საქართველოში სახელმწიფო ინსპექტორის სამსახური გაუქმდა
საქართველოში სახელმწიფო ინსპექტორის სამსახური გაუქმდა. პარლამენტმა უწყების გაუქმების შესახებ კანონპროექტი მესამე მოსმენით დაამტკიცა. პროექტს მხარი დაუჭირა 81-მა დეპუტატმა, წინააღმდეგი კი 7 დეპუტატი იყო.
თავად ყოფილი სახელმწიფო ინსპექტორი, ლონდა თოლორაია იმედოვნებს, რომ პრეზიდენტი ყველაზე “არაევროპულ კანონს ვეტოს დაადებს.”
სახელმწიფო ინსპექტორის სამსახური არის დამოუკიდებელი სახელმწიფო ორგანო, რომლის მთავარი ფუნქციაა მიუკერძოებლად და ეფექტიანად გამოიძიოს დანაშაული, რომელსაც ჩაიდენს სამართალდამცავი ორგანოს წარმომადგენელი ან სახელმწიფო მოხელე ან მასთან გათანაბრებული პირი.
ამ სამსახურის მუშაობას „სახელმწიფო ინსპექტორის შესახებ“ საქართველოს კანონი არეგულირებს და კანონში აღნიშნულია, რომ ამ სამსახურის მიზანია “პერსონალურ მონაცემთა დამუშავების კანონიერების კონტროლი; ფარული საგამოძიებო მოქმედებებისა და ელექტრონული კომუნიკაციის მაიდენტიფიცირებელ მონაცემთა ცენტრალურ ბანკში განხორციელებული აქტივობების კონტროლი”.
სახელმწიფო ინსპექტორის სამსახური 2019 წელს ამოქმედდა, ორ წელიწადზე ნაკლებ დროში კი მმართველმა პარტიამ მისი გაუქმების გადაწყვეტილება მიიღო.
“ქართული ოცნების” საპარლამენტო უმრავლესობა ამბობს, რომ ეს არის სამსახურის რეფორმა და მის ბაზაზე სპეციალური საგამოძიებო და პერსონალურ მონაცემთა დაცვის სამსახურის შექმნა იგეგმება. სამსახურის უფროსის, ლონდა თოლორაიას თქმით, ეს არაა რეფორმა და ესაა სამსახურის დასჯა დამოუკიდებლობისთვის. თოლორაიამ ასევე აღნიშნა, რომ იგი შრომის კოდექსის დარღვევით გაათავისუფლეს, რადგან გათავისუფლება მის დეკრეტში ყოფნის პერიოდს დაემთხვა.
კანონპროექტი პარლამენტმა დაჩქარებული წესით განიხილა. მას ორი უწყება ჩაანაცვლებს – სპეციალური საგამოძიებო სამსახური, რომელიც სამოხელეო დანაშაულებს გამოიძიებს და პერსონალურ მონაცემთა დაცვის სამსახური, რომელსაც პერსონალურ მონაცემთა დამუშავების, ყველა ფარული საგამოძიებო მოქმედებების და ცენტრალურ ბანკში განხორციელებული აქტივობების კონტროლის ფუნქცია ექნება
ახალი უწყების შექმნის შემდეგ ინსპექტორის სამსახურის მოქმედი თანამშრომლები გათავისუფლდებიან და ახალ უწყებებში არ დასაქმდებიან.
სახელმწიფო ინსპექტორს სოლიდარობა და მხარდაჭერა გამოუცხადა მიხეილ სააკაშვილმაც. მისი თქმით, ქართულ ოცნებას მისი საქმის შესახებ ინსპექტორის დასკვნის ეშინია.
● არჩევნები, პანდემია, მედიის მდგომარეობა და სააკაშვილი – ომბუდსმენის 2021 წლის ანგარიში
● აქცია, ხმაური და დაკავებები 2022 წლის ბიუჯეტის დამტკიცებისას. რა მოხდა ბათუმში
● ამერიკის ელჩი: ერთპარტიული მმართველობა უმრავლესობის ტირანიის საფრთხეს აჩენს
“დღეს თქვენ გადაწყვიტეთ, სახლში გაუშვათ სახელმწიფო ინსპექტორი და მისი 3 მოადგილე, რომლებმაც, მიუხედავად ყველა დაბრკოლებისა, როგორც ჩანს, მოვახერხეთ დამოუკიდებელი უწყების შექმნა, წინააღმდეგ შემთხვევაში, დღეს ეს კანონი მიღებული არ იქნებოდა”, – განაცხადა ლონდა თოლორაიამ.
მისივე თქმით, მმართველმა გუნდმა ძირი გამოუთხარა დამოუკიდებელ უწყებას, რომელიც გადაწყვეტილებას არავის უთანხმებდა. თოლორაიამ მიმართა იმ პარლამენტის წევრებს, ვინც დღეს კანონის მხარდაჭერის ღილაკს ხელი დააჭირა:
“საზედამხედველო უწყებებს ქვეყნები არ ქმნიან იმისთვის, რომ უპირობოდ დაეთანხმონ ხელისუფლების გადაწყვეტილებებს, საზედამხედველო უწყებებს განვითარებულ ქვეყნებში ქმნიან იმისთვის, რომ თავისი პრინციპული სიტყვა თქვას მაშინ, როდესაც სახელმწიფო უწყებები არღვევენ ადამიანის უფლებებს.”
თოლორაიას შეფასებით, გადაწყვეტილება ყველა უწყებისათვის, დამოუკიდებელი ინსტიტუტების ეფექტიანი მუშაობისთვის საშიში გზავნილია.
● რას ფიქრობენ ექსპერტები შარლ მიშელის შეთანხმების გაუქმებაზე
● კელი დეგნანი: სანქციები ჩვენი ერთ-ერთი ბერკეტია
აღსანიშნავია ისიც, რომ არასამთავრობო ორგანიზაციები თავიდანვე უკიდურეს შეშფოთებას გამოთქვამდნენ კანონპროექტის გამო და მას მმართველი პარტიის მხრიდან კიდევ ერთი დამოუკიდებელი ორგანოს მიმართ დაგეგმილ თავდასხმას უწოდებენ.
კანონპროექტის განხილვამდე მმართველ პარტიას შეხვდა აშშ-ის ელჩი კელი დეგნანი. მისი თქმით თქმით, ანრი ოხანაშვილსა და მიხეილ სარჯველაძეს კანონპროექტის განხილვის გადადებისკენ მოუწოდა.
სახელმწიფო ინსპექტორის სამსახურის გაუქმების ინიციატივას გამოეხმაურა გაეროს ადამიანის უფლებების ოფისიც და პარლამენტს მოუწოდა, გაიწვიოს სახელმწიფო ინსპექტორის გაუქმების ინიციატივა. ხოლო საქართველოს პრეზიდენტის, სალომე ზურაბიშვილის თქმით, უნდა შეწყდეს სახელმწიფო ინსპექტორის გაუქმებაზე კანონის დაჩქარებული განხილვა.
