რუსული სამთავრობო მედია: საქართველო მზადაა ევროკავშირთან ურთიერთობა გაწყვიტოს

საქართველო მზადაა ევროკავშირთან ურთიერთობა გაწყვიტოს

რუსული სამთავრობო მედია “რია ნოვოსტი” “ქართული ოცნების” ლიდერების განცხადებების საფუძველზე ამტკიცებს, რომ საქართველო მზად არის ევროკავშირზე უარი თქვას, თუ ის ქვეყნის შიდა პოლიტიკაში ჩაერევა. 

“მიზეზი ექსპრეზიდენტ მიხეილ სააკაშვილის გათავისუფლების მორიგი მოწოდებაა. გარდა ამისა, დასავლეთი უკმაყოფილოა საქართველოს სურვილით, მიიღოს კანონი უცხოური აგენტების შესახებ”.– აღნიშნულია სტატიაში. 

მასალა რამდენიმე თავადა არის დაყოფილი. ერთ-ერთი თავის სახელწოდებაა “მშვიდობით ევროპა”, სადაც კომენტარების ნაწილი ევროპელი პარტნიორების განცხადებებს ეხება, რომლებიც ხელისუფლებას მიხეილ სააკაშვილის საზღვარგარეთ გადაყვანისკენ მოუწოდებენ.

“თბილისი დასავლელი პარტნიორების მოწოდებების გათვალისწინებას არ ჩქარობს. როგორც მმართველი პარტია ქართული ოცნების გენერალურმა მდივანმა კახა კალაძემ განაცხადა, “საქართველოს ხელისუფლება ქართული წესით ითამაშებს” და ხაზგასმით აღნიშნა: “თუ დასავლეთი აპირებს რესპუბლიკის შანტაჟს ევროკავშირის კანდიდატის სტატუსით, თავისთვის დაიტოვონ”. – წერია სტატიაში.

მათივე განმარტებით, “ქართული ოცნების” სხვა წარმომადგენლებმა აღნიშნეს, რომ მათი ქვეყნის მიმართ ყველა ბრალდება ეფუძნება სიცრუეს და დეზინფორმაციას. “ფაქტობრივად, სააკაშვილს საუკეთესო პირობები შეექმნა საქართველოს ერთ-ერთ ციხეში” – ციტირებენ რუსი პროპგანადისტები ხელისულების განცხადებებს.

“სანამ ევროპელები ქართველებს სააკაშვილისთვის ლანძღავდნენ, ქართული ოცნების ოთხი ყოფილი დეპუტატი სოზარ სუბარი, დიმიტრი ხუნდაძე, მიხეილ ყაველაშვილი და გურამ მაჭარაშვილი, რომლებმაც შექმნეს საზოგადოებრივი მოძრაობა ხალხის ძალა, ამზადებდნენ კანონპროექტს უცხოური აგენტების შესახებ. ავტორები, მათივე სიტყვებით, ხელმძღვანელობდნენ შეერთებული შტატების და სხვა დემოკრატიული სახელმწიფოების კანონებით. კერძოდ, ყოფილი დეპუტატები მიიჩნევენ, რომ ხალხმა უნდა იცოდეს პოლიტიკოსების, არაკომერციული ორგანიზაციებისა და მედიის შემოსავლის წყაროები, რომლებიც აყალიბებენ საზოგადოებრივ აზრს და მონაწილეობენ სახელმწიფო პოლიტიკის განხილვაში”. – აღნიშნავს ავტორი. 

რუსული პროპაგანადისტული მედიის თქმით, მიუხედავად ამისა, “ქართული ოცნების” თავმჯდომარემ ირაკლი კობახიძემ განაცხადა, რომ მის პარტიას “ჯერ არ ჩამოუყალიბებია თავისი პოზიცია”, მაგრამ პირადად ის არ არის ინიციატივის წინააღმდეგი.

“პოლიტიკოსი ირწმუნება: რეპრესიები არ იქნება, მაგრამ საზოგადოება უფრო გამჭვირვალე გახდება”. – წერია სტატიაში. 

სტატიაში ასევე ყურადღება გამახვილებულია საქართველოს პრემიერმინისტრის მიერ ეკონომიკურ ზრდაზე გაკეთებულ განცხადებებზე და აღნიშნულია, რომ გასულ წელს რუსეთი იყო საქართველოს მთავარი სავაჭრო პარტნიორი. პროპაგანდისტული მედია რუსეთის საგარეო საქმეთა მინისტრის, სერგეი ლავროივის განცხადებებსაც იხსენებს და აცხადებს, რომ “ლავროვი თბილისის პოზიციას გაბედულად მიიჩნევს”. 

● გრიგორი კარასინი: დასავლეთი საქართველოს ხელებს უგრეხს რუსეთთან მშვიდი ურთიერთობის გამო
● პიტერ სტანო: ევროკავშირი საქართველოს მოუწოდებს, რუსეთის წინააღმდეგ ავიაციის სექტორში სანქციებს შეუერთდეს
● სახელმწიფო დეპარტამენტი: რუსეთთან ფრენების აღდგენის შემთხვევაში კომპანიები დასანქცირდებიან

რუსეთის საგარეო უწყების ხელმძღვანელმა სერგეი ლავროვმა 18 იანვარს საქართველოსთან პირდაპირი ავიამიმოსვლის მალე აღდგენის იმედი გამოთქვა და აღნიშნა, რომ საქართველოს ეკონომიკის 10 პროცენტით ზრდა დიდწილად რუსეთთან კავშირის დამსახურებაა.

სერგეი ლავროვმა განაცხადა, რომ საქართველოს, აფხაზეთსა და ცხინვალს შორის დიალოგისთვის საჭირო მექანიზმები არსებობს, რომელშიც “რუსეთიც მონაწილეობს”. მისივე განმარტებით, მოსკოვი საქართველოსა და ოკუპირებულ ტერიტორიებს შორის ურთიერთობების აშენების მომხრეა. ამის შესახებ ლავროვმა 2022 წლის შემაჯამებელ პრესკონფერენციაზე ისაუბრა.

ლავროვი ასევე აღნიშნავს, რომ დასავლური ქვეყნები და ინსტიტუტები ჟენევის ფორმატის უკრაინაში მიმდინარე მოვლენების “მძევლად ქცევას” ცდილობენ, რაც მისი აზრით, “პოლიტიკური წყენებითა და კაპრიზებითაა განპირობებული”.

2022 წლის შემაჯამებელ პრესკონფერენციაზე სერგეი ლავორვმა შეაქო საქართველოს მთავრობა და თქვა, რომ ქვეყანა “დასავლეთის ზეწოლას წინააღმდეგობას უწევს.”

საქართველოს პრეზიდენტი სალომე ზურაბიშვილი არ მიესალმება რუსეთთან ფრენების აღდგენას. ამის შესახებ პრეზიდენტმა საკუთარ ფეისბუქზე დაწერა.

“იმ დროს, როცა ყველა ჩვენი პარტნიორი ქვეყანა, სიტყვით თუ საქმით, მაქსიმალურ სოლიდარობას უცხადებს უკრაინის თავდადებულ ბრძოლას, ჩემთვის და დარწმუნებული ვარ, საზოგადოების უდიდესი ნაწილისათვის, მთავრობის და მმართველი პარტიის პოზიცია, რბილად რომ ვთქვათ, გაუგებარია.” – წერს ზურაბიშვილი.

ეს არ არის პირველი შემთხვევა, როცა რუსეთის ფედერაციის მაღალი რანგის ჩინოვნიკები საქართველოს ხელისუფლებას უკრაინასთან და დასავლეთთან მიმართებაში აქებენ.

გასული წლის 25 მარტს რუსეთის ფედერაციის საბჭოს საერთაშორისო საქმეთა კომიტეტის თავმჯდომარემ, გრიგორი კარასინმა ასევე შეაქო საქართველოს ხელისუფლება უკრაინის საკითხზე პოზიციის გამო. საქართველოს რეაქციას დასავლეთის ანტირუსულ სანქციებზე კარასინმა “გაწონასწორებული” უწოდა და ხაზგასმით აღნიშნა, რომ რუსეთში „ეს ფაქტი შეუმჩნეველი არ დარჩება“.

კარასინმა რუსეთ-საქართველოს ურთიერთობის ისტორია გააანალიზა. მან თქვა, რომ 2012 წლიდან, მას შემდეგ, რაც ხელისუფლებაში “ქართული ოცნება” მოვიდა და აბაშიძე-კარასინის ფორმატი ამოქმედდა, რუსეთი საქართველოს მეორე ყველაზე მნიშვნელოვანი სავაჭრო პარტნიორი გახდა. მისი თქმით, მოიხსნა ქართულ საქონელზე დაწესებული ყველა შეზღუდვა და რუსეთში ქართული ექსპორტი 14-ჯერ გაიზარდა.