რუსეთში ხორბლის გაძვირებას შესაძლოა, საქართველოში პურის ფასის მატება მოჰყვეს

საქართველო 100%-ით რუსულ ხორბალზეა დამოკიდებული – ამჟამად ერთადერთი ქვეყანა, რომლისგანც ხორბალს ვყიდულობთ, რუსეთია.

2020 წლის იანვრიდან ივლისის ჩათვლით, საქართველომ რუსეთისგან  223 ათასი ტონა ხორბალი იყიდა, ჯამში 49 მლნ 371 ათასი აშშ დოლარის ღირებულების.  

ბოლო დღეებში მსოფლიო ბაზარზე და მათ შორის რუსეთშიც ხორბლის ფასი იზრდება. ფოთის პორტში შემოტანილი ერთი ტონა რუსული ხორბალი, რომელიც აქამდე 205 დოლარი ღირდა, ახლა 215 დოლარი ღირს. არ არის გამორიცხული, რომ საექსპორტო ხორბალი კიდევ გაძვირდეს. 

რუსეთში ხორბლის გაძვირებას შესაძლოა, საქართველოში პურის ფასის მატება მოჰყვეს

საქართველოს ხორბლისა და ფქვილის მწარმოებელთა ასოციაციის აღმასრულებელი დირექტორი ლევან სილაგავა ამბობს, რომ საქართველოში ხორბლის საკმარისი მარაგია და ამიტომ ფასის ზრდა აქამდე თვალშისაცემი და შესამჩნევი არ იყო. 

სილაგაძე აცხადებს, რომ ფქვილის და პურის ფასი საქართველოში იმ შემთხვევაში გაძვირდება, თუ რუსული ხორბლის ფასი კიდევ 15 დოლარით მოიმატებს, თუმცა, პურის გაძვირება არც ამ შემთხვევაში იქნება “დრამატული”:

,,რა თქმა უნდა, ფასების ზრდის მსოფლიო ტენდენცია ჩვენზეც აისახება, მაგრამ მარაგებიდან გამომდინარე მდორედ მიმდინარეობს პროცესი. თუ ფასი კიდევ 15 დოლარით არ გაიზარდა, ჩვენთან ფქვილი და შესაბამისად, პური არ გაძვირდება. შემდეგ შეიძლება იყოს გარკვეული ცვლილებები, მაგრამ არა დრამატული,” – ამბობს სილაგაძე.

რუსეთი – ხორბლის მთავარი და ერთადერთი იმპორტიორი

რუსეთი საქართველოსთვის ხორბლის ერთ-ერთი მთავარი იმპორტიორია. ასე იყო გასულ წლებშიც. თუმცა, 2020 წლისგან განსხვავებით, შარშან ხორბალი სხვა ქვეყნებიდანაც შემოდიოდა. 

 • როგორ აპირებს საქართველოს ხელისუფლება სოფლის მეურნეობის გადარჩენას

• რამდენს კარგავს საქართველო კორონავირუსის გამო? საგარეო ვაჭრობა პანდემიის დროს – ციფრები

2019 წელს საქართველოში შემოტანილი ხორბლის 87,3% –  430 236 ტონა ტონა (ჯამში $90.6 მლნ დოლარის ღირებულების) რუსული იყო. 

თუმცა, შარშან საქართველომ ხორბალი იყიდა ყაზახეთისგანაც – 56 248 ტონა,  სულ 13,2 მლნ აშშ დოლარის ღირებულების. 

ხორბლის იმპორტიორ TOP 5 ქვეყანაში, რუსეთისა და ყაზახეთის გარდა, იყვნენ:

აშშ – $1.1 მლნ დოლარი, 6,000 ტონა.

ირანი – $45.5 ათასი დოლარი, 230 ტონა

და თურქეთი – $24.1 ათასი დოლარი, 46 ტონა.

შარშან ეკონომიკის მინისტრმა, ნათია თურნავამ განაცხადა, რომ ყაზახეთის მთავრობა საქართველოში ხორბლის ექსპორტის წახალისების მიზნით მარცვლეულის ტრანსპორტირების 50%-იან სუბსიდირებას გეგმავდა, რაც საქართველოს ყაზახური ხორბლის შედარებით ხელმისაწვდომ ფასად შეძენის საშუალებას მისცემდა. თუმცა, ყაზახეთში ხორბლის ცუდი მოსავლის გამო, ეს შეთანხმება ვერ შესრულდა. 

ხორბლის როგორი მოსავალი იქნება წელს ყაზახეთში და რა რაოდენობის მარცვლეულს იყიდის იქ საქართველო, ეს სექტემბრის ბოლოს გაირკვევა, როცა ყაზახეთში ხორბლის აღება აქტიურ ფაზაში შევა. 

საქართველოში ყოველწლიურად 80 000 -100 000 ტონა ხორბალი მოდის, რაც ადგილობრივი მოთხოვნის 10 პროცენტსაც ვერ აკმაყოფილებს.