შოვის ტრაგედიის შესახებ, ხელისუფლების წარმომადგენლების განცხადებებს საზოგადოების მხრიდან კრიტიკა მოჰყვა. დღეს მმართველი პარტიის თავმჯდომარემ, ირაკლი კობახიძემ “სპეკულაცია” უწოდა ერთ-ერთი გადარჩენილის ნაამბობს. ეჭვის ქვეშ დააყენეს გადარჩენილების მოყოლილი “ქართული ოცნების” სხვა დეპუტატებმაც – მამუკა მდინარაძემ და დიმიტრი სარჯველაძემ.
შოვში, სტიქიის დროს გადარჩენილმა ერთ-ერთმა მოქალაქემ, დავით ჯელაძემ სოციალურ ქსელში სტიქიის ზონიდან ფოტო გაავრცელა და დაწერა, რომ მან და მისმა დისშვილმა, მაშომ გზა ერთი ნაპირიდან მეორემდე ერთად გაიარეს.
“ქართული ოცნების” თავმჯდომარე, ირაკლი კობახიძე დავით ჯელაძის მიერ მიერ სოციალურ ქსელში გავრცელებულ პოსტს გამოეხმაურა და თქვა, რომ ფოტოს დეტალები გასარკვევი და გადასამოწმებელია. რადგან, მისი განცხადებით, იმ ადგილზე ერთი ნაპირიდან მეორეზე გადასვლა პრაქტიკულად შეუძლებელი იყო.
“ქართული ოცნების” აღმასრულებელი მდივანი, მამუკა მდიანარაძე კი ამბობს რომ ჯელაძემ გადასვლა იქ შეძლო, სადაც ტალახის სიმაღლე მინიმალურ საშუალებას მისცემდა.
კიდევ ერთმა დეპუტატმა, პარლამენტის ადამიანის უფლებათა კომიტეტის თავმჯდომარემ, დიმიტრი სარჯველაძემ განაცხადა, რომ “თუ გადარჩა ადამიანი, ამ ტალახის მასაზე რატომ უნდა გადასულიყო, უბრალოდ არ ვიცი”
სოციოლოგ იაგო კაჭკაჭიშვილის თქმით, ხელისუფლებას სურს, მთლიანად აიცილოს პასუხისმგებლობა შოვის ტრაგედიაზე.
იაგო კაჭკაჭიშვილი:“ხელისუფლებას სურს, მთლიანად აიცილოს პასუხისმგებლობა შოვის ტრაგედიაზე და საქმე ისე წარმოაჩინოს, რომ ეს ტრაგედია სტიქიისა და ადამიანის დაპირისპირების შედეგია, რომელშიც სტიქიის დამანგრეველმა ძალამ გაიმარჯვა.
მტერია ყველა, ვინც ამ სახელისუფლო ნარატივს ანგრევს ან თუნდაც ბზარს უჩენს:
მტერია ექსპერტი, რომელიც ხელისუფლებას ეუბნება, რომ ადრეული შეტყობინების სისტემა სტიქიის ზონებში აუცილებელია;
მტერია სამოქალაქო საზოგადოების წევრი, რომელიც ხელისუფლებას დაგვიანებულ რეაგირებაზე და ღამით შეწყვეტილ ოპერაციაზე საყვედურობს;
მტერია ჟურნალისტი, რომელიც კატასტროფაში მოხვედრილი ადამიანებისგან უშუალო და ობიექტურ ინფორმაციას ასაჯაროებს;
მტერია დავით ჯელაძე, რომელიც თავისი ინდივიდუალური თავგანწირვით აკეთებს იმას, რაც ხელისუფლების მოვალეობაა;
მტერია მოქალაქე, რომელიც ამ ყველაფერს ხედავს, აცნობიერებს და ხელისუფლებას პასუხს სთხოვს.
მტრების ძიება და აღმოჩენა ავტორიტარიზმის საყვარელი და ბანალური ჰობია, რომელიც, წესით, ავტორიტარებს, რაღაც ეტაპზე, ბუმერანგივით დაუბრუნდება და დააზიანებს. ამის მაგალითებიც გვახსოვს.”
უფლებადამცველი ანა არგანაშვილი კი სვამს კითხვას: “თუ არაფერი აქვთ დასამალი [ხელისუფლების წარმომადგენლებს], ასეთი აგრესიულები რატომ არიან?”. არგანაშვილი ასევე ითხოვს შოვის ტრაგედიის გამოძიებას.
ანა არგანაშვილი: “გვჭირდება შოვში იმ დღის მაქსიმალურად ზუსტი სურათის რეპროდუქცია თვითმხილველთა მონაყოლიდან: რამდენი ადამიანი იყო, ვინ სად იდგა, ვის რომელმა ტალღამ გადაუარა, ვისი ხმა საიდან ისმოდა, ტალღის დარტყმიდან რამდენი წუთის შემდეგ ისმოდა ხმა.
ისევ მედიის იმედი თუ გვექნება ამის გაკეთებაში, გამოძიებას ჯერ მოწმეებიც კი არ დაუკითხავს, მაშინ როცა მედიამ თითქმის ყველა გადარჩენილი იპოვა და ჩაწერა, სანამ მათზე ზეწოლას დაიწყებდნენ.
თუ არაფერი აქვთ დასამალი, ასეთი აგრესიულები რატომ არიან. ვინც მართალია მას არ სჭირდება სხვებზე თავდასხმა, სიმართლე იცავს.”
3 აგვისტოს, კურორტ შოვში, მათ შორის სასტუმრო სანსეტ შოვთან მეწყერი ჩამოწვა. ადიდებულმა მდინარემ წაიღო სამანქანო ხიდი. მოსახლეობის დასახმარებლად ადგილზე ჩაფრინდა სასაზღვრო პოლიციის 2 სამაშველო ვერტმფრენი. სამაშველო ღონისძიებები ამ დრომდე გრძელდება. ოფიციალური ინფორმაციით, სტიქიას 24 ადამიანის სიცოცხლე ემსხვერპლა.
გარემოს ეროვნული სააგენტოს დასკვნის მიხედვით, ტრაგედიის მიზეზი გახდა რამდენიმე სტიქიური გეოლოგიური და ჰიდრომეტეოროლოგიური მოვლენების თანხვედრა, რამაც მდინარე ბუბუსწყლის ხეობაში ექსტრემალური ხასიათის ღვარცოფული ნაკადის ფორმირება გამოიწვია.
როგორც დასკვნაში წერია, მართალია, მეწყრული პროცესების ფორმირება მრავალი ფაქტორის თანხვედრამ გამოიწვია, თუმცა უშუალოდ ტრაგედიის დღეს მომხდარი სტიქია მყისიერად განვითარდა. დასკვნის თანახმად, არ დასტურდება გავრცელებული მოსაზრება, თითქოს სტიქიის განვითარებამდე ცოტა ხნით ადრე მდინარე ბუბას ხეობაში წყალი დაგუბდა.
ანგარიშში ნათქვამია, რომ მეწყრულ პროცესებს ხელი შეუწყო კლიმატურმა ცვლილებებმა – ბოლო პერიოდში მომატებულმა ჰაერის ტემპერატურამ გამოიწვია მყინვარების ინტენსიური დნობა და ჭარბი ატმოსფერული ნალექი.
გარემოს ეროვნული აცხადებს, რომ ამ ეტაპზე, საფრთხის შემცველი არ არის.
“აღსანიშნავია, რომ მდ. ბუბისწყლის კალაპოტში მიმდინარეობს სტიქიის თანმდევი პროცესები. მასშტაბური სტიქიების შემდეგ, ასეთი მოვლენები მოსალოდნელი ფაქტია. ამ ეტაპზე, აღნიშნული პროცესები საფრთხის შემცველი არ არის”, – აღნიშნავენ სააგენტოში.
