საქართველოს მთავრობა ორწლიანი კამპანიის, Starring Georgia-ს დაწყებას აანონსებს, რომლის ფარგლებში საქართველოში სხვადასხვა უცხოური პოპულარული ჯგუფისა და შემსრულებლის კონცერტი გაიმართება.
საქართველოს მთავრობის ცნობით, ინიციატივა პრემიერ-მინისტრს, ირაკლი ღარიბაშვილს ეკუთვნის და “კამპანიის მთავარი მიზანი ქვეყნის პოპულარიზაცია, საქართველოს ტურისტული, ეკონომიკური და კულტურული პოტენციალის გაძლიერებაა”.
ამ მიზნითმთავრობამ 70 მილიონი ლარი (27 მილიონ 700 ათას დოლარამდე) გამოყო. კონცერტები ძირითადად შეკვეთილში მდებარე საკონცერტო დარბაზში, Black Sea Arena-ზე გაიმართება, რამდენიმე კონცერტი კი თბილისში ჩატარდება.
უკვე ცნობილია შემსრულებლებიც, რომლებიც თბილისსა და შეკვეთილს ეწვევიან. ესენია ჯგუფები: Imagine Dragons, The Killers, Nile Rodgers & Chic და სხვა.
ამ ინიციატივამ საზოგადოებაში არაერთგვაროვანი რეაქცია გამოიწვია. კონცერტებში დახარჯული ფული ბევრს გაუმართლებლად მიაჩნია ქვეყანაში, სადაც დაახლოებით ყოველი მეექვსე მოქალაქე აბსოლუტური სიღარიბის ზღვარს ქვემოთ ცხოვრობს. მათ შორის არის “საერთაშორისო გამჭვირვალობა – საქართველოს” ანალიტიკოსი ბესო ნამჩავაძე.
ხელისუფლების არგუმენტებს ბესო ნამჩავაძე ასე პასუხობს:
“არც ერთ შემთხვევაში არ ვეთანხმები ბიუჯეტიდან კონცერტების დაფინანსებას, მაგრამ ვინც ეთანხმება, მათ ძირითადად სამი არგუმენტი აქვთ:
1. ხელი უნდა შევუწყოთ დამწყებ, ფოლკლორულ და ა.შ. შემსრულებლებს, არაპოპ მუსიკას;
2. ყველა ვერ მიდის საზღვარგარეთ ან არ აქვთ ბილეთის ფული და რა ქნან, მათაც უნდათ ცნობილ მომღერლებს მოუსმინონ;
3. ტურიზმს გაზრდის;
საქართველოს მთავრობის მიერ ბიუჯეტიდან კონცერტებზე გამოყოფილი 70 მლნ ლარი ამ არგუმენტებიდან არცერთში არ ჯდება:
1. ფული იხარჯება მსოფლიოში ცნობილ შემსრულებლებზე, რომლებსაც იმდენი ფული აქვთ, რომ იქეთ ეხმარებიან ხოლმე ღარიბ ქვეყნებს;
2. დღეს გაირკვა, რომ ბილეთის ფასი იქნება 100-დან 500 ლარამდე, ანუ ღარიბი ადამიანი ვერ იყიდის;
3. არავის დაუთვლია ეს 70 მლნ რამდენ ტურისტს მოიზიდავს და რამდენს მოვიზიდავდით სხვანაირად რომ დაგვეხარჯა, ან საგადასახადო შეღავათები მიგვეცა ფესტივალების ორგანიზატორებისთვის. თან კონცერტები ტარდება აგვისტოში, როდესაც საქართველოში ტურიზმის პიკია. ამ დროს ტურისტული ობიექტები საქართველოში 3 თვეა დატვირთული და ზოგიერთი 9 თვე ზარალზეა.
სინამდვილეში, 70 მლნ იხარჯება:
მთავრობის პიარისთვის (თითქოს მაგრად მუშაობს), სამეგობრო-სანათესაოსთვის უფასო ბილეთების გაჩითვისთვის, უფუნქციოდ მყოფი, ზარალიანი ბლექსი არენას ასამუშავებლად და იმის საჩვენებლად, რომ თითქოს ქვეყანაში ყველაფერი კარგადაა და გვემღერება-გვეცეკვება.”
საკონცერტო დარბაზი „ბლექ სი არენა“ 2016 წლის 31 ივლისს გაიხსნა. ის 10 000-მდე მაყურებელს იტევს. დარბაზის მშენებლობა 2008 წელს ბიძინა ივანიშვილის ფონდ „ქართუს“ ინიციატივით დაიწყო და მასში ფონდმა დაახლოებით, 115 მილიონი დოლარის ინვესტიცია განახორციელა. მშენებლობის დასრულების შემდეგ კი, 2016 წლის 10 ივლისს ფონდმა „ბლექ სი არენა“ სახელმწიფოს უსასყიდლოდ გადასცა.
არასამთავრობო ორგანიზაცია “ფლანგვის დეტექტორის” მონაცემებით, ბიძინა ივანიშვილის მიერ ნაჩუქარი საკონცერტო დარბაზის შენახვა და დასაქმებულთა ხელფასები სახელმწიფოს 2017-2020 წლებში 29 მილიონ ლარამდე დაუჯდა. კომპანიის შემოსავლის ძირითადი წყარო სახელმწიფო ბიუჯეტიდან მიღებული დაფინანსებაა, რომელიც შემოსავლის 93%-ს შეადგენს, რადგან კონცერტები იქ იშვიათად იმართება.
იმავე “ფლანგვის დეტექტორის” მონაცემებით, Black Sea Arena წლიდან წლამდე ზარალზე მუშაობს, შესაბამისად სახელმწიფო ბიუჯეტიდან დახარჯული მილიონები საკონცერტო დარბაზის შენახვასა და დასაქმებულთა ხელფასებში იხარჯება.
2017-2020 წლებში ბლექ სი არენამ დაახლოებით 33 მილიონი ლარის სუბსიდია მიიღო სახელმწიფო ბიუჯეტიდან; ამავე წლებში ბლექ სი არენას აკუმულირებულმა ზარალმა ჯამში 18.4 მილიონ ლარზე მეტი შეადგინა.
