქვს ფასი, ფასი შეიძლება ჰქონდეს მხოლოდ ისეთ კრიტიკას, რომელსაც აქვს კონკრეტული საფუძველი. NGO-ები დაფინანსდებიან თუ არა, ამაზე ინერვიულონ NGO-ებმა. ძირითადად, ეს არის NGO-ების დაფინანსება, უდიდესი ნაწილი არის მათი დაფინანსება“, – ამბობს კობახიძე.

“დამსახურებაზე დაფუძნებული დახმარების სისტემა” ნიშნავს, რომ იმ შემთხვევაში, თუ საქართველო შეასრულებს რეფორმებს და ვალდებულებებს, პარტნიორების მხრიდან მიიღებს დახმარებას.

სენატში შეშფოთებას გამოთქვამენ და ამბობენ, რომ საქართველოში არის დემოკრატიის უკუსვლა და სწორედ ეს არის მიზეზი იმისა, რომ საქართველომ ევროკავშირის კანდიდატის სტატუსი ვერ მიიღო. 

● კელი დეგნანი: დამაბნეველია მთავრობის დამოკიდებულება მათ მიმართ, ვინც პარტნიორობას ძირს უთხრის
●ადამ კიზინგერი: რუსული პროპაგანდაა, როცა მესმის, რომ აშშ საქართველოს ომში ჩათრევას ცდილობს
● გადაწყვეტილება მიღებულია: უკრაინას და მოლდოვას კანდიდატის სტატუსი მისცეს. საქართველოს – მხოლოდ პერსპექტივა

აშშ-ს სენატის საგარეო საქმეთა კომიტეტის სხდომაზე ისაუბრა ევროპულ და ევრაზიულ საკითხებში სახელმწიფო მდივნის თანაშემწემ, კარენ დონფრიდმაც, რომელმაც განაცხადა, რომ “ის, რასაც ბოლო პერიოდში ვხედავთ, ჩვენთვის ძალზე შემაშფოთებელია, რადგან ვნახეთ დემოკრატიის უკუსვლა საქართველოში”. დონფრიდმა ასევე ისაუბრა საქართველოში დემოკრატიული პროგრესის ნაკლებობაზე და შეეხო საქართველოში აშშ-ს ელჩ კელი დეგნანზე თავდასხმებს.

მისივე თქმით, აშშ მზად არის ევროკავშირთან ერთად დაეხმაროს საქართველოს, გაატაროს კანდიდატის სტატუტის მისაღებად საჭირო რეფორმები და იმედს გამოთქვამს, რომ ამ მიმართულებით საქართველოში პროგრესი იქნება.

8 ნოემბერს ევროპარლამენტარებმა ბრიუსელში, საგარეო კომიტეტის სხდომაზე, საქართველოს ევროკავშირთან ასოცირების შეთანხმების დანერგვის ყოველწლიური ანგარიში განიხილეს. მიღებული კომპრომისული დოკუმენტის მიხედვით, ბიძინა ივანიშვილი აღარ არის ნახსენები როგორც ოლიგარქი, თუმცა დეოლიგარქიზაციის პუნქტის თავშივე მოცემულია მისი სახელი და გვარი და წერია, რომ აუცილებელია ივანიშვილის ჭარბ გავლენებთან დაკავშირებით მიღებული იყოს, მათ შორის, საკანონმდებლო გადაწყვეტილებები.

გარდა ამისა, დოკუმენტში საუბარია მედიის შევიწროებაზე, პოლიტიკურ დევნაზე, სახალხო დამცველის არჩევის წესზე და ასევე, ევროპარლამენტი მოუწოდებს საქართველოს ხელისუფლებას, “ჰუმანიტარული მიზნებით და პოლარიზაციის შესამცირებლად”, გადაიყვანოს მიხეილ სააკაშვილი საზღვარგარეთ სამკურნალოდ.