ამერიკელმა სენატორებმა, ჯინ შაჰინმა და ჯიმ რიშმა, შეერთებული შტატების სახელმწიფო მდივანს და საერთაშორისო განვითარების სააგენტოს (USAID) ხელმძღვანელს წერილი გაუგზავნეს, რომელშიც ისინი ადმინისტრაციას, საქართველოში გრძელვადიანი სადამკვირვებლო მისიის შექმნას სთხოვენ 2024 წლის არჩევნებისთვის. ამის შესახებ ინფორმაციას „ამერიკის ხმა“ ავრცელებს.
როგორც სენატორების წერილშია ნათქვამი, მისია 2024 წლის არჩევნებს დააკვირდება, იმისთვის, რომ მათი დემოკრატიისთვის “ამ გადამწყვეტ მომენტში”, მხარი დაუჭიროს საქართველოს და ქართველ ხალხს. სენატორები ადმინისტრაციას ასევე მოუწოდებენ, ევროპელ მოკავშირეებთან ერთად, საქართველოში მაღალი დონის ვიზიტები პრიორიტეტად დაისახონ.
“ამერიკის ხმა”მოპოვებულ წერილზე დაყრდნობით წერს, რომ ორივე სენატორი, 2012 წლის არჩევნებზე, საქართველოში დამკვირვებლის სტატუსით იმყოფებოდა და ამ ვიზიტის შემდეგ, “სამწუხაროდ, საქართველოში დემოკრატიული ინსტიტუტების ეროზიის მოწმენი გავხდით და ვხედავთ მზარდ ნიშნებს, რომ საქართველოს დემოკრატიისკენ სვლა შეჩერდა”.
“საქართველო გზაჯვარედინზეა და საქართველოს დემოკრატიის წარმატება, ჩვენს [შეერთებული შტატების] ეროვნულ ინტერესებში შედის. საქართველოს სუვერენიტეტისადმი და ევროკავშირსა და ჩრდილო ატლანტიკური ხელშეკრულების ორგანიზაციაში გაწევრიანების თაობაზე, კონგრესის ორპარტიული მხარდაჭერა კვლავ ძლიერია. მაგრამ, მთავრობის ბოლოდროინდელი უკუსვლა გვაიძულებს ადმინისტრაციას ვთხოვოთ, საქართველოში დემოკრატიისა და მმართველობის მდგომარეობასთან დაკავშირებით ზომები მიიღოს.” – ამბობენ რიში და შაჰინი.
სენატორების შეფასებით, საქართველოში დემოკრატიის უკუსვლის ტენდენციის მაჩვენებელია ისიც, რომ ევროკომისიამ საქართველოს კანდიდატის სტატუსი არ მიანიჭა მაშინ, როცა მიიჩნია, რომ უკრაინა და მოლდოვა ამ სტატუსისთვის მზად იყვნენ.
წერილში შაჰინი და რიში ევროკავშირის 12 პრიორიტეტზეც საუბრობენ და ხაზს უსვამენ, რომ ცოტა ხნის წინ, საქართველოს პარლამენტში შესული “კანონი უცხოელი აგენტების შესახებ”, სამოქალაქო საზოგადოებისა და დამოუკიდებელი მედიის დასუსტების მცდელობა იყო, რაც საქართველოს კანდიდატის სტატუსს უფრო დააშორებდა.
“მიუხედავად იმისა, რომ საქართველოს პარლამენტმა სწორი გადაწყვეტილება მიიღო შემოთავაზებული კანონმდებლობის ჩაგდებით, ჩვენ გვაშფოთებს ის, რომ ამ კანონპროექტის წარდგენა და [პარლამენტის მიერ] მისი დაჩქარების მცდელობა, გამოცხადებული ევროატლანტიკური მომავლისკენ მიმავალი გზიდან გადახვევის შემაშფოთებელი ნიშანია.” – ნათქვამია სენატორების წერილში.
ამასთან, სენატორები ადმინისტრაციას სათანადო ფინანსური რესურსის მიმართვას სთხოვენ იმისთვის, რომ საქართველოში 2024 წლის არჩევნებმა ქართველი ხალხის ნება ასახოს და სურვილები დააკმაყოფილოს.
ირაკლი კობახიძე: სააკაშვილის რეჟიმის მეგობრები იყვნენ, არ გვიკვირს უკუსვლაზე საუბარი
მმართველი პარტიის თავმჯდომარე ირაკლი კობახიძე სენატორების განცხადებას ბრიფინგზე გამოეხმაურა და მათ “სააკაშვილის რეჟიმის მეგობრები” უწოდა.
“ეს ორი სენატორი 2012 წლამდე იყო ბედნიერი საქართველოში დემოკრატიული პროგრესით. ეს ხდებოდა 2012 წლამდე. ისინი იყვნენ სააკაშვილის და მისი რეჟიმის მეგობრები. სამწუხაროდ, ისინი იწონებდნენ იმ სისხლიან რეჟიმს, რომელიც იყო ჩამოყალიბებული საქართველოში 2012 წლამდე, ამ ფონზე შეიძლება, არ გაგვიკვირდეს, რომ დღეს ისინი ჩვენს დემოკრატიულ მდგომარეობას უწოდებენ უკუსვლას ყოველგვარი ფაქტისა და მტკიცებულების გარეშე. არის აშკარა პოლიტიკური მიკერძოება. ჩვენ პატივს ვცემთ ნებისმიერ სენატორს, მათ შორის მათ პოლიტიკური მიკერძოების გათვალისწინებით, როგორი მიუღებელიც არ უნდა იყოს ჩვენთვის.” – განაცხადა კობახიძემ.
