აპრილში რუსეთიდან საქართველოში ხუთჯერ მეტი თანხა გადმოირიცხა, ვიდრე გასულ თვეში
საქართველოში 5-ჯერ მეტი თანხა გადმოირიცხა ვიდრე გასულ თვეში
საქართველოს ეროვნული ბანკის მონაცემებით, 2022 წლის აპრილში რუსეთიდან საქართველოში 5-ჯერ მეტი თანხა გადმოირიცხა, ვიდრე გასულ თვეში. მარტში რუსეთიდან საქართველოში 27 მლნ დოლარი გადმოირიცხა, აპრილში კი 133 მლნ.
ასევე, აპრილში ქვეყანაში შემოსული ფულადი გზავნილების ნაკადების მოცულობამ სულ 308.1 მლნ აშშ დოლარი შეადგინა, რაც 58.8 პროცენტით მეტია 2021 წლის აპრილის ანალოგიურ მაჩვენებელზე. გასულ წელთან შედარებით, 700 პროცენტით არის გაზრდილი ყაზახეთიდან შემოსული ფულადი გზავნილები.
მთლიანად ქვეყანაში შემოსული გზავნილების 27.07 პროცენტი ევროკავშირის ქვეყნებზე მოდის, 43.16 პროცენტი კი – რუსეთზე.
ქვეყნები, საიდანაც გასულ თვეს საქართველოში ყველაზე მეტი თანხა გადმოირიცხა:
- რუსეთის ფედერაცია – 132.98 მილიონი დოლარი;
- იტალია – 33.4 მილიონი დოლარი;
- აშშ – 25.02 მილიონი დოლარი;
- ყაზახეთი – 20.04 მილიონი დოლარი;
- საბერძნეთი – 18.65 მილიონი დოლარი;
- ისრაელი – 16.21 მილიონი დოლარი;
- გერმანია – 11.97 მილიონი დოლარი;
- თურქეთი – 8.1 მილიონი დოლარი;
- აზერბაიჯანი – 4.97 მილიონი დოლარი.
- ესპანეთი – 4.71 მილიონი დოლარი
2022 წლის აპრილში საქართველოდან საზღვარგარეთ 25.4 მლნ აშშ დოლარი გადაიგზავნა, რაც 2021 წლის მარტის ანალოგიურ მაჩვენებელთან შედარებით 1.5%-ით ნაკლებია.
მსოფლიო ბანკის ინფორმაციით, საქართველო ფულად გზავნილებზე დამოკიდებული ქვეყნების რეიტინგში 21-ე ადგილზეა.
ამავე რეიტინგში პირველ ადგილს ტონგა იკავებს, რომლის მთლიანი შიდა პროდუქტის (მშპ) 37.2 პროცენტი ფულად გზავნილებზე მოდის; 35.3 პროცენტით მეორე ადგილზე სომალია; მესამე ადგილს კი ყირგიზეთი იკავებს, მისი ეკონომიკის 31.3% ფულად გზავნილებზეა დამოკიდებული.
