საქართველოში წლიური ინფლაციის დონემ 11.5 პროცენტი შეადგინა. გაიზარდა პროდუქტების ფასებიც
ინფლაცია საქართველოში
საქართველოს სტატისტიკის სამსახურის ინფორმაციით, 2022 წლის ივლისში, ივნისთან შედარებით, ინფლაცია 0.2 პროცენტით გაიზარდა და წლიური ინფლაციის დონემ 11.5 პროცენტი შეადგინა. შესაბამისად, 2021 წლის ივლისთან შედარებით პური 29 პროცენტით, შაქარი 18პროცენტით, ზეთი კი 17 პროცენტით გაძვირდა.
საქსტატის ინფორმაციით, 2021 წლის ივლისის თვესთან შედარებით 2022 წლის ივლისში ფასებმა მოიმატა შემდეგ ქვეჯგუფებში:
- პური და პურპროდუქტები – ფასები 29.3 პროცენტით გაიზარდა;
- მინერალური და წყაროს წყალი, უალკოჰოლო სასმელები და ნატურალური წვენები – ფასები 21.3 პროცენტით გაიზარდა;
- ყავა, ჩაი და კაკაო – ფასები 18.2 პროცენტით გაიზარდა;
- შაქარი, ჯემი და სხვა ტკბილეული – ფასები 18.1 პროცენტით გაიზარდა;
- ზეთი და ცხიმი – ფასები 17.5 პროცენტით გაიზარდა;
- რძე, ყველი და კვერცხი – ფასები 16.9 პროცენტით გაიზარდა;
- თევზეული – ფასები 14.9 პროცენტით გაიზარდა;
- ხილი და ყურძენი – ფასები 13.7 პროცენტით გაიზარდა;
- ხორცი და ხორცის პროდუქტები – ფასები 12.7 პროცენტით გაიზარდა.
ალკოჰოლური სასმელებისა და თამბაქოს ჯგუფში ფასები ჯამში 8.3 პროცენტით გაიზარდა.
ტრანსპორტის კატეგორიაში ფასები 2021 წლის ივლისთან შედარებით 20.6 პროცენტითაა გაზრდილი.
ელექტროენერგიის, აირისა და სათბობის სხვა სახეების ფასები 2021 წლის ივლისთან შედარებით 6 პროცენტითაა გაძვირებული.
ავეჯი, საოჯახო ნივთები, სახლის მოვლის ჯგუფში შემავალი პროდუქტების ფასებმა 2 პროცენტით მოიმატა.
ფინანსთა მინისტრი ლაშა ხუციშვილი ამბობს, რომ ინფლაცია და ფასები გამოწვევად დარჩება მიმდინარე წელსაც იქიდან გამომდინარე, რომ მსოფლიო ფასები რეკორდულ ნიშნულზე იყო ქვეყნების უმეტესობაში:
“30-40-წლიან რეკორდებს ხსნიდა როგორც ევროპის ქვეყნებში, ისე აშშ-ში, ჩვენს სამეზობლოში, შესაბამისად, საქართველო ვერ იქნებოდა აქედან იზოლირებული, ამ სივრციდან და ეს ბუნებრივად აისახა საქართველოში ინფლაციის მაჩვენებელზე.”
მისივე განმარტებით, დღეის მდგომარეობით, შეგვიძლია ვთქვათ, რომ ინფლაციას ექნება შემცირების მიმართულება მომდევნო თვეებში და წლის ბოლოს მიზნობრივ მაჩვენებელთან შესაბამისად ახლოს უნდა იყოს.
რაც შეეხება ეროვნულ ბანკს, წლის დასაწყისში ისინი აცხადებდნენ, რომ “არსებული პროგნოზით მოსალოდნელია, რომ, სხვა თანაბარ პირობებში, ინფლაცია მარტიდან შემცირდება, თუმცა წლის განმავლობაში მიზნობრივ მაჩვენებელზე მაღლა შენარჩუნდება.” ასევე, ეროვნულ ბანკში აღნიშნავენ, რომ საწვავის ფასების მკვეთრ მატებას ინფლაციის მაჩვენებელზე საგრძნობი გავლენა ექნება.
საქართველოს მთავრობა კი გაზრდილ ფასებს და ინფლაციას უკრაინაში რუსეთის შეჭრას აბრალებს. საქართველოს პრემიერმინისტრმა ირაკლი ღარიბაშვილმა განაცხადა, რომ ინფლაციის მაჩვენებლებმა არაერთ ქვეყანაში პროგნოზირებულ მაჩვენებელს გადააჭარბა.
