საქართველოში ევროპული საბჭოს პრეზიდენტი ჩამოვიდა

საქართველოს ევროპული საბჭოს პრეზიდენტი შარლ მიშელი სტუმრობს. მას შემდეგ, რაც ქვეყანაში არჩევნების შემდგომი პოლიტიკური კრიზისია, ეს პრეზიდენტის მესამე ვიზიტია საქართველოში. მისგან კვლავ პოლიტიკური ვითარების განმუხტვას ელიან.

შარლ მიშელთან განსახილველ თემებს შორისაა: 19 აპრილის შეთანხმების შესრულების მდგომარეობა, უზენაესი სასამართლოს მოსამართლეების საკითხი და ქვეყანაში არსებული პოლიტიკური ვითარება.

პარალელურად, ოპოზიცია ამბობს, რომ გვერდს ვერ აუვლიან 5-6 ივლისის მოვლენებს.

შარლ მიშელი საქართველოში გუშინ, 18 ივლისს ჩამოვიდა. იგი ბათუმში ჩამოფრინდა. დღეს, დილიდან, ევროპული საბჭოს პრეზიდენტმა უკვე გამართა შეხვედრები საქართველოს პრეზიდენტთან, სალომე ზურაბიშვილთან, ასევე, ოპოზიციისა და ხელისუფლების წარმომადგენლებთან.

პრეზიდენტთან შეხვედრის შემდეგ კომენტარები არ გაკეთებულა.

ოპოზიციის წარმომადგენლებმა, შეხვედრის დასრულების შემდეგ თქვეს, რომ ევროპული საბჭოს პრეზიდენტთან მათ რამდენიმე საკითხზე ისაუბრეს. მათ შორის იყო: უზენაეს სასამართლოს მოსამართლეების დანიშვნა, 5-6 ივლისის მოვლენები, მომავალი არჩევნებზე და მიშელის შეთანხმების შესრულებასთან დაკავშირებულ პრობლემები.

“ჩვენ გვქონდა საუბარი იმაზე, რომ ზეწოლის მექანიზმები ამ ხელისუფლებაზე – ხელისუფლებაზე, რომელიც ღიად და აშკარად უარს ამბობს ჩვენი ქვეყნის ევროპულ მომავალზე, უნდა გაძლიერდეს. დარწმუნებული ვარ, ჩვენ უახლოეს მომავალში ვიხილავთ ევროპული მხრიდან შესაბამისი სანქციების ამუშავებაზე სერიოზულ მსჯელობას, როდესაც, სამწუხაროდ, ჩვენი ქვეყნისთვის განკუთვნილი დახმარება, პირობითობის პრინციპის დაცვით შეჩერებული იქნა იმ პრობლემების გამო, რომელიც შეიქმნა, მათ შორის, მიშელის დოკუმენტთან დაკავშირებით”, – განაცხადა სალომე სამადაშვილმა შეხვედრის დასრულების შემდეგ.

ხელისუფლებასა და ოპოზიციასთან შეხვედრის შემდეგ, შარლ მიშელმა რამდენიმე მნიშვნელოვანი განცხადება გააკეთა. მან თქვა, რომ უზენაეს სასამართლოში მოსამართლეთა დანიშვნა, დაკარგული შესაძლებლობაა.

მან ასევე განაცხადა, რომ დღეს გამართულ ყველა შეხვედრაზე ადამიანის ფუნდამენტური უფლებების დაცვას გაუსვა ხაზი:

“მე ხაზი გავუსვი ჩემს შეხვედრებში – მთავარი და ცენტრალური როლი არის ადამიანის უფლებები და ის თავისუფლებები, რომელიც ევროკავშირ-საქართველოს ურთიერთობებში ესოდენ მნიშვნელოვან როლს თამაშობს. უმცირესობათა უფლებები არ არის მარგინალური საკითხი – პატივისცემა მრავალფეროვნებისადმი და ადამიანის ღირსებისადმი არის უმთავრესი და ასევე, საკვანძო საკითხი ჩვენს ფუნდამენტურ ღირებულებებში”, – აღნიშნა შარლ მიშელმა.

შარლ მიშელმა, იმ ოპოზიციურ პარტიებს, რომელსაც ამ დრომდე არ აქვთ შეთანხმებაზე ხელი მოწერილი, დოკუმენტზე ხელისმოწერისკენ მოუწოდა.

• რა წერია შარლ მიშელის ახალ გეგმაში – ხუთივე პუნქტი მოკლედ
  
• ევროპარლამენტმა შესაძლოა საქართველოს ფინანსური დახმარება შეუჩეროს

შარლ მიშელის განცხადებების მიუხედავად, ქვეყნის პრემიერი ისევ ირწმუნება, რომ მმართველი პარტია შარლ მიშელის შეთანხმების შესრულებას აგრძელებს.

პოლიტიკური პროცესების პარალელურად, ევროპული საბჭოს პრეზიდენტისთვის ხმის მიწვდენას ცდილობს მედიაც.

გუშინ, საღამოს, ბათუმში, იქ სადაც შარლ მიშელი თვითმფრინავი დაეშვა, ადგილობრივი ჟურნალისტების მცირე ნაწილი მას გარდაცვლილი ოპერატორის, ლექსო ლაშქარავას ფოტოებით დახვდა.

დღეს, შარლ მიშელისთვის თავიანთი სათქმელის მისაწოდებლად ცენტრალური ოპოზიციური ტელევიზიების მენეჯერები და ჟურნალისტები, თბილისში, მთავრობის კანცელარიასთან შეიკრიბნენ და შარლ მიშელს, მედიის მწვავე მდგომარეობაზე, საგანგებო მიმართვა წაუკითხეს.

ევროპული საბჭოს პრეზიდენტი შარლ მიშელი საქართველოს 18 ივლისს ეწვია. მანამდე მიშელი სომხეთს და აზერბაიჯანს სტუმრობდა.

დღეს, 19 ივლისს, ევროპული საბჭოს პრეზიდენტი მონაწილეობას მიიღებს ბათუმში დაგეგმილ საერთაშორისო კონფერენციაში. კონფერენცია 15:00 საათზე დაიწყება. ის მედიის მდუმარე პროტესტის ფონზე ჩაივლის.

● ევროპული საბჭოს პრეზიდენტი ერთ-ერთი ყველაზე მაღალი რანგის თანამდებობაა ევროკავშირში. ის ევროკავშირის მთავარი წარმომადგენელია საერთაშორისო არენაზე.

● ბელგიელი პოლიტიკოსი შარლ მიშელი ამ თანამდებობაზე 2019 წელს დაინიშნა. მანამდე მიშელი ხუთი წლის განმავლობაში ბელგიის პრემიერ-მინისტრი იყო.

● ევროპული საბჭო (European Council) ევროკავშირის მთავარი პოლიტიკური ორგანოა. საბჭოს წევრები მხოლოდ ევროკავშირის ქვეყნების ლიდერები არიან. ევროპული საბჭო არის ის ორგანო, რომელიც განსაზღვრავს ევროკავშირის განვითარების მთავარ სტრატეგიას და პოლიტიკის გენერალურ ხაზს.