საწვავის დეფიციტი და რიგები ბენზინზე აფხაზეთში

აფხაზეთში საწვავის კრიზისია. ბენზინის ფასი გაიზარდა, ბენზინგასამართ სადგურებზე კი უზარმაზარი რიგებია. ხელისუფლება შექმნილ ვითარებას მიწოდებასთან დაკავშირებული სირთულეებით ხსნის, რომელიც რუსეთის რკინიგზის ზედმეტმა გადატვირთვამ, ტურისტების დიდმა რაოდენობამ და რუსული საწვავის უბაჟოდ იმპორტის კვოტის ამოწურვამ გამოიწვია, მაგრამ ბევრს ხელისუფლების განმარტებების არ სჯერა. 

დეფიციტი ჯერ კიდევ აგვისტოში შეიქმნა, რის შემდეგაც ხელისუფლებამ საწვავის ფასები, დაახლოებით, 15 პროცენტით გაზარდა. თუმცა, ამ ნაბიჯმა სიტუაცია ვერ დაასტაბილურა. 

სექტემბრის დასაწყისში, ბენზინის არქონის გამო, ავტოგასამართი სადგურების ნაწილი დაიხურა, დარჩენილებთან კი გრძელი რიგები დადგა. მანქანის საწვავით შესავსებად, მძღოლებს, ხანდახან, რამდენიმე საათით უწევთ რიგში დგომა.  

• მოსაზრება: ენერგოკრიზისი აფხაზეთში ვერ გადაიჭრება, სანამ ქსელში კერძო ბიზნესს არ დაუშვებენ
• აფხაზი პოლიტოლოგი ასტამურ ტანია ქართულ-აფხაზურ ურთიერთობებზე
• მოსაზრება: აფხაზეთი – დროა, ანგარიში გავასწოროთ

საკურორტო სეზონის განმავლობაში, მაისიდან სექტემბრამდე, რუსეთის ჩრდილოეთ კავკასიის რკინიგზაზე, ტრადიციულად იზრდება სამხრეთ მიმართულებით მატარებლების რაოდენობა, განაცხადა ეკონომიკის მინისტრმა, კრისტინა ოზგანმა. 

წელს, პანდემიისა და საზღვრების ჩაკეტვის გამო, გზების გადატვირთვის ყველანაირი რეკორდი მოიხსნა, რადგან გასულ წელთან შედარებით, სამგზავრო მატარებლების რაოდენობა სოჭის მიმართულებით 100 ერთეულით გაიზარდა. ამის გამო, სატვირთო შემადგენლობები, კერძოდ, ბენზინით დატვირთული, დიდი დაგვიანებით დადის. 

გარდა ამისა, ეკონომიკის სამინისტროს მონაცემებით, გასულ წლებთან შედარებით, ტურისტების უზარმაზარი ნაკადის გამო, 35-40 პროცენტით გაიზარდა ბენზინის მოხმარებაც. 

სწორედ მოხმარების მოცულობის ზრდით ხსნის კრისტინა ოზგანი საწვავზე ფასების მატებას. 

რვა თვის განმავლობაში, აფხაზეთმა ფაქტობრივად სრულად მოიხმარა ბენზინის წლიური კვოტა, რომელიც რუსეთის მთავრობასთან შეთანხმებით, აფხაზეთში საბაჟო გადასახადის გარეშე შედის.

აფხაზეთის მთავრობამ უკვე მიმართა რუსეთს თხოვნით, გაუზარდოს კვოტა დაუბეგრავ ბენზინზე 40 ათასი ტონით.

გარდა ამისა, სოციალურ ქსელებში აქტიურად აკრიტიკებენ ხელისუფლებას შექმნილი ვითარების გამო:

„რომელ გულუბრყვილო ადამიანებზე არის გათვლილი ეს არადამაჯერებელი განმარტებები? არანაირი კოლაფსი რუსულ რკინიგზაზე არ არის, ყველა სამსახური ზუსტად, გრაფიკით მუშაობს. ნავთობპროდუქტების გადაზიდვა ყოველთვის იდგა და დღესაც დგას სამგზავრო გადაზიდვებზე წინ პრიორიტეტების ჩამონათვალში, რადგან ამაზე არის დამოკიდებული ქვეყნის ეკონომიკა“.

„ხელისუფლებაში დილეტანტები არიან. ამ სიტუაციის პროგნოზირება ელემენტარული იყო და შეიძლებოდა ქვეყანაში საწვავის შემოტანა მანამ, სანამ რეზერვები ამოიწურებოდა“.

„ისეთი შეგრძნება მაქვს, რომ ეკონომიკის სამინისტროში დიდი პრობლემები აქვთ ანალიზსა და პროგნოზირებასთან დაკავშირებით. გასულ წელს მათ მაინინგის (კრიპტოვალუტის) ლეგალიზება მოიფიქრეს არსებული მწვავე ენერგოდეფიციტის ფონზე… საკურორტო სეზონის წინ, ყველა რუსული მედიასაშუალება აცხადებდა, რომ საზღვრების დაკეტვის გამო, რუსები დასასვენებლად წავიდოდნენ სოჭში, ყირიმსა და აფხაზეთში. ან ამ ინფორმაციამ ვერ მიაღწია ეკონომიკის სამინისტრომდე ან მიაღწია, მაგრამ შესაბამისი გადაწყვეტილების მიღების ნაცვლად, მათ შორის, რესპუბლიკის საწვავით უზრუნველყოფის ნაცვლად, იქ სიხარულისგან შამპანურის ბოთლის გახსნა გადაწყვიტეს“.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.
ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო