სასამართლოს გადაწყვეტილებით, ბავშვებმა დაუყოვნებლივ უნდა დატოვონ ნინოწმინდის პანსიონი

მოსამართლე ივანე ღლონტმა დააკმაყოფილა ორგანიზაცია “პარტნიორობა ადამიანის უფლებებისთვის” სარჩელი. შესაბამისად, ნინოწმინდის პანსიონიდან ყველა ბავშვი დღესვე უნდა გამოიყვანონ და ისინი მიმღებ ოჯახებთან ან საოჯახო ტიპის თავშესაფრებში გადაიყვანონ. 

_______________________________

● სახელმწიფოს იქ არ უშვებენ. რა ხდება ნინოწმინდის ბავშვთა სახლში

____________________________________

ორგანიზაციამ შესაბამისი შუამდგომლობით სასამართლოს 4 ივნისს მიმართა. მათ სასამართლოს წარუდგინეს სხალთელი მთავარეპისკოპოსის, სპირიდონის მიერ გავრცელებული ვიდეომასალა, რომელშიც კარგად ჩანს ბავშვების სახეები.

ვიდეოში ეპისკოპოსი ბავშვებთან ერთად მაგიდასთან ზის და მათ შეკითხვებს უსვამს – სურთ თუ არა, რომ ისინი სოციალურმა მუშაკმა პანსიონატიდან წაიყვანონ. ბავშვები ტირილით პასუხობენ შეკითხვებს და ამბობენ, რომ არ სურთ პანსიონის დატოვება.

იურისტების, ანა არგანაშვილის და ანა აბაშიძის თქმით, ეს ვიდეო ადასტურებს, რომ ბავშვების სიცოცხლე და ჯანმრთელობა საფრთხის ქვეშაა.

“სასამართლო მივიდა დასკვნამდე, რომ დაკმაყოფილდა ჩვენი შუამდგომლობა, რაც ნიშნავს იმას, რომ დაუყოვნებლივ, ყოველგვარი ხელშეშლის გარეშე, დღესვე, ამ წამს უნდა დაიწყოს ბავშვების გაყვანა ნინოწმინდის პანსიონიდან”, – თქვა ანა აბაშიძემ. 

ანა არგანაშვილმა კი განმარტა, რომ ვინაიდან ორგანიზაცია “პარტნიორობა ადამიანის უფლებებისთვის” მუშაობს შშმ ადამიანის უფლებებზე, განაჩენში არსებობს ტექნიკური ჩანაწერი პანსიონიდან მხოლოდ შშმ ბავშვების გაყვანის შესახებ, მაგრამ, მისივე თქმით, თუ პანსიონში საფრთხე არსებობს, რომელზეც მოსამართლეც საუბრობს, არ შეიძლება იქ რომელიმე ბავშვი დარჩეს: 

“მთელი სასამართლო გადაწყვეტილება ეხება იმას, რომ იქ არის საფრთხე ყველა ბავშვისთვის. ყველა ბავშვის სიცოცხლეს და ჯანმრთელობას ეხება, ამიტომ ტექნიკური დეტალია. ჩვენ ღრმად ვართ დარწმუნებული, რომ თუ იქნება ეს საფრთხე, არ შეიძლება, რომელიმე ბავშვი დავტოვოთ საფრთხეში, მიუხედავად იმისა, რომ ჩვენ ჩვენი კანონმდებლობით სპეციალური განჩინებით მხოლოდ შშმ ბავშვების დაცვა შეგვიძლია”. 

დღეს ნინოწმინდის პანსიონში “ქართული ოცნების” წევრები – ბექა დავითულიანი, შალვა პაპუაშვილი და სოციალური მუშაკები შევიდნენ.

ზრუნვის სააგენტოს პროფესიული განვითარების უფროსმა განაცხადა, რომ სოციალური მუშაკები პანსიონში დარჩებიან იქამდე, სანამ თითოეული ბავშვის საჭიროება ინდივიდუალურად არ შეფასდება. ხოლო ბექა დავითულიანის თქმით, სოციალური მუშაკების პანსიონში შესვლა და დარჩენა ნიშნავს, რომ “ბავშვებიც და ადმინისტრაციაც მშვიდად იქნებიან.”

გუშინ ცნობილი გახდა, რომ სოციალური სამსახურის მიერ ნინოწმინდის პანსიონის შემოწმებისას ექვსმა არასრულწლოვანმა დაწესებულების დატოვების სურვილი გამოთქვა, იდენტიფიცირებულია კიდევ ათი ბავშვი, რომელთა გამოყვანაზეც მიმდინარეობს მუშაობა.

____________________________________

● სახალხო დამცველი: ნინოწმინდის პანსიონზე გამოძიება გაუპატიურების მუხლითაც მიმდინარეობს
● “გააღე პანსიონის კარი!” – მთავრობის ადმინისტრაციასთან აქტივისტებმა აქცია გამართეს

____________________________________

პანსიონის მოსწავლეების ფსიქოლოგიური და ფიზიკური შეურაცხყოფის შესაძლო ფაქტების შესახებ ინფორმაცია მედიაში აქტიურად განიხილება. საქართველოს სახალხო დამცველის აპარატის თანამშრომლები, რომლებიც პასუხისმგებელნი არიან ნებისმიერი დახურული დაწესებულების მონიტორინგზე, სხვა სამთავრობო დეპარტამენტებთან ერთად, პანსიონში არ დაიშვებიან.

მიზეზი მაღალი რანგის სასულიერო პირის – სხალთის მთავარეპისკოპოსის, მეუფე სპირიდონის ბრძანება იყო, რომელიც იმავდროულად ამავე პანსიონის რექტორია.

თვით მეუფემ, რომელმაც ვიდეომიმართვა ჩაწერა, თავისი უარი შემდეგნაირად განმარტა:

”ეს ის ხალხია, ვინც ოფიციალურად ითხოვს ერთსქესიანთა ქორწინების დაკანონებას. ჩემი პირადი მოსაზრებაა, რომ ასეთი ადამიანები არ უნდა შეუშვან ბავშვთა სახლში, ან საერთოდ არც ერთ ოჯახში.”

ამ კვირაში სახალხო დამცველმა ნინო ლომჯარიამ პროკურატურისგან შეიტყო, რომ ბოლო ხუთი წლის განმავლობაში შინაგან საქმეთა სამინისტრომ დაიწყო ოთხი გამოძიება ნინოწმინდის სკოლა-პანსიონის აღსაზრდელების მიმართ ძალადობის სავარაუდო ფაქტებზე, მათ შორის – სექსუალური ძალადობის შესახებ.

ამის შემდეგ შინაგან საქმეთა სამინისტრომ მორიგი შემოწმება დაიწყო. ამჯერად, გამოძიება საქართველოს სისხლის სამართლის კოდექსის 126-1 მუხლით დაიწყო, რაც არასრულწლოვანების მიმართ ძალადობას გულისხმობს.

ფაქტობრივად არ დარჩენილა არასამთავრობო ორგანიზაცია და პოლიტიკური ჯგუფი, რომელიც ნინოწმინდის პანსიონის ამბებს არ გამოეხმაურა. ამავე დროს, იმართება საპროტესტო აქციები მთავრობის კანცელარიასთან და პროკურატურასთან. 3 ივნისს ერთ-ერთ ასეთ აქციაზე პოლიციამ 9 ადამიანი დააკავა.

სამოქალაქო სექტორი ხელისუფლებას სთხოვს სასწრაფოდ მიიღონ ზომები და უზრუნველყონ პანსიონში სახალხო დამცველის მონიტორინგის ჯგუფის შესვლა. ხოლო ყველაზე დიდმა ოპოზიციურმა პარტიამ, “ერთიანმა ნაციონალურმა მოძრაობამ” პირდაპირ მოუწოდა ხელისუფლებას, სასწრაფოდ მიიღონ ადეკვატური ზომები.