აზერბაიჯანში, საქორწილო სუფრის გამო, ყოფილი და მოქმედი მაღალჩინოსნები დააკავეს
აზერბაიჯანში, პანდემიის შუა პერიოდში გამართული ქორწილი, ხმაურიანი სკანდალის მიზეზი გახდა. 22 აგვისტოს, 15-დღიანი პატიმრობა შეუფარდეს ქვეყანაში ერთ-ერთი ყველაზე გავლენიანი ადამიანის, პრეზიდენტის ყოფილი თანაშემწის, რამიზ მეჰდიევის სიძეს, რომელსაც ბევრი „რუხ კარდინალად“ მიიჩნევს.
მეჰდიევმა დღესასწაული თავისი შვილიშვილისთვის მოაწყო – კორონავირუსის პანდემიის პირობებში, როდესაც ქორწილები სრულიად აკრძალულია.
ამ სკანდალის ყველა მონაწილე – მაღალი რანგის ცნობილი ადამიანია.
• აზერბაიჯანში კარანტინის შეჩერებას მოითხოვენ, მედიკოსები კი ამაოდ ითხოვენ დისტანციის დაცვას
პატარძლის მამა, მეჰდიევის სიძე – ექსდეპუტატი, პრეზიდენტის სრული მოსახელე და მოგვარე ილჰამ ალიევია. სასიძოს მამა როვშან მუსტაფაევი – სახელმწიფო უსაფრთხოების სამსახურის პოლკოვნიკი, მანაც 15-დღიანი სასჯელი მიიღო.
2020 წლის მარტიდან, აზერბაიჯანში, კორონავირუსის პანდემიის გამო, ქორწილების გამართვა სასტიკად აკრძალულია. ამის შესახებ არაერთხელ ისაუბრეს პრეზიდენტმა ილჰამ ალიევმა, პრემიერ-მინისტრმა და კორონავირუსთან ბრძოლის ოპერატიული შტაბის წარმომადგენლებმა.
ქვეყნის რეგიონებში არაერთხელ აღკვეთეს ქორწილების გამართვის მცდელობები, რომლებშიც მინიმალური რაოდენობის სტუმრები მონაწილეობდნენ.
ასეთ ახალ ამბებში, ყოველთვის საუბრობდნენ ღონისძიების ორგანიზატორების დაკავებაზე, ქორწილის ყველა მონაწილეს კი პოლიციის განყოფილების დერეფნებში უღებდნენ ფოტოებს და შემდეგ ამ სურათებს მედიაში აქვეყნებდნენ.
ამ „მაღალი დონის“ ქორწილის ამსახველი ფოტოსურათები და ვიდეოები მედიაში მას შემდეგ მოხვდა, რაც ის Facebook-ის საკუთარ გვერდზე გამოაქვეყნა ერთ-ერთმა სტუმარმა, მომღერალმა აისელ თეიმურზადემ.
მას ბაქოში საზოგადოება კარგად იცნობს 2009 წელს, „ევროვიზიის“ კონკურსზე, არაშთან ერთად დუეტში გამოსვლით, სიმღერით, Always.
ქორწილი გაიმართა ბაქოს გარეუბანში, სოფელ ნოვხანში. ვიდეოზე ჩანს, რომ დღესასწაული დახურულ შენობაში გაიმართა, ადამიანები მაგიდებთან დიდ ჯგუფებად სხედან.
ამავდროულად, ოპერატიული შტაბის მიერ დადგენილი წესების თანახმად, ერთ მაგიდასთან მაქსიმუმ 6 ადამიანის ყოფნა შეიძლება, სუფრების დახურულ შენობებში გამართვა კი საერთოდ აკრძალულია.
სტუმართა შორის იყვნენ ყოფილი და მოქმედი მინისტრები, დეპუტატები და საზოგადოებისთვის ცნობილი ადამიანები.
თავად 82 წლის მეჰდიევი აზერბაიჯანის პრეზიდენტის ადმინისტრაციის უცვლელი ხელმძღვანელი იყო 1995 წლიდან მოყოლებული. მანამდე, ჯერ კიდევ საბჭოთა კავშირის პერიოდში, ის ანალოგიურ თანამდებობას იკავებდა მოქმედი პრეზიდენტის, ილჰამ ალიევის მამის კაბინეტში.
2019 წლის ოქტომბერში, ის თანამდებობიდან გადადგა. მან აზერბაიჯანის მეცნიერებათა აკადემიის პრეზიდენტის პოსტი დაიკავა და, ამავდროულად, აზერბაიჯანის უსაფრთხოების საბჭოს წევრია.
თავიდან, ხელისუფლება ცდილობდა ქორწილი „ჩვეულებრივ სუფრად“ წარმოედგინა, ასე უთხრა ჟურნალისტებს შინაგან საქმეთა სამინისტროს პრესმდივანმა, ეჰსან ზაჰიდოვმა.
შემდეგ მან განაცხადა, რომ ასეთი რამ არ უთქვამს და მხოლოდ ამის შემდეგ გამოვიდა შსს-ს პრესსამსახური განცხადებით იმის შესახებ, რომ დამნაშავეები კანონის მთელი სიმკაცრით აგებენ პასუხს.
საზოგადოებაში განსაკუთრებული აგრესია გამოიწვია დეპუტატ სიავუშ ნოვრუზოვის რეაქციამ, რომელიც ასევე ესწრებოდა აღნიშნულ ქორწილს.
მან გამომწვევად განუცხადა ჟურნალისტებს: „დიახ, მე ვიყავი ქორწილზე და სწორადაც მოვიქეცი“.
ამისათვის ნოვრუზოვმა საყვედური მიიღო მმართველი პარტია „ახალი აზერბაიჯანისგან“, რომლის წევრიც არის.
სოციალურ ქსელებში აღშფოთება გრძელდება. იქ მიაჩნიათ, რომ 15-დღიანი პატიმრობა და საყვედური არასაკმარისი სასჯელია. ბევრი ისევე მოქცევას მოითხოვს, როგორც ეს ხდება ჩვეულებრივი მოქალაქეების შემთხვევაში – გამოქვეყნდეს ქორწილის დამსწრე ადამიანების პოლიციის განყოფილების დერეფნებში გადაღებული ფოტოსურათები.
კომენტარი
ცნობილი ჟურნალისტი და ბლოგერი ჰამიდ ჰამიდოვი Facebook-ის საკუთარ გვერდზე წერს:
„ეს გემრიელი შეფურთხებაა […] აბსოლუტურად ყველას სახეში: სხვა ჩინოვნიკების, რომლებიც კარანტინთან დაკავშირებულ ზომებს იღებენ; ექიმების, რომლებიც თავიანთი სიცოცხლის ფასად მკურნალობენ კორონავირუსით დაავადებულებს; უბრალო ადამიანების, რომლებიც იტანჯებიან, რადგან იმის სახსარიც კი არ აქვთ, რომ ელემენტარულად საკვები შეიძინონ და რომლებსაც პოლიცია ყოველდღიურად აჯარიმებს იმის გამო, რომ პირბადეები არ უკეთიათ.
ქორწილის სტუმრების კომენტარების სითავხედე ამბობს, მათ ყველას კანონიც, უბრალო ადამიანებიც ფეხებზე კიდიათ. დიდი იმედი მაქვს, რომ მსგავსი აღმაშფოთებელი კანონდარღვევა დაუსჯელი არ დარჩება. ადამიანების ამდენად გაბრაზება და იმედის გაცრუება არ შეიძლება“.
