"არა რუსულ კანონს" - პარლამენტში საპროტესტო აქციაა

საპროტესტო აქცია პარლამენტში

საქართველოს პარლამენტში “აგენტების კანონზე” მსჯელობის დაწყებამდე მედიის, არასამთავრობო და სამოქალაქო სექტორის წარმომადგენლებმა საპროტესტო აქცია გამართეს.

“რუსულ კანონს” აპროტესტებენ, როგორც პარლამენტის შესასვლელთან, ისე შენობაში, კომიტეტის დარბაზის შესასვლელთან. საგარეო ურთიერთობათა და თავდაცვის კომიტეტების ერთობლივ სხდომაზე იწყება რუსული კანონის ორივე ვერსიის განხილვა და როგორც უკვე ცნობილია, საპარლამენტო სესიაზე პირველი მოსმენით კანონპროექტს მიიღებენ, რის შემდეგაც მას ვენეციის კომისიაში გააგზავნიან.

საპროტესტო აქციის მონაწილეები აცხადებენ, რომ ეს კანონი დაგვაშორებს ევროპას და ხელს შეუშლის სტატუსის მიღებას. მმართველი პარტიის დეპუტატებს დარბაზში შესასვლელად შეძახილებისა და სტვენის ფონზე უწევთ.

“ზუსტად ერთი წლის წინ ამ დარბაზში მმართველმა პარტიამ გააუქმა სახელმწიფო ინსპექტორის სამსახური და დღეს ერთი წლის თავზე ვხედავთ, რომ იგი ცდილობს გააუქმოს არასამთავრობო სექტორი და ცდილობს, გააუქმოს მედია და ხელი შეუშალოს მის მუშაობას ზუსტად ამ რუსული კანონით. იმიტომ მოვედი აქ, რომ როგორც ამ ქვეყნის მოქალაქეს მართლა გული შემტკივა იმაზე, რაც ხდება და მინდა ქვეყანაში ცხოვრება, რომელიც მიდის ევროკავშირისკენ”, – განაცხადა ყოფილმა სახელმწიფო ინსპექტორმა, ლონდა თოლორაიამ.

“ლელო საქართველოსთვის” წევრი, სალომე სამადაშვილის განცხადებით, რუსული კანონპროექტების საკომიტეტო განხილვა, შეიძლება “ჩუმად ჩაატარონ.”

“ჩვენი ამოცანა არის, რომ სხდომა არ შედგეს, მაგრამ ეს იმას არ ნიშნავს, რომ რუსეთის საოკუპაციო რეჟიმი არ მოიწვევს ჩუმად კომიტეტის სხდომას, მაგალითად საღამოს, გვიან. მათ შეიძლება ჩუმად ჩაატარონ სხდომა კომიტეტის, რომ მაინც გააფორმონ ეს კანონპროექტი, მაგრამ ჩვენი ამოცანა ახლა არის, რომ არ ჩატარდეს სხდომა.”– ამბობს სამადაშვილი. 

ვიდოეო: თამარ გვარამია

ვიდეო: ტაბულა

● რას ნიშნავს კანონი უცხოელი აგენტების შესახებ, რომელსაც “ქართული ოცნება” იღებს. რა ვიცით ამ დროისთვის
● “რუსული კანონის მსგავსია” – ამერიკელი სენატორების ვიზიტი საქართველოში. მთავარი
●რას ფიქრობენ უცხოელი და ქართველი ექსპერტები “უცხოური აგენტების” შესახებ კანონპროექტზე. სპოილერი: კარგს არაფერს

საქართველოს მთავრობა აპირებს მიიღოს კანონი, რომლის მიხედვით, ის არასამთავრობო  და მედია ორგანიზაციები, რომლებიც უცხოეთიდან ფინანსდებიან, „უცხოური გავლენის აგენტებად“ უნდა დარეგისტრირდნენ.

27 თებერვლის მდგომარეობით, პარლამენტში ორი კანონპროექტია დარეგისტრირებული: ერთი 14 თებერვალს დარეგისტრირდა და ის რუსული კანონის ანალოგია; მეორე კი, ალტერნატივის სახით დარეგისტრირდა მას შემდეგ, რაც პირველს დიდი კრიტიკა მოჰყვა. ეს მეორე, მისი ავტორების თქმით, არის ამერიკული კანონის (FARA-ს) ანალოგი. მათ თქვეს, რომ FARA პირდაპირ თარგმნეს.

ორივე კანონპროექტის ავტორია მოძრაობა „ხალხის ძალა“, რომელიც მმართველი გუნდისგან ფორმალურად გამოყოფილმა დეპუტატებმა ჩამოაყალიბეს. „ხალხის ძალა“ მკვეთრად ანტიდასავლური განცხადებებით გამოირჩევა. მეტიც, მისი წევრები პირდაპირ აღიარებენ, რომ ეს პარტია შეიქმნა იმისთვის, რომ “ხალხს სიმართლე უთხრას დასავლეთის შესახებ, რომელიც საქართველოს ომში ჩათრევას ცდილობს”.

კანონპროექტს აკრიტიკებს ყველა, მმართველი პარტიის გარდა: ადგილობრივი არასამთავრობო და მედია სექტორი, ოპოზიცია, ექსპერტები და ის პოლიტიკოსები, რომლებიც ცოტა ხნის წინ “ქართული ოცნების” ხელისუფლებაში იყვნენ და საქართველოს პრეზიდენტიც კი.

კანონპროექტს მკაცრად აკრიტიკებენ საქართველოს დასავლელი პარტნიორები სხვადასხვა საერთაშორისო ორგანიზაციებიდან, ამერიკელი სენატორები თუ ევროპელი დეპუტატები. ამერიკის ელჩმა კი მას პირდაპირ უწოდა “რუსული კანონი”.