პრეზიდენტმა საკონსტიტუციო სასამართლოს მიმართა საპარლამენტო არჩევნების შედეგების გასაბათილებლად
პრეზიდენტმა საკონსტიტუციო სასამართლოს მიმართა
საქართველოს პრეზიდენტმა სალომე ზურაბიშვილმა საქართველოს საკონსტიტუციო სასამართლოს სარჩელით მიმართა და არჩევნების საბოლოო შედეგების არაკონსტიტუციურად ცნობა მოითხოვა.
არჩევნების საყოველთაობისა და ფარულობის პრინციპების დარღვევიდან გამომდინარე, პრეზიდენტი არჩევნების მომწესრიგებელი სადავო ნორმებისა და მათ საფუძველზე ჩატარებული არჩევნების საბოლოო შედეგების არაკონსტიტუციურად ცნობას მოითხოვს.
პრეზიდენტის სარჩელი საკონსტიტუციო სასამართლოში მისმა წარმომადგენელმა ეკა ბესელიამ შეიტანა.
სამი დღის ვადაში სასამართლო მიიღებს სარჩელის დარეგისტრირების გადაწყვეტილებას, რის შემდეგაც ცნობილი გახდება განხილვის თარიღი.
კონსტიტუციონალისტი ვახუშტი მენაბდე ამბობს, რომ ვიდრე საქმე საკონსტიტუციო სასამართლოში იქნება, პარლამენტი ვერ ცნობს საკუთარ უფლებამოსილებას.
მისივე განმარტებით, თუ საკონსტიტუციო სასამართლო ამ სარჩელს წარმოებაში მიიღებს, მისი განხილვის ვადა იქნება 30 დღე.
სარჩელი რომც არ დაკმაყოფილდეს (ამის მოლოდინი არ მაქვს, საკონსტიტუციო სასამართლო კონტროლდება ოცნების მიერ), პროცესმა დაახლოებით ერთი თვე შეიძლება მოიგოს, რადგან პარლამენტის შეკრების დროისთვის საკონსტიტუციო სასამართლოში წამოწყებული დავა, სავარაუდოდ, დასრულებული არ იქნება. პარლამენტის შეკრებისას სარჩელის შეტანიდან დაახლოებით ერთი კვირა იქნება გასული. ერთ კვირაში კი სასამართლო ვერ შეძლებს სარჩელის საქმის ჯერ დასაშვებობის, შემდეგ კი არსებითი განხილვასა და გადაწყვეტას. ამას რამდენიმე კვირა დასჭირდება.
“სანამ საქმე საკონსტიტუციოში იქნება, პარლამენტი ვერ ცნობს საკუთარ უფლებამოსილებას. რეგლამენტის მიხედვით მას არავითარი დისკრეცია არ აქვს“, – განმარტავს მენაბდე.
მისივე განმარტებით, უმაღლეს საკანონმდებლო ორგანოს არ შეუძლია ცნოს იმ დეპუტატების უფლებამოსილება, ვისი არჩევის კანონიერება გასაჩივრებულია სასამართლოში.
“ხოლო თუ მათი რაოდენობა 51-ზე მეტია, საკანონმდებლო ორგანო სრულ უფლებამოსილებას ვერ იძენს. ზემოთ აღწერილი სარჩელის შემთხვევაში კი 150-ვე დეპუტატის არჩევის კანონიერებაა გასაჩივრებული“, – ამბობს მენაბდე.
პრეზიდენტის სარჩელი საკონსტიტუციო სასამართლოში მისი ანტიკრიზისული გეგმის ერთ-ერთი მიმართულებაა. პრეზიდენტის გეგმა ასეთია: დაინიშნოს ახალი არჩევნები, დაკომპლექტდეს ახალი ცენტრალური საარჩევნო კომისია.
ასევე შეიქმნას საარჩევნო დავებისთვის სპეციალური სასამართლო და მოხდეს საარჩევნო კოდექსის ცვლილება. ზურაბიშვილის თქმით, ეს ყველაფერი საერთაშორისო პარტნიორების მხარდაჭერით უნდა მოხდეს.
პრეზიდენტმა საკონსტიტუციო სასამართლოს მიმართა
