სავაჭრო ცენტრები მთავრობას ლოქდაუნის შემსუბუქების თხოვნით მიმართავენ

ლოქდაუნამდე ერთი დღით ადრე, თბილისში მოქმედი დიდი სავაჭრო ცენტრები მთავრობას მიმართავენ და ითხოვენ, რომ 24 დეკემბრამდე ერთი კვირით ადრე მიეცეთ გახსნის საშუალება, სანაცვლოდ კი იანვრის განმავლობაში დაიკეტონ. ამ საკითხზე მათ პრესკონფერენცია გამართეს.

“მზად ვართ, 16-დან 30 იანვრამდე პერიოდში სრულად დავიკეტოთ, ოღონდ დეკემბერში ეს დღეები დაგვიმატონ“, – განაცხადა პრესკონფერენციაზე მოლების წარმომადგენელმა.

● ახალი ცხოვრება ორი თვით. რა შეზღუდვები დააწესა საქართველოს მთავრობამ

● რა შეღავათები დაუწესდება ბიზნესს და რა დახმარებას მიიღებენ ოჯახები

როგორც პრესკონფერენციაზე ითქვა, არანაირი ინფორმაცია იმაზე, რომ იკეტებოდა სავაჭრო ცენტრები და იზღუდებოდა ტრანსპორტი, არ არსებობდა.

მოლების წარმომადგენლები აცხადებენ, რომ სავაჭრო ცენტრების დახურვა საფრთხეს უქმნის იმ 17, 000 მოქალაქეს, რომელსაც ისინი ასაქმებენ.

რაც შეეხება ფინანსურ ზარალს, ისინი ირწმუნებიან, რომ თუ დეკემბრის განმავლობაში სავაჭრო ინდუსტრია ვერ იმუშავებს, ჯამური ზარალი 1 მლრდ ლარამდე იქნება. მათივე გათვლებით, ყოველი დაკეტილი დღე მოლებისთვის დღიურად 10 მლნ ლარის ზარალს ნიშნავს, ხოლო მთლიანად სავაჭრო ინდუსტრიისთვის – 25 მლნ ლარის ზარალს.

“დაკეტვა დარტყმა იქნება ბიზნესისთვის, რომელიც ისედაც სულს ღაფავს. ინდუსტრია, დეკემბერში დახურვის შემთხვევაში, მილიარდამდე ლარს დაკარგავს“, – აცხადებენ მოლების წარმომადგენლები.

მოლები ასევე ითხოვენ ქონების გადასახადის გაუქმებას, ისე, როგორც ეს მოხდა სასტუმროების შემთხვევაში. ყველა მზად არის, სავაჭრო ცენტრებში დასაქმებული ადამიანები არ გაუშვას სახლში და გადაუხადოს ხელფასი.

პრესკონფერენციის ორგანიზატორების მიერ გავრცელებულ მედია ანონსში ხელმომწერ სავაჭრო მოლებს („თბილისი მოლი“, „ისთ ფოინთი“, „თბილისი ცენტრალი“, „ქარვასლა“, „სითი მოლი“ და „გლდანი მოლი“) შორის იყო ბიძინა ივანიშვილის თანაინვესტირების ფონდის კუთვნილი “გალერია თბილისიც”, თუმცა შემდეგ აღმოჩნდა, რომ ივანიშვილის სავაჭრო ცენტრი დანარჩენი მოლების მოთხოვნებს არ უერთდება. 

„ჩვენ არ ვუერთდებით ამ განცხადებას. ვაანალიზებთ, რომ ჩვენთვისაც და ჩვენი მოიჯარეებისთვისაც ფუნქციონირების შეწყვეტა ნიშნავს შემოსავლის შეწყვეტას, ამიტომ ამ პერიოდში მათ ვათავისუფლებთ იჯარის გადასახადისგან. ბუნებრივია, ჩვენც მივიღებთ ფინანსურ ზარალს, მაგრამ, ასევე, ვხვდებით რა ხდება ქვეყანაში – ეს მოცემულობაა“, – აცხადებენ „გალერია თბილისისში“.